1 ሀዋንቱ ሶሎሞና ሌምሳቱዋ። አꬌዳ ኤራንቻ ናአይ ባረ አዉዋ ናሸቼ፤ ሽን ቦዛ ናአይ ባረ አቶ ካዮዬ።

2 ናጋራን ደሜዳ ሚሻይ ጎኤና፤ ሽን ጽሎተꬃይ ሀይቁዋፐ አሼ።

3 መꬍና ጎዳይ ጽሎቱዋ ኮሻይሰና፤ ሽን ናጋራንቻቱዋ አሙዋ ፖልሰና።

4 አዛላተꬃይ ማንቂሴ፤ ሽን ምኒደ ኦꬅያዌ ዱረዬ።

5 አꬌዳ ኤራንቻ ኡራይ ካꬃ ቦንያን ሺሼ፤ ሽን ካꬃ ጫክያ ዎደ ገምእሽያ ኡራይ ካዉሼ።

6 ጽሎ አሳይ አንጀቴ፤ ሽን ናጋራንቻ ዶና ማካላይ ካሜ።

7 ጽሉዋ ሱንꬃይ አንጁዋን ጼሰቲደ ደኤ፤ ሽን ናጋራንቻቱዋ ሱንꬃይ ዶገቴ።

8 አꬌዳ ኤራንቻቱ አዛዜዳዋ ኦꬂኖ፤ ሽን ቦዛተꬃን ጮ ዶናትያዋንቱ ባሻዉ ቢኖ።

9 ሱረ አሳይ ሳሮ ደኤ፤ ሽን ጌላ ኡራይ ባረ ባይዙዋን ኦይቀቴ።

10 አሳ ቦላ ስምእያ ኡራይ መቱዋ አዬ።

ቦዛተꬃን ጮ ዶናትያዋንቱ ባሻዉ ቢኖ።

11 ጽሉዋ ሃሳያይ ደኡዋ ፑልትያ፤ ሽን ናጋራንቻ ሃሳያይ ማካላተꬃ ገንꬄ።

12 እጹ ፓሉምያ ደንꬄ፤ ሽን ሲቁ ባይዙዋ ኡባ ፓይደና። ያቆባ 5:20፤ 1 ጰጽ. 4:8

13 ዎዛናማ አሳይ አꬌዳ ኤራን ሃሳዬ፤ ሽን ቦዛ ኡራይ ጻምአን ሾጨቴ።

14 አꬌዳ ኤራንቻቱ ኤራ ዳጋዪኖ፤ ሽን ቦዛ ሃሳያ ሃሳይያ ኡራይ ባረና ባይዜ።

15 ዱርያ ሚሻይ ድረቴዳ ካታማ ማላ፥ ባረ ጎዳ ናጌ፤ ሽን ህዬሳተꬃይ ህዬሳ ꬋይሴ።

16 ጽሎ ኡራ አ ሎኦ ኦሱ ደኦ ካለꬄ፤ ሽን ኢታ ኡራ ዉርሰꬃይ ሙሩዋ አሄ።

17 ሴርና ኤኖ ግያ ኡራይ ደኡዋ ኦግያን ሀመቴ፤ ሽን ሴርና እጽያ ኡራይ ባሌ።

18 እጺደ ባረ እጽያዋ ኤርሰና ኡራይ ዎርዳንቻ፤ ዝግርሳ ላልያ ኡራይካ ቦዛ።

19 ዳሮ ሃሳያ ግዶን ናጋራይ ꬋየና፤ ሽን ባረ ዶና ሺሽ አክያ ኡራይ አꬌዳ ኤራንቻ።

20 ጽሉዋ እንጻርሳይ ትገቴዳ ጌሻ ብራ ማላ፤ ሽን ኢታ ኡራ ቆፋዉ ጋቲ ጉꬃ።

21 ጽሎ ኡራ ሃሳያይ ዳሮ አሳ ጎኤ፤ ሽን ቦዛቱ ባረንቱ ዎዛና ፓጫን ሀይቂኖ።

22 መꬍና ጎዳ አንጁ ዱረ ከሴ፤ እ ሄ ዱረተꬃን መቱዋ ዋላከና።

23 ቦዛ ኡራዉ ኢታባ ኦꬅያዌ ካሳ ማላ፤ ሽን ዎዛናማ ኡራይ አꬌዳ ኤራተꬃን ናሸቴ።

24 ኢታ ኡራይ ህርጌዳባይ አ ቦላ ጋካናዋ፤ ሽን ጽሉ አሞቴዳዌ እመታናዋ።

25 ጎቱ ደንዲደ አꬎደ፥ ናጋራንቻቱ ፕተት ꬋይኖ፤ ሽን ጽሎቱ መꬍናዉ ምኒደ ደአና።

26 ጫላይ አቻ ዝልእስያዋዳንነ ጩዋይ አይፍያ ፖግያዋዳን፥ አዛላ ኡራ ኪትያዌ ይሎዬ።

27 መꬍና ጎዳዉ ያይያዌ ላይꬃ አዱሴ፤ ሽን ናጋራንቻ ኡራ ላይꬃይ ቃሜ።

28 ጽሎ ኡራይ ስንꬃና ናሸቻይ ያና ጊደ ናጌ፤ ሽን ኢታ ኡራይ ስንꬃና ያና ጊደ ናግያዌ አያይነ ባዋ።

29 መꬍና ጎዳ ኦጊ ጽሎቶ ባቃት አትያ ሳኣ፤ ሽን ኢታ ኦꬅያዋንቶ ባሻ።

30 ጽሎቱ ደኢያሳፐ ሾደትክኖ፤ ሽን ኢታቱ ቢታ ቦላ ደእክኖ።

31 ጽሎ አሳይ አꬌዳ ኤራተꬃ ሃሳዬ፤ ሽን ጌላባ ሃሳይያ እንጻርሳይ ቃንጸታና።

32 ጽሎ አሳይ በስያ ሃሳያ ኤሬ፤ ሽን ኢታ አሳይ ጌላ ሃሳዬ።