1 መꬍና ጎዳይ ዎርዱዋ ሚዛናን ልክያዋንታ እጼ፤ ሽን ልከ ሚዛናን ልክያዋንቱን ናሸቴ።

2 ኦቶሩ ይያ ዎደ ካዉሻተꬃይ ዬ፤ ሽን አሽከተꬃና አꬌዳ ኤራተꬃይ ዬ።

3 ጽሎቱዋ ኡንቱንቱ ሱረተꬃይ ካለꬄ፤ ሽን አማነተናዋንታ ኡንቱንቱ ጌላተꬃይ ꬋይሴ።

4 ሀንቁዋ ጋላስ ዱረተꬃይ ጎኤና፤ ሽን ጽሎተꬃይ ሀይቁዋፐ አሼ።

5 ቦሪ ባይና ኡራ ኦግያ አ ጽሎተꬃይ ሱርሴ፤ ሽን ኢታ ኡራይ ባረ ኢታተꬃን ኩንዴ።

6 ሱረቱዋ ኡንቱንቱ ጽሎተꬃይ አሼ፤ ሽን አማነተናዋንታ ኡንቱንቱ አሙ ጲረ ግዲደ ኦይቃና።

7 ኢታ አሳይ ሀይቂያ ዎደ፥ እ ናግያ ህዶታይካ አናና እትፐ ሀይቄ፤ እ ባረ ዎልቃን ጬቀትያዌ ኡባይካ ꬋዬ።

8 ጽሉ መቱዋፐ አቴ፤ አ ድራዉ ኢታ ቦላ መቱ ዬ።

9 ጾሳ ኤረና ብታኒ ባረ ዶናን አሳ ꬋይሴ፤ ሽን ጽሎቱ ኤራን አቲኖ።

10 ጽሎቱ ቦንቼትያ ዎደ፥ ካታማይ ናሸቴ፤ ቃይ ኢታቱ ሀይቂያ ዎደ፥ ሀሹ ጌ።

11 ጽሎቱዋ አንጁዋ ጋሱዋን ካታማይ ድጬ፤ ሽን ኢታ ኡራ ሃሳያይ ካታማ ꬋይሴ።

12 ባረ ሾሩዋ ካꬍያ ኡራዉ ዎዛናይ ባዋ፤ ሽን አኬካንቻ ኡራይ ጮኡ ጌ።

13 ዝግርያ አሳይ ጹራ ላሌ፤ ሽን አማነትያ አሳይ ጹራ ገንꬄ።

14 ካለꬅያዌ ꬋዮፐ፥ ካዉተꬃይ ኩንዴ፤ ሽን ዳሮ ዞርያዋንቱ ደኦፐ፥ ሳሩ ደኤ።

15 ኤረና ኡራዉ ዋሰ ግድያ አሳይ ቱሙዋፐ መቶታና፤ ሄዋፐ ዋሰ ግደናን እጽያዌ ሎአ።

16 ኡሉ ኬካ ምሽራታ ቦንቼታዉ፤ ሽን መቀꬃ ኢታ አሳይ ዱረተꬃ ጻላላ ዱረቴ።

17 ኬካ አሳይ ባረዉ ሎኦባ ኦꬄ፤ ሽን መቀꬃ ኢታ አሳይ ባረና ቆሄ።

18 ኢታ አሳይ ደምያ ሚሻይ ጭምያ ሚሻ፤ ሽን ጽሎተꬃ ዘርያ ኡራይ ቱሙ ዎይቱዋ ጫካና።

19 ጽሎተꬃን ምኒደ ደእያ ኡራይ ፓጻ ደአና፤ ሽን ኢታተꬃ ካልያ ኡራይ ሀይቃና።

20 መꬍና ጎዳይ ኢታ ቆፋይ ደእያ አሳቱዋ እጼ፤ ሽን ሱረ ሀመትያዋንቱን ናሸቴ።

21 ኢታ አሳይ ሙረተናን አተና፤ ሽን ጽሎቱ አታናዋንታ።

22 አዱሳ ቆፍ ባይና ፑላንቻ ማጫ ምሽራት ፑላይ ጉዱንꬃ ሲꬍያን አꬄዳ ዎርቃ አሌቁዋ ማላ።

23 ጽሎቱዋ አሙዋ ፖሉ ሎኦ ጻላላ፤ ሽን ኢታቱዋ አሙዋ ፖሉ ሀንቁዋ ጻላላ።

24 እት እት አሳቱ ባረንቱ ሚሻ አሳዉ ጮ ላሊኖ፤ ሽን ኡንቱንቱ አቁ ያ ዳሬ። ሀራ አሳቱ ቃይ ባረንቱ ሚሻዉ ሎይꬅ ኡዘቲኖ፤ ሽን ኡንቱንቱ አቁ ሃ ፓጬ።

25 ኬካ አሳይ ዱረታና፤ ሀራቱዋ ማድያ አሳይ ማደታና።

26 ካꬃይ አልእና ዛልአናዉ ምንጅያ ኡራ አሳይ ሸቄ። ሽን ባረ ካꬃ አሳይ ኮይያ ዎደ ዝልእያ አሳ አንጄ።

27 ሎኦባ ምንሲደ ኮይያ ኡራይ ናሸቻ ደሜ፤ ሽን ኢታባ ኮይያ ኡራ ኢታባይ ደሜ።

28 ባረ ዱረተꬃን አማነትያ አሳይ ኩንዳና፤ ሽን ጽሎቱ ባልጉዋ ምꬃዳን ዳሻና።

29 ባረ ሶ አሳ ቦላ ጫቡዋ ደንꬅያ ኡራይ ጎኤታናባይ አያይነ ባዋ። ቦዛቱካ አꬌዳ ኤራንቻቶ ቆማ ግዳና።

30 ጽሎ አሳይ ደኡዋ አይፍያ አይፍያ ምꬃ ማላ፤ ሸምፑዋ አሽያዋንቱ አꬌዳ ኤራንቻቱዋ።

31 ጽሎቱ ሳኣን ባረንቱ ኦሱዋ ጋትያ አክያዋ ግዶፐ፥ ኢታቱነ ናጋራንቻቱ ባረንቱ ኦሶ አካና ጋቲ ዋን ዳራንዴሻ!1 ጰጽ. 4:18