12
1 ሴርያዋ ዶስያ ኡራይ ኤራተꬃ ዶሴ፤ ሽን ሴራ እጽያ ኡራይ ዶንጭሎዋ።
2 ሎኦ አሳይ መꬍና ጎዳፐ ሳባ ደሜ፤ ሽን መꬍና ጎዳይ ኢታቱዋ ፕርዴ።
3 አሳ ኢታተꬃይ ምንሲደ ኤሰና፤ ሽን ጽሎቱዋ ጻጱ ቃጸና።
4 ዎዛናማ ምሽራታ ባረ አስናዉ ካላቻ ማላ፤ ሽን ባረ አስና ካዉሽያ ምሽራታ አ መቀꬃ ምያ አጃጅያ ማላ።
5 ጽሎቱዋ ቆፋይ ሱረ፤ ሽን ኢታቱዋ ዞሪ ጭሙዋ።
6 ኢታቱዋ ሃሳያይ አሳ ዎꬋናሳ፤ ሽን ጽሎቱዋ ሃሳያይ ኡንቱንታ አሼ።
7 ኢታ አሳቱ ኩንዳና፤ ኡንቱንቶ ዘረꬃይካ ደኤና፤ ሽን ጽሎቱዋ ዘረꬃይ ምኒደ ደአና።
8 አሳይ ባረ አꬌዳ ኤራተꬃ ኬሻ ጋላተቴ፤ ሽን ጌላ ቆፋይ ደእያ አሳይ ካቴ።
9 ዱረ አሳ ማላቲደ፥ መቱዋን ደእያ አሳፐ ጮ አሳ ማላቲደ፥ ኦꬂደ ባረ ደኡዋ ሱግያ አሳይ ኬካ።
10 ጽሎ አሳይ ባረ መህያዉ ቃረቴ፤ ሽን ኢታ አሳ ኬካተꬃዉ መቀꬅ ባዋ።
11 ባረ ቢታ ምንስ ኦꬅያ ኡራይ ካꬃ ካሌ፤ ሽን ፓናባ የደርስያ ኡራዉ አኬካይ ፓጬዳዋ።
12 ኢታቱ ናጋራንቻ አሳቱዋ ኦሞዱዋ አካናዉ አሞቲኖ፤ ሽን ጽሎቱዋ ጻጱ ዳሺደ ደአና።
13 ኢታ አሳ አ ዶናፐ ከሴዳ ሃሳያይ ጲረ ግዲደ ኦይቄ፤ ሽን ጽሉ መቱዋፐ ከስ አኬ።
14 አሳይ ባረ ዶናፐ ከስያ ቃላን ሎኦባ ካሌ፤ ባረ ኦꬄዳ ኦሱዋ ጋትያካ አኬ።
15 ቦዛ አሳይ ብያ ቡሳይ አዉ አ ሁጲያን ልከ ማላቴ፤ ሽን አꬌዳ ኤራንቻ አሳይ ዞርያ ስሴ።
16 ቦዛ ኡራ ሀንቁ ኤለካ ኤረቴ፤ ሽን ጭንጫ አሳይ ቦርያ ካꬊደ አꬌ።
17 ቱሙዋ ሃሳይያ አሳይ ሱረባ ኦዴ፤ ሽን ዎርዱዋ ማርካይ ዎርዱዋን ኦዴ።
18 አኬከናን ሃሳይያ ሃሳያይ ጩብያዳን ጫዴ፤ ሽን አꬌዳ ኤራንቻ እንጻርሳይ ፓꬄ።
19 ዎርዶ ሃሳያይ ጉꬃ ዎድያሳ፤ ሽን ቱሞ ሃሳያይ መꬍናዉ ደአና።
20 ኢታ ቆፕያዋንቱ ዎዛናን ጭሙ ደኤ፤ ሽን ሳሮባ ዞረትያዋንቱ ዎዛናን ናሸቻይ ኩሜ።
21 ጽሎቱዋ መቱ ጋከና፤ ሽን ኢታቶ መቶፐ አትና፥ ሀራባይ ደኤና።
22 መꬍና ጎዳይ ዎርዳንቻቱዋ እጼ፤ ሽን ቱማንቻ አሳቱዋን እ ናሸቴ።
23 ጭንጫ አሳይ ባረ ኤራ ቆሴ፤ ሽን ቦዛቱ ባረንቱ ቦዛተꬃ ኦዲኖ።
24 ምኒደ ኦꬅያ ኡራይ ደርያ ሞዴ፤ ሽን አዛላይ ሞደቴ።
25 ህርግያዌ አሳ ናሸቻ ድጌ፤ ሽን ሎኦተꬃና ደእያ ሃሳያይ አ ናሸቼ።
26 ጽሎ አሳይ ባረ ሾሩዋ ዞሪደ፥ ሱረ ኦግያ ካለꬄ፤ ሽን ኢታቱዋ ኦጊ ቱሙዋፐ ሃሴ።
27 አዛላ አሳይ ሻንካቲደ አሄዳ አሹዋ ካና፤ ሽን ምን ኦꬂደ ደሜዳ ኡራይ ባረ ዱረታዉ ቦንቹዋ እሜ።
28 ጽሎተꬃ ኦግያን ደኡ ደኤ፤ ሄ ኦግያን ሀይቁ ባዋ።