1 ኤራንቻ ናአይ ባረ አዉዋ ሴራ ስሴ፤ ሽን ቅሊጭያዌ ሴራ ስሰና።

2 አሳይ ባረ ዶናፐ ከስያ ቃላን ሎኦባ አኬ፤ ሽን አማንተናዋንቱ ማካላባ አሞቲኖ።

3 ባረ ዶና ናግያ ኡራይ ባረ ሸምፑዋ ናጌ፤ ሽን ኤለካ ሃሳይያ ኡራይ ባረና ꬋይሴ።

4 አዛላይ አሞቴ፤ ሽን አያነ ደመና፤ ሽን ምኒደ ኦꬅያዋንቱ ካላና።

5 ጽሎ አሳቱ ዎርዱዋ ሃሳያ እጺኖ። ሽን ኢታ አሳቱዋ ሃሳያይ ዬላዬነ ካዉሼ።

6 ሱረ ደኡዋ ደእያ ኡራ አ ጽሎተꬃይ ናጌ፤ ሽን ናጋራንቻ አ ናጋራይ ኩንድሴ።

7 ባረና ዱረ ማላትስያ አሳይ ደኤ፤ ሽን አዉ አያይነ ባዋ፤ ሀራይ ቃይ ባረና ህዬሳ ማላትስያዌ ደኤ፤ ሽን አዉ ዳሮ ዱረታይ ደኤ።

8 አሳይ ባረ ሻሉዋን ባረ ሸምፑዋ ዎዛናዉ ዳንዳዬ፤ ሽን ህዬሳ ያሽስያዌ ባዋ።

9 ጽሎቱዋ ጾምፒ ፖጩም ፖኤ፤ ሽን ኢታቱዋ ጾምፒ ቶአና።

10 ኦቶሩ ዋላሳ የሌ፤ ሽን ዞርያ አክያዋንቱ አꬌዳ ኤራንቻ።

11 ዳቡር ባይናን ደሜዳ ሚሻይ ኤለካ ꬋዬ፤ ሽን ምን ኦꬂደ ደሜዳ ዱረታይ፥ ዳር ዳሪደ ቤ።

12 ኮይያዌ ፖለተናን ጋምእያዌ ካዮዬ፤ ሽን አሞቴዳዌ ፖለትያዌ ናሸቼ።

13 ዞርያ ካꬍያ ኡራይ መቱዋን ገሌ፤ ሽን አዛዙዋ ቦንችያ ኡራይ ሳሩዋን ደአና።

14 አꬌዳ ኤራንቻይ እምያ ትምርቲ ደኡዋ ፑልቶ፤ ሄዌ አሳይ ሀይቁዋ ጲርያፐ ከስ አካናዉ ማዴ።

15 አኬካይ ደእያ ኡራይ ቦንቼቴ፤ ሽን አማነተናን አግያዌ ባሻዉ አፌ።

16 ጭንጫ አሳይ ኡባይ ኤራን ኦꬄ፤ ሽን ቦዛይ ባረ ቦዛተꬃ ቆንጭሴ።

17 አሳይ ኪቴዳ ኢታ ኪታንቻይ፥ መቱዋን ገሊኖ፤ ሽን አማንꬅያ አሳቱ ኪቴዳዌ፥ ሳሮተꬃ አሂኖ።

18 ሴራ እጽያ አሳይ ህዬሴነ ዬላቴ፤ ሽን ሴርና ስስያ ኡራይ ቦንቼቴ።

19 አሞቴዳዋ ደምያዌ ሎይꬅ ናሸቼ፤ ሽን ኢታቱ ኢታፐ ሃካናዉ ኮይክኖ።

20 አꬌዳ ኤራንቻ አሳቱዋና ሀመትያ አሳይ አꬌዳ ኤራንቻ ግዴ፤ ሽን ቦዛ አሳቱዋና ሀመትያ አሳይ መቱዋን ገሌ።

21 ናጋራንቻቱዋ ኢታ ካጫይ ካሌ፤ ሽን ጽሎቱ ሎኦ ኦሱዋ ዎይቱዋ አካና።

22 ሎኦ አሳይ ባረ ናናቱዋ ናናቱዋ ላትሴ፤ ሽን ናጋራንቻ ዱረታይ ጽሎ ዳጋቴ።

23 ህዬሳ ጎሻይ ዳሮ ካꬃ አይፋናዉ ዳንዳዬ፤ ሽን ሱረ ፕርዳይ ፓጬዳዋ ጋሱዋን ꬋዬ።

24 ቃይጼርያን ዋꬋናዉ ቃረትያ ኡራይ ባረ ናኣ እጼ፤ ሽን ባረ ናኣ ሲቅያ ኡራይ ምኒደ ሴሬ።

25 ጽሉ አ ኡሉ ካላና ጋካናዉ ሜ፤ ሽን ናጋራንቻይ ኮሻቴ።