1 አꬌዳ ኤራንቻ ምሽራታ ባረ ጎልያ ኬጻዉ፤ ሽን ቦዛታ ባረ ጎልያ ባረ ኩሽያን ኮላዉ።

2 ሱረ ሀመትያ አሳይ መꬍና ጎዳዉ ያዬ፤ ሽን ባረ ኦግያ ጌላይያ አሳይ መꬍና ጎዳ ካꬌ።

3 ቦዛ ሃሳያይ አ ዞክያዉ ጻምኣ አዬ፤ ሽን አꬌዳ ኤራንቻቱዋ እንጻርሳይ ኡንቱንታ ናጌ።

4 ቦራቱ ባይና ሳን ዬሲ መላ ደኤ፤ ሽን ነዉ ጎሽያ ዎልቃማ ቦራቱ ደኦፐ፥ ነ ዬስያን ካꬃይ ኩሜ።

5 አማነትያ ማርካይ ኡባ ገደ ቱሙዋ ኦዴ፤ ሽን ዎርዱዋ ማርካይ ዎርዱዋ ጻላላ ሃሳዬ።

6 ቅሊጭያዌ አꬌዳ ኤራተꬃ ኮዬ፤ ሽን ደመና፤ አኬካይ ደእያ አሳይ ኤራተꬃ ደማናዌ አ ዋይሰና።

7 ቦዛ አሳፐ ሃካ፤ አያዉ ጎፐ፥ ኔን አ ሃሳያፐ ኤራ ደማካ።

8 ጭንጫ አሳይ ባረ ኦꬅያዋ ኤርያ ድራዉ፥ አꬌዳ ኤራንቻ፤ ሽን ቦዛ አሳይ አይነ ኤረናንካ ኤርያዋ ማላትያ ድራዉ ጭሜ።

9 ቦዛቱ ናጋራ ኦꬂደ፥ ካዮትያዋ አጊደ ቅሊጪኖ፤ ሽን ሱረቱ ባረንቱ ናጋራይ አቶ ጌተታናዋ ኮዪኖ።

10 ባረ ዎዛና ካዩዋ እዛዉ ኤሬ፤ አ ናሸቻካ ኦንነ አናና ኮጸና።

11 ኢታቱዋ ጎሊ ኮለተና፤ ሽን ሱረቱዋ ጎሊ ምኒደ ደአና።

12 አሳዉ ልከ ማላትያ ኦጊ ደኤ፤ ሽን ቢና፥ አ ዉርሰꬃይ ሀይቁዋን ከስ የጌ። ሌም. 16:25

13 ሚቻንካ ዎዛናይ ካዮት ኤሬ፤ ናሸቻ ዉርሰꬃይካ ካዩዋ ግዳናዉ ዳንዳዬ።

14 ኢታ አሳይ ባረ ኢታ ኦሱዋ ጋትያ አካና፤ ሎኦ አሳይካ ባረ ሎኦ ኦሱዋ ጋትያ አካና።

15 ቦዛ አሳይ ኡባ አማኔ፤ ሽን ጭንጫይ አኬኪደ ታንጌ።

16 አꬌዳ ኤራንቻ አሳይ መꬍና ጎዳ ያዬ፤ ኢታፐካ ሃኬ፤ ሽን ቦዛይ አላለ ጌናነ ኤሌሌ።

17 ኤለ ሀንቀትያ አሳቱ ቦዛ ኦሱዋ ኦꬂኖ። ሽን ጭንጫቱ ዳንዳያንቻ።

18 ቦዛቱ ባረንቱ ቦዛተꬃ ጋትያ አኪኖ፤ ሽን ጭንጫቱ ኤራተꬃ ካላቻዳን ዎꬃናዋንታ።

19 ኢታ አሳቱ ሎኦ አሳቱዋ ስንꬃን ሆኪደ፥ ማሮታ ዎሳና። ናጋራንቻቱካ ጽሎቱዋ ፐንግያን ሆካና።

20 ህዬሳይ ባረ ሾሩዋንካ ዶሰተና፤ ሽን ዱረቶ ዳሮ ላገቱ ደኢኖ።

21 ባረ ሾሩዋ ካꬍያ አሳይ ናጋራ ኦꬄ፤ ሽን ህዬሳ ማድያዌ አንጀቴዳዋ።

22 ኢታባ ማቀትያዋንቱ ባሊኖ ግድክኖ? ሽን ሎኦባ ኦꬃናዉ ሀልችያዋንቱ ቱማተꬃነ አገና ሲቁዋ ደሚኖ።

23 ምኒደ ኦꬅያዋን ኡባን ጎአይ ደኤ፤ ሽን ጮ መላ ሃሳያይ ህዬሳተꬃ ጻላላ አዬ።

24 አꬌዳ ኤራንቻቶ ኡንቱንቱ ዱረተꬃይ ካላቻ፤ ሽን ቦዛቱ ባረንቱ ቦዛተꬃ ጉጅ ጉጂደ ቦዚኖ።

25 ቱሙ ማርካይ ሸምፑዋ አሼ፤ ሽን ዎርዱዋ ማርካይ ባለꬄ።

26 መꬍና ጎዳዉ ያይያ ኡራዉ ምኖ ጌሱ ደኤ። እ አ ናናቶካ ባቃቲደ አትያ ሳኣ ግዳናዋ።

27 መꬍና ጎዳዉ ያይያዌ ደኡዋ ፑልቶ፤ ሄዋ ድራዉ፥ መꬍና ጎዳዉ ያይያዌ ሀይቁዋ ጲርያፐ አሼ።

28 ካትያ ግታተꬃይ እ ሞድያ አሳ ጮራተꬃና፤ ሽን እ ሞድያ አሳይ ꬋዮፐ፥ እካ ፓና።

29 ዳንዳያንቻ አሳዉ ዎልቃማ አኬካይ ደኤ፤ ሽን ኤለ ሀንቀትያ አሳይ ባረ ቦዛተꬃ ቆንጭሴ።

30 ዎፑ ጌዳ ዎዛናይ ቦላ ፓጻ ዎꬄ፤ ሽን ቃናቲ ቦላዉ አጃጅያ ሀርግያ ማላ።

31 ህዬሳቱዋ ናቂያ አሳይ ኡንቱንታ መꬌዳዋ ጫሼ፤ ሽን መቶታንቻቶ ኬክያ አሳይ ጾሳ ቦንቼ።

32 ኢታቱ ባረንቱ ኢታ ኦሱዋን ኩንዳና፤ ሽን ጽሎቱ ባረንቱ ሱረተꬃን ሀይቁዋፐ ናገታና።

33 አኬካንቻ አሳ ዎዛናን አꬌዳ ኤራተꬃይ ኩሜዳ፤ ሽን ቦዛቱ አꬌዳ ኤራተꬃ አያነ ኤርክኖ።

34 ጽሎተꬃይ እት ካዉተꬃ አሳ ꬎቁ ꬎቁ ኦꬄ፤ ሽን ናጋራይ አይ አሳነ ካዉሼ።

35 ካቲ ኤራንቻ ቆማን ናሸቴ፤ ሽን ዬላይያ ኦሱዋ ኦꬅያ ቆማ ሀንቀቴ።