1 ሊቆ ዛሩ ሀንቁዋ ዛርቢሴ፤ ሽን ፖዶላ ቃላይ ሀንቁዋ ደንꬄ።

2 አꬌዳ ኤራንቻ እንጻርሳይ ኤራ ሎይꬄ፤ ሽን ቦዛቱዋ ዶናይ ቦዛተꬃ ፑልቴ።

3 መꬍና ጎዳ አይፈቱ ኡባሳ ጼሊኖ፤ ኢታ ኦꬅያዋንታካ ሎኡዋ ኦꬅያዋንታካ በኢኖ።

4 ሊቆ ሃሳያይ ደኡዋ ምꬃ ማላ፤ ሽን ጭምያ ሃሳያይ አያና መንꬄ።

5 ቦዛ አሳይ ባረ አዉዋ ሴራ ካꬌ፤ ሽን ባረ አዉዋ ሴራ አክያ አሳይ ጭንጫ።

6 ጽሎ ኡራ ጎልያን ዳሮ ሚሻይ ደኤ፤ ሽን ኢታዉ ገልያ ሚሻይ መቱዋ አዬ።

7 አꬌዳ ኤራንቻቱዋ ዶናይ ኤራ ዘሬ፤ ሽን ቦዛቱዋ ዎዛናይ ሄዋ ማላ ግደና።

8 መꬍና ጎዳይ ኢታቱዋ ያርሹዋ ሸነቴ፤ ሽን ሱረቱዋ ዎሳይ አ ናሸቼ።

9 መꬍና ጎዳይ ኢታ አሳቱዋ ሄመታ ሸነቴ፤ ሽን ጽሎተꬃ ካልያዋንታ እ ሲቄ።

10 ሱረ ኦግያ አጌዳ አሳ ኢታ ሙሩ ናጌ፤ ሴራ እጽያ አሳይ ሀይቄ።

11 ዱፉነ ባሻይ መꬍና ጎዳ ስንꬃን ቆንጭያን ቤቲኖ። ያትና፥ አሳ ዎዛና ቆፋይ ዋን አፐ ጌማኔ?

12 ቅሊጭያ አሳይ ሴርያዋ ዶሰና፤ አꬌዳ ኤራንቻቱዋፐካ ዞርያ ኦቼና።

13 ዎዛናይ ናሸትና፥ ሶምኢ ፖኤ፤ ሽን ዎዛናይ ካዮቶፐ፥ ሄ አያናይ መኤ።

14 አኬክያ ዎዛናይ ደእያ አሳይ ኤራተꬃ ኮዬ፤ ሽን ቦዛቱ ባረንቱ ቦዛተꬃን ናሸቲኖ።

15 ህዬሳቱዋ ደኡ ኡባ ጋላስካ ባጸ። ሽን ናሸትያ አሳቱ ኡባ ገደካ ባረንቱ ደኡዋን አሊኖ።

16 ዋላሳይ ደእያ ዎልቃማ አቁዋፐ መꬍና ጎዳ ያሻተꬃይ ደእያ ጉꬃባይ ኬካ።

17 ዋላሳይ ደእያ ሳን ሞꬎ አሹዋ ማናፐ ሲቁ ደእያ ሳን ሳንꬃ ምያዌ ኬካ።

18 ሀንቀትያ አሳይ ዋላሳ ከሴ፤ ሽን ሀንቀታናዉ ኤሌለና አሳይ ዋላሳ እርጽሴ።

19 አዛላ ኡራ መቱ አ ኦግያ ኡባን አጉንꬃ ድርሳ ማላ፤ ሽን ሱረ ኡራ ኦጊ ደምባ።

20 ጭንጫ ናአይ ባረ አዉዋ ናሸቼ፤ ሽን ቦዛ ናአይ ባረ አቶ ካꬌ።

21 ዎዛን ባይና አሳይ ባረ ቦዛተꬃን ናሸቴ፤ ሽን ዎዛናማ አሳይ ልከባ ኦꬄ።

22 ዞረታይ ꬋዮፐ፥ ሀልቼዳዌ ፖለተና፤ ዳሮ ዞርያዋንቱ ደእያ ሳን ሀልቼዳዌ ፖለቴ።

23 ኦሸቴዳዎ ልከ ዛሩዋ ዛርያዌ ሄ ኡራ ናሸቼ፤ ሃሳያ ልከ ዎድያን ሃሳይያዌ አይባ ሎኦቤ!

24 አꬌዳ ኤራንቻይ ቦላዉ ካለꬅያ ደኡዋ ኦግያን ሀመቴፐ አትና፥ ዱገ ዱፉዋ ዎꬅያ ኦግያን ሀመተና።

25 መꬍና ጎዳይ ኦቶራንቻቱዋ ጎልያ ኮላና፤ ሽን አምአቲ ዛዋ ናጌ።

26 መꬍና ጎዳይ ኢታቱዋ ቆፋ ሸነቴ፤ ሽን ጌሻ ቃላይ አ ናሸቼ።

27 ዎርዱዋን ዎꬍያ ደማናዉ ጃምያ አሳይ ባረ ሶ አሳ ቦላ መቱዋ አዬ፤ ሽን ማታይያ እጽያ አሳይ ፓጻ ደአና።

28 ጽሎ አሳይ ሃሳያናፐ ካሰቲደ ቆፔ፤ ሽን ኢታቱዋ እንጻርሳይ ፓላባ ፑልቴ።

29 መꬍና ጎዳይ ኢታቱዋፐ ሃኬ፤ ሽን ጽሎቱዋ ዎሳ ስሴ።

30 ፓሽኪደ ጼልያ ጼላይ ዎዛና ናሸቼ፤ ምሽራቹዋ ኦዱካ ቦላ ፓꬄ።

31 ደኡዋ እምያ ዞርያ ስስያ አሳይ አꬌዳ ኤራንቻቱዋና እትፐ ደአና።

32 ሴራ እጽያ አሳይ ባረና ቆሄ፤ ሽን ሴራ አክያ አሳይ አኬካ ደሜ።

33 መꬍና ጎዳዉ ያይያዌ አሳ አꬌዳ ኤራተꬃ ታማርሴ፤ ቦንቼታና ኮዬዳ አሳይ ኮይሮ ባረና ካዉሻናዉ ኮሼ።