1 አሳይ ባረ ዎዛናን ሀልቼ፤ ሽን ልከ ዛሩ መꬍና ጎዳፐ ቤቴ።

2 አሳይ ኦꬅያ ኦሱዋ ኡባይ አዉ ልከ ማላቴ፤ ሽን መꬍና ጎዳይ ኮይሮ ደንዱዋ ቆፋ ይግ ጼሌ።

3 ነ ኦꬅያዋ ኡባ ሀዳራ መꬍና ጎዳዉ እማ፤ ያቶፐ፥ ኔን ሀልቼዳዌ ፖለታና።

4 መꬍና ጎዳይ መꬌዳዋ ኡባ ባረ ሀልቾ መꬌዳ፤ ሀንንቶካ ማካላንቻቱዋ ዉርሰꬃይ ባየꬃ።

5 መꬍና ጎዳይ ኦቶረትያ ኡባ ሸነቴ፤ ኡንቱንቱ ሙረተናን አትክኖ።

6 አገና ሲቁዋንነ አማነትያዋን ናጋራይ አቶ ጌተቴ፤ አሳይ መꬍና ጎዳዉ ያይያዋን ኢታባ ኦናን ናገቴ።

7 አሳ ሀመታይ መꬍና ጎዳ ናሸችያዋ ግዶፐ፥ ሄ ኡራዉ ባረ ሞርከቱዋናካ ሳሮ ደአናዳን፥ ጾሳይ ኦꬄ።

8 ጽሎተꬃን ቤትያ ጉꬃባይ ዎርዱዋን ደምያ ዳሮ ዎꬍያፐ ኬካ።

9 አሳይ ባረ ዎዛናን ባረ ኦꬃናባ ሀልቼ፤ ሽን ሀልቹ መꬍና ጎዳይ ማድና ፖለቴ።

10 ካቲ ጾሳፐ አኬዳ ማታን ፕርዴ፤ ፕርዲደ እ ባለና።

11 ሚዛናቱነ ማክያ ሚሻቱ አማንꬅያዋንታ ግዳናዳን፥ መꬍና ጎዳይ ኮዬ፤ ዛልእያዋ ኡባን ጭሙ ደኤናዳን ኮዬ።

12 ካተቱ ባይዙዋ ኦሱዋ ሸነቲኖ፤ አያዉ ጎፐ፥ ኡንቱንቱ ካዉተꬃ አራታይ ጽሎተꬃን ኤቄ።

13 ካተቱ ጽሎ እንጻርሳን ናሸቲኖ፤ ቱሙዋ ሃሳይያዋንታካ ዶሲኖ።

14 ካትያ ሀንቁ ሀይቁዋ ኪታንቻ ማላ፤ ሽን አꬌዳ ኤራንቻ አሳይ ሀንቁዋ እርጽሳናዉ አዉዳሼ።

15 ካትያ ሶምኢ ፓሽኮፐ፥ ሄዌ ስም ደኡዋ። እ ናሽያዌ ባꬌሳ እራ አህያ ሻርያ ማላ።

16 አꬌዳ ኤራተꬃ ደምያዌ ዎርቃ ደምያዋፐ ኬካ፤ አኬካ ደምያዌ ብራ ደምያዋፐካ አꬌ።

17 ሱረቱ ብያ ኦጊ ኢታይ ደኢያሳፐ ሃኩዋና አꬄ፤ ባረ ሄመታ ናግያ ኡራይ ባረ ሸምፑዋ ናጌ።

18 ኦቶሩዋ ጌዱዋ ባሻይ ካሌ፤ አዩዋ ጌዱዋካ ኩንደꬃይ ካሌ።

19 አይያዋንቱና ዙፐቲደ፥ ኦሞዱዋ ሻክ አካናፐ አሽከ ግዲደ፥ ህዬሲደ ደእያዌ ኬካ።

20 መꬍና ጎዳ ቃላ ሎይꬂደ ሀይዝያ ኡራዉ እ ኦꬅያዌ ኡባይ እንጀታና፤ ጾሳን አማነትያ ኡራይ አንጀቴዳዋ።

21 ባረ ቆፋን አꬌዳ ኤራንቻ ግዴዳ አሳይ አኬካንቻ ጌተቴ፤ ሎኦ ቃላይ ኤራተꬃ ጉጄ።

22 ጭንጫ ኡራዉ ኤራተꬃይ ደኡዋ ፑልቱዋ ማላ፤ ሽን ቦዛቱዋ ሴርያዌ ጮ ዎድያ ዉርስያዋ።

23 አꬌዳ ኤራንቻ አሳይ ሃሳያናፐ ካሰቲደ ቆፔ፤ አሳይ አክያ ሃሳያ ሃሳዬ።

24 ሎኦ ቃላይ ኤሳ እልሉዋዳን ማልኤ፤ ቦላካ ማዴነ ፓꬄ።

25 አሳዉ ሱረ ማላትያ ኦጊ ደኤ፤ ሽን ዉርሰꬃን ሀይቆ ጋꬄ።ሌም. 14:12

26 ኮሻይ አሳይ ምኒደ ኦꬃናዳን ደንꬄ።

27 ኢታ አሳይ ኢታባ ሀልቼ፤ አ ሃሳያይካ ጹግያ ታማ ማላ።

28 ጌላ አሳይ ዋላሳ ደንꬄ፤ ዝግርያ አሳይ አማነትያ ላገቱዋ ሻኬ።

29 ማካላ አሳይ ባረ ሾሩዋ ጭሜ፤ ሎኦ ግደና ኦግያዉ እ አ ካለꬄ።

30 ባረ አይፍያ ስምእያ አሳይ ጌላባ ቆፔ፤ ባረ መተርሻ ሳኢደ ማንድያ አሳይ ኢታባ ፖሌ።

31 ፑሉሜዳ ሁጲ ቦንቾ ካላቻ፤ ሄዌካ ቤትያዌ ጽሎ ደኡዋ ደእና።

32 ዎልቃማ አሳ ግድያዋፐ፥ ሀንቀታናዉ ኤሌለና አሳ ግድያዌ ሎአ፤ ዳሮ ካታማቱዋ ኦሊደ ኦይቂያዋፐ፥ አሳይ ባረ ሁጲያ ሞድያዌ አꬌ።

33 አሳይ ሳማ የጌ፤ ሽን መꬍና ጎዳይ ኡባባ ዉርሰꬃ ቃቼ።