1 ዋላሳይ ደእያ ሳን ደእያ ዎልቃማ ግብራፐ ሳሩነ ዎፓይ ደእያ ሳን መላ ኡክꬃ ፖቁዋ ምያዌ ኬካ።

2 ጭንጫ ቆማይ ባረ ጎዳ ናኣ ፓና ላፋ ሞዴ፤ ያቲደ እሻቱዋና እትፐ ላቴ።

3 ዎርቃይነ ብራይ ታማን ፓጨትያዋዳን፥ መꬍና ጎዳይ አሳ ዎዛና ፓጬ።

4 ኢታ አሳይ ኢታ ኡራ ሃሳያ ስሴ፤ ዎርዳንቻይካ ማካላ ኦዱዋ ሀይዜ።

5 ህዬሳቱዋ ቦላ ቅሊጭያ አሳይ ኡንቱንታ መꬌዳ ጾሳ ቦሬ፤ ሀራ አሳ ጋክያ መቱዋን ናሸትያ አሳይ ሙረተናን አተና።

6 ናናቱዋ ናናቱ ጭሜዳ አሳቶ ካላቻ፤ አዎቱነ አየቱ ባረንቱ ናናቶ ቦንቾ።

7 ዳሮ ሎኦ ሃሳያይ ቦዛ ኡራዉ ጊገና፤ ሄዋፐካ አꬉዋ ዎርዱዋ ሃሳያይ አሳ ሞድያዎ ጊገና።

8 ማታይያ እምያዎ ማታዪ ብታ ማላ፤ እ ስሜዳ ሳኣ ኡባይ አዉ እንጀቴ።

9 ናቀቲደ ባረ ናቁዋ ገንꬅያ ኡራይ ሲቁዋ ኮዬ፤ ሽን የዉዋ ዛር ዛሪደ ዎጭያ ኡራይ፥ አማነትያ ላገቱዋ ሻኬ።

10 ቦዛይ ጼቱ ገደ ልሱዋን ሾጭና ኤርያዋፐ አኬካይ ደእያ አሳይ ጮ ሴርና ኤራይ አꬌ።

11 ኢታ አሳይ ማካላባ ጻላላ ኮዬ፤ ሄዋ ድራዉ፥ መቀꬅ ባይና ካፑ አ ቦላ ኪተታና።

12 ቦዛተꬃይ ኦይቄዳ ኡራና ጋከትያዋፐ ማራቱዋ ቦንቂ አክ ድጌዳ ማሀትና ጋከትያዌ ኬካ።

13 ሎኡዋ ኦꬄዳዋ ኩሽያ ኢታ ዛርያ ኡራዉ ኢታይ አ ሶፐ ኡባካ ክቼና።

14 ዋላሳይ ዶሚደ፥ ዜሩዋ ꬉስያ ሃꬃ ማላ፤ ሄዋ ድራዉ፥ ዋላሳፐ ካሰታደ ፓሉምያ አጋ።

15 ናጋራንቻ ጽልስያዌነ ጽሉዋ ቦላ ፕርድያዌ ኡንቱንቱ ላኡካ መꬍና ጎዳ ሸነይያ ኦሱዋ።

16 አኬካካ ደማናዉ አሙ አዉ ባይናን ደእሽን፥ ቦዛ ኩሽያን ደእያ ሚሻይ አ አያ ማዳነ?

17 ላጊ ኡባ ዎደካ ሲቄ፤ እሻይካ መቱዋ ዎደ ማዳናዉ የለቴ።

18 አኬካይ ፓጬዳ አሳይ ኤረና ኡራ አጩዋ ጭጋናዉ ዋስያ ገሌ።

19 ዋላሳ ዶስያ አሳይ ናጋራ ዶሴ፤ ኡባ ገደ ጬቀትያ አሳይ ባየꬃ ባረ ቦላ ጼሴ።

20 ጌላ ቆፋይ ደእያ አሳይ ሎኦባ ደመና፤ ጭምያዋ ሃሳይያ አሳይካ መቱዋን ገሌ።

21 ቦዛ ናኣ የሌዳ አዉ ካዮቴ፤ ቦዛ ናኣ አዎ ናሸቻይ ባዋ።

22 ዎዛናይ ናሸትያዌ አሳዉ ሎኦ ꬋለ፤ ሽን ካዮትያ አያናይ አሳዉ ዎልቃ ꬋይሴ።

23 ኢታ አሳይ ፕርዳ ጌላያናዉ ጌማን ማታይያ አኬ።

24 አኬካይ ደእያ ኡራይ አꬌዳ ኤራተꬃ ስንꬃን ዎꬂደ ቤ፤ ሽን ቦዛ አይፊ ቢታ ሳኣ ዩሹዋ ዩዪደ ጼሌ።

25 ቦዛ ናአይ ባረ አዉዋ ካዮዬ፤ ባረና የሌዳ አቶካ ዝልእሴ።

26 ጽሎ አሳ ሙርያዌ፥ ሱረ አሳካ ደችያዌ ሎአ ግደና።

27 አማሬኤዳ ቃላ ሃሳይያ አሳይ ኤራንቻ፤ ዎፓ አያናይ ደእያ አሳይካ አኬካንቻ።

28 ቦዛ ኡራይ ጮኡ ጎፐነ ባረ ዶና ባሮፐ፥ ኤራንቻ ማላቴ።