1 ሻከታናዉ ኮይያ አሳይ ባረ አሙዋ ካሌ፤ ሎኦ ኤራ ኡባካ ጳልቄ።

2 ቦዛይ ባረ ቆፋ ቆንጭሳናዋ ጻላላ ዶስያዋፐ አትና፥ ሀራ አሳፐ ኤራ አካናዉ ዶሰና።

3 ኢታተꬃይ ይያ ዎደ፥ ካꬊ፥ ካዉሻይነ ዬላይ አ ካሊደ ይ አጊኖ።

4 አሳ ዶናፐ ከስያ ሃሳያይ ጪሞ ሃꬃ ማላ፤ አꬌዳ ኤራተꬃ ፑልቱካ ጎግያ ሃꬃ ማላ።

5 ባይዛንቻ ማዲደ፥ ጽሉዋ ፕርዳ ጌላይያዌ ሎአ ግደና።

6 ቦዛ አሳይ ባረ ሃሳያን ዋላሳ ደንꬄ፤ አ ዶናፐ ከስያ ቃላይ አ ቦላ ጻምኣ ጼሴ።

7 ቦዛ አሳይ፥ ሃሳዪደ ባረና ቆሄ፤ አ ሃሳያይ ግትያ ግዲደ፥ አ ኦይቄ።

8 ዝግርሳ ቃላይ ማልኦ ቁማ ማላ፤ ናሸቺደ ዱገ ጋንጅያ ጋኬ።

9 ባረ ኦꬅያ ኦሱዋን አዛልያ አሳይ ባይዝያ ኡራፐ አይነ ዱማተና።

10 መꬍና ጎዳ ሱንꬃይ ምኖ ግምቢያ ማላ፤ ጽሎ አሳይ ያ ዎጺደ ሳሮ አታና።

11 ሽን ዱረ አሳቶ ኡንቱንቱ ዱረተꬃይ ዩሹ ግምበቴዳ ካታማ ማላ፤ ኡንቱንቱ ቆፋን ኡንቱንቱ ዱረተꬃይ ምኖ ድርሳዳን ኡንቱንታ ናግያዋ ማላቴ።

12 አሳይ ኩንዳናፐ ካሰ አ ዎዛናይ ኦቶረቴ፤ ቦንቼትያዋፐካ ባረ ሁጲያ ዝቂ ኦꬅያዌ ስንꬃቴ።

13 ስሰናን ደኢድ ዛርያዌ፥ ሄዌ ሄ ኡራዉ ቦዛተꬃነ ዬላ።

14 አሳ አያናይ ሀርግያ ዳንዳያናዳን ማዴ፤ ሽን አያናይ መኤረት ክቾፐ፥ አ ኦን ዳንዳያኔ?

15 አኬካንቻ አሳቱ ታማራናዉ ሎይꬅ ኮዪኖ፤ አꬌዳ ኤራይ ደእያዋካ ሀይዚኖ።

16 እምያዌ እምያዎ ኦግያ ዶዬ፤ ዎልቃማ አሳናካ ኤርሴ።

17 ካሰቲደ ዳናን ሞትያ ኡራይ ባልጋራይ ዪደ አ ኦቻና ጋካናዉ፥ ኡባ ገደካ ሄ ኡራይ ጽሉዋ ማላቴ።

18 ሳማ የግያዌ ፓሉምያ ተኤ፤ ላኡ ዎልቃማ ባልጋራቱዋካ ሻኬ።

19 ናቀቴዳ እሻይ ግምበቴዳ ካታማፐ አꬊደ ምኔ፤ አ ፓሉሚካ ብራታ ጎርዱዋ ማላ።

20 ባረ ዶናን ሃሳዬዳዋፐ አሳይ ባረ ጋንጅያ ኩንꬄ፤ ባረ እንጻርሳፐ ከሴዳዋን ካሌ።

21 ኔን ሃሳዬዳዌ ኔና ዎꬄ ዎይ ዎꬌ፤ ሄዋ ድራዉ፥ ኔን ነ ሃሳያ ጋሱዋን ይያዋ አካናዉ ደኣሳ።

22 ማቻቶ ደሜዳ አሳይ ሎኦባ ደሜዳ፤ ሄ ኡራይ መꬍና ጎዳንካ ናሸቴ።

23 ህዬሳ አሳይ አዉዳሺደ ሃሳዬ፤ ሽን ዱሪ ፔኑቄቲደ ዛሬ።

24 ዳሮ ላጊ ደእያ አሳይ ꬋያና፤ ሽን እሻፐ አꬊደ አማንꬅያ ላጊ ደኤ።