1 ዎርዶ ሃሳያ ሃሳይያ ቦዛፐ ባረ ደኡዋን ቶሺ ባይና ህዬሳ አሳይ ኬካ።

2 ኤር ባይና ሴላይ ሎአ ግደና፤ ሀመቲደ ኤሌልያ ኡራይካ ዎራ ቤ።

3 እት እት አሳይ ባረ ቦዛተꬃን ባረ ደኡዋ ባይዜ፤ ያቲደ ቃይ መꬍና ጎዳ ቦላ ይሎቴ።

4 ዱረተꬃይ ዳሮ ላገቱዋ ጉጄ፤ ሽን ህዬሳተꬃይ ደእያ ላገቱዋካ ዱꬄ።

5 ዎርዶ ማርካይ ሙረተናን ቤና፤ ዎርዱዋ ሃሳይያዋንቱካ ከስ አክክኖ።

6 ዳሮ አሳይ ሞድያ አሳ ስንꬃ ኮዬ፤ ጮ እምያ ኡራና አሳይ ኡባይ ዳቦቴ።

7 ህዬሳ አሳ አ እሻቱ ኡባይ እጺኖ፤ ሄዋፐካ አꬉዋ አ ላገቱ አፐ ሃኪኖ፤ እ ኡንቱንታ አዉዳሺደ ካልናካ፥ ኡንቱንቱ አ ጋꬅ ኦይꬅክኖ።

8 አꬌዳ ኤራተꬃ ደምያዌ ባረና ሲቄ፤ አኬካ ካርህ ኦꬅ ኦይቂያዌ ሎኦባ ደሜ።

9 ዎርዶ ማርካይ ሙረተናን አተና፤ ዎርዱዋ ሃሳይያዌካ ꬋያና።

10 ቦዛ ኡራዉ እሻሎ ደኡ በሰና፤ ሄዋፐካ አይሊ ካፖቱዋ ሞድያዌ ኢታ ዳሬ።

11 አꬌዳ ኤራተꬃይ አሳዉ ዳንዳያ እሜ፤ ባይዜዳ ኡራዉ አቶ ግያዌካ ቦንችሴ።

12 ካትያ ሀንቁ ጋሙዋ ጉዱዋ ማላ፤ ሽን አ ሳባይ ማታ አጭስያ ከተርሳ ማላ።

13 ቦዛ ናአይ ባረ አዉዋ ꬋይሴ፤ ዋላሳንቻ ማቻታካ ጎሊ ኡባ ገደ ጾክያ ጾኩዋ ማላ።

14 እት አሳይ ጎልያነ ማጹዋ ባረ አዉዋፐ ላታናዉ ዳንዳዬ፤ ሽን አኬካንቻ ማቻቶ መꬍና ጎዳይ እሜ።

15 ጮ ዞልፓካትያ ኡራዉ ገምእሹ ዬ፤ ኦሱዋ ኦና አሳይ ኮሻቴ።

16 አዛዙዋ ናጊደ ኦꬅያ አሳይ፥ ባረ ሸምፑዋ ናጌ፤ ሽን ሸነኮ ግያ አሳይ ሀይቄ።

17 ህዬሳዉ ኬክያ አሳይ መꬍና ጎዳዉ ታልኤ፤ እ ሄ ሎኦ ኦሱዋ አጩዋ ጭጌ።

18 ስምያ ህዶታይ ደእሺና፥ ነ ናናቱዋ ሴራ፤ ሴራና ꬋዮፐ፥ ኔን ኡንቱንታ ባይዛዳ።

19 ሀንቁዋ ሱልያ አሳይ ባረ ጋትያ አኮ፤ አ አጋ፤ ኔን አ አሽያዋ ግዶፐ፥ ሀራቱዋካ ኔን አ ሄዋዳን ኦꬃናዌ አተና።

20 ዞርያ ስሳ፤ ትምርትያካ አካ። ያቶፐ፥ ኔን ዉርሰꬃን አꬌዳ ኤራንቻ ግዳናሳ።

21 አሳይ ዳሮባ ሀልቼ፤ ሽን መꬍና ጎዳይ ጌዳዌ ፖለቴ።

22 አሳፐ ኮየትያዌ አገና ሲቁዋ፤ ዎርዳንቻ ግዳናፐ ህዬሳ ግድያዌ ኬካ።

23 መꬍና ጎዳዉ ያይያዌ ደኦ ካለꬄ፤ አዉ ያይያ አሳይ ካሊደ ደኤ፤ ኢታባይካ አ ቦቼና።

24 እት እት አሳይ ዳሮ አዛላ፤ ዎጽያን ቱሼዳ ሶሉዋካ ፑደ ባራናዉ ዋየቴ።

25 ኔን ቅሊጭያዋ ሾጮፐ፥ አኬካይ ፓጬዳዌ ጭንጫተꬃ ታማራና፤ አኬካንቻ አሳ ኔን ሴሮፐ፥ እ ኤራተꬃ ደማና።

26 ባረ አዉዋ ቦንቂያ ናአይ፥ ባረ አቶካ ሶፐ ከሲደ የደርስያ ናአይ፥ ሄ ናአይ ዬላነ ካዉሻ አህያ ናኣ።

27 ታ ናአዉ፥ ኔን ዞርያ ስስያዋ አጌዳዋ ግዶፐ፥ ኤራዉ ዞክያ ዛራዳ።

28 ዎርዶ ማርካይ ሱረ ፕርዳ ቦላ ቅሊጬ፤ ኢታ አሳ ዶናይ ኢታተꬃ ጉጂደ ምቴ።

29 ቅሊጭያዋንቶ ፕርዳይ፥ ቦዛቶካ ዋꬋይ ኮሼ።