1 ዳሮ ማꬆይያ ኡሻ ኡሽያዌ ዳሮ ብድሴነ ዋላሴ፤ ማꬆትያ አሳይ ዎዛናይ ፓጬዳ አሳ።

2 ካትያ ሀንቁ ጋሙዋ ጉደꬃ ማላ፤ አ ይሎይያ አሳይ ባረ ሸምፑዋ ቦላ ፕርዴ።

3 ፓሉምያፐ ጋጻን ደእያዌ አዎ ቦንቾ፤ ሽን ቦዛ አሳይ ኡባይ ዋላቀታናዉ ኤሌሌ።

4 አዛላ ጎሻንቻይ ዎድያ ናጊደ ጎሸና፤ ሄዋ ድራዉ፥ ካꬃ ጫክያ ዎደ እ ዎሴ፤ ሽን አያካ ደመና።

5 አሳ ዎዛና ሀልቹ ጪሞ ኦላ ግዶን ደእያ ሃꬃ ማላ፤ ሽን ዎዛናማ አሳይ ሄዋ ዱቂደ ከሴ።

6 ዳሮ አሳቱ ባረንቱ ኬካተꬃ ኦዲኖ፤ ሽን ቱሙ አማነትያ አሳ ደማናዌ ኦኔ?

7 ጽሎ አሳይ ቶሺ ባይና ደኡዋ ደኤ፤ አ ካሊደ፥ አ ናናቱካ አንጀቴዳዋንታ።

8 ካቲ ፕርዳናዉ ባረ ካዉተꬃ አራታን ኡቴዳ ዎደ፥ ኢታ ኡባ ባረ አይፍያን ሀርቂደ ከሴ።

9 “ታ ዎዛና ጌሻድ፤ ታናን ናጋርካ ባዋ” ያጋናዉ ዳንዳይያ አሳይ ደአኔሻ?

10 መꬍና ጎዳይ ዎርዱዋ ሚዛናን ይግያዋንታነ ልከ ግደናባን ማክያዋንታ እጼ።

11 ናአይ ጌሻነ ሱረ ግድያዌ እ ኦꬅያ ኦሱዋን ኤረቴ።

12 ስስያ ሀይꬃነ ጼልያ አይፍያነ፥ ኡንቱንታ ላኡዋካ መꬍና ጎዳይ መꬌዳ።

13 ገምእሹዋን ነ ዎድያ ዉርሶፓ፤ ኔን ህዬሳና። ቤጎታ፤ ያቶፐ፥ ኔን ካꬃ ካላና።

14 ሻምያ አሳይ፥ “ቆሄ! ቆሄ!” ያጌ፤ ሽን ቤዳዋፐ ጉይያን፥ “ገሉዋን ሻማድ” ያጊደ ጬቀቴ።

15 ኤራይ ኩሜዳ ሃሳያይ ዎርቃፐካ እንቁዋ ግያ ዳሮ አልኦ ሹቻፐካ አꬌዳ አልኦባ።

16 ኤረና አሳዉ ዋስያ ገልያ ኡራ ማዩዋ ቃር አክተ፤ እማꬃ አሳዉ ዋስያ ገልያ ኡራ ማዩዋ ኦይቂተ።

17 ዎርዱዋን ደሜዳ ካꬃይ አሳ ማልኤ፤ ሽን አቅ ከሲደ፥ ዶና ግዶን ሻፍያዳን ሀኔ።

18 ዞርያ አካደ ነ ሀልችያዋ ሀልቻ፤ ዞርያ አከናን ደኣደ ኦላዉ ቦፓ።

19 ዝግርያ አሳይ ጹራ ገንና፤ ሄዋ ድራዉ፥ ኦዳንቻ ኡራና ጋከቶፓ።

20 አሳይ ባረ አዉዋ ዎይ ባረ አቶ ሸቆፐ፥ አ ደኡዋ ጾምፕያ ꬍጵ ጎ ꬉማን ቶአና።

21 ኮይሩዋን ኤለካ ሺቄዳ አቁ ዉርሰꬃን አንጀተና።

22 ነዉ ኢታ ኦꬄዳ ኡራዉ፥ “ታንካ አዉ ኢታ ኦꬃና” ጎፓ፤ መꬍና ጎዳን አማነታደ ናጋ፤ እ ኔና አሻና።

23 መꬍና ጎዳይ ላኡ ቆሞ ሚዛናቱዋ ሸነቴ፤ ዎርዱዋ ሚዛናቱካ አ ናሸችክኖ።

24 አሳይ ባናዉ በስያ ኦግያ መꬍና ጎዳይ ካለꬄ፤ ያትና፥ አሳይ ባረ ደኡዋን ባና ኦግያ ዎቲደ አኬካናዉ ዳንዳዪ?

25 እትባ ኤሌሊደ፥ “ሀዋ ታን ጾሳዉ እማድ” ግ ድግያዌነ ጉየፐ ዝንቆትያዌ፥ ሄዌ አሳ ኦይቂያ ጲረ።

26 አꬌዳ ኤራንቻ ካቲ ማካላንቻቱዋ ሻኪደ ኤሬ፤ እ ኡንቱንታ ቃረተናን ሙሬ።

27 አሳ አያናይ መꬍና ጎዳዉ ጾምፕያ፤ ሄዋ ድራዉ፥ እ ኑ ግዶ አሳተꬃ ኡባ ፕልግ ጼሌ።

28 አገና ሲቁነ አማነትያዌ ካትያ ናጊኖ፤ አ ካዉተꬃ አራታይ አገና ሲቁዋን ምኔ።

29 ያላጋቱዋ ቦንቹ ኡንቱንቱ ዎልቃ፤ ጭማቶካ ኡንቱንቱ ፑሉንꬃይ ኡንቱንቶ ቦንቹዋ።

30 ምኖ ሙሩ ኢታተꬃ ሾዴ፤ ዋꬍያዌ ኢታ ዎዛና ላማናዉ ዳንዳዬ።