1 ካትያ ዎዛናይ መꬍና ጎዳ ኩሽያና፤ እ አ ዎዛና ጎግያ ሃꬃ ዛርያዋዳን፥ ባረ ኮዬዳሳ ዛሬ።

2 አሳይ ኦꬅያዌ ኡባይ እዛዎ ልከ ማላቴ፤ ሽን መꬍና ጎዳይ አ ዎዛና ቆፋ ፓጬ።

3 ያርሹዋ ያርሽያዋፐካ አꬂደ፥ ጽሎባነ ሱረባ ኦꬅያዋ መꬍና ጎዳይ ዶሴ።

4 ኢታቱ ኦቶረትያዋንነ አይያዋን ኤረቲኖ፤ ሄዌካ ናጋራ።

5 ምኖ ኦሳንቻ ሀልቹ ዱረዬ፤ ሽን ኤሌልያ ኡባይ ህዬሳና።

6 ዎርዶቲደ ዳጋዬዳ ዱረታይ ፐንቱዋ ሱሉዋዳን ꬋዬ፤ ሄዋ ኮይያዋንቱ ሀይቁዋ ኮዪኖ።

7 ኢታቱ ሱረባ ኦꬃናዉ እጽያ ድራዉ፥ ኡንቱንቱ ማካላ ኦሱ ኡንቱንታ አኪደ ቤ።

8 ባይዛንቻቱ ጌላ ኦግያን ሀመቲኖ፤ ሽን ጌሻቱ ሱረባ ኦꬂኖ።

9 ዋላቀትያ ማቻትና እት ጎልያን ደእያዋፐ ሄ ጎልያ ካሻን ደእያዌ ኬካ።

10 ኢታቱ ኢታባ ኦꬃናዉ አሞቲኖ፤ ባረንቱ ሾሮቶ ቃረትክኖ።

11 ቅሊጭያዌ ሙረቴዳ ዎደ፥ ዎዛናይ ፓጬዳ ኡራይ አꬌዳ ኤራ ታማሬ፤ ቃይ ዎዛናማ ኡራይ ታማሪደ፥ ኤራ ደሜ።

12 ጽሎ ጾሳይ ኢታቱዋ ሶን ኦሰትያዋ ኡባ በኤ፤ ኡንቱንታ አꬅ የጊደ ꬋይሴ።

13 ህዬሳ ዋሱዋ ስሳናፐ ጊደ፥ ባረ ሀይꬃ ቱጭያ ኡራይ፥ እካ ዋሳና፤ አልያዌ ꬋያና።

14 ጌማን እምያ እሙ ሀንቁዋ ዶሽሴ። አፍላ ግዱዋና እሜዳ ማታዪ ሱሎ ሀንቁዋ እርጽሴ።

15 ሱረ ፕርዳይ ፕርደቴዳ ዎደ፥ ሄዌ ጽሎ ናሸቻ፤ ሽን ኢታ ኦꬅያዋንቶ ዳጋማ።

16 አኬካ ኦግያፐ ሀድሬዳ ኡራ ሀይቁ ናጌ።

17 አꬎ እንጅያን ደአና ግያ ኡራይ ማንቄ፤ ዎይንያ ኤሳነ ዛይትያ ዶስያ አሳይ ዱረተና።

18 እት እት ገደነ ጾሳ አሳቱዋ አሻናዉ ኢታ አሳቱ ሙረቲኖ፤ አማነተና አሳቱካ ሱረ አሳቱዋ ድራዉ ሙረቲኖ።

19 ዋላቀትያነ ይሎትያ ማቻትና ደአናፐ ባዙዋን ደእያዌ ኬካ።

20 ዎዛናማ ኡራ ሶን ማልኦ ቁማይነ ኦይሳይ ምንጀቴ፤ ሽን ቦዛ አሳይ ባረዉ ደእያዋ ኡባ ም ድጌ።

21 ጽሎተꬃነ አገና ሲቁዋ ኮይያ ኡራ ላይꬃይ አዱቄ፤ ቃይ ሄ ኡራይ ጽሎተꬃነ ቦንቹዋ ደሜ።

22 ዎዛናማ አሳይ ዎልቃማ ኦላንቻቱ ደእያ ካታማ ኦሊደ ኦይቄ፤ ኡንቱንቱ አማነቴዳ ምኖ ጌሱዋካ ላሌ።

23 ባረ ዶናነ ባረ እንጻርሳ ናግያ አሳይ ባረና መቱዋፐ ናጌ።

24 ኦቶረትያነ አይያ አሳይ ቅሊጭያዋ ጌተቴ፤ እ ኦቶራንቻ ግዴዳ ድራዉ፥ አሳዉ ቆፐና።

25 አዛላ አሙ ዎꬌ፤ አያዉ ጎፐ፥ እ ኦꬃናዉ ኮየና።

26 አዛላይ ጋላሳ ኩመንꬃ ዳሮባ ደማናዉ አሞቴ፤ ሽን ጽሉ ባረዉ አሸናን እሜ።

27 ጾሳይ ኢታቱዋ ያርሹዋ ሸነቴ፤ ሄዋፐካ ኡንቱንቱ አዉ ኢታ ቆፋን ሺሽያ ያርሹዋ አꬅ ሸነቴ።

28 ዎርዶ ማርካይ ꬋያና፤ ሽን ቆፒደ አኬካን ሃሳይያ ኡራ ሃሳያይ አከታና።

29 ኢታ አሳይ ታዋ ጻላላይ ልከ ጌ፤ ሽን ሱረ አሳይ ዩሽ ቆፔ።

30 አሳይ ባረ አꬌዳ ኤራተꬃን፥ አኬካንነ ዞርያን መꬍና ጎዳና ኤቀታናዉ ዳንዳየና።

31 ኦላዉ ፓራ ኮራናዉ ዳንዳየቴ፤ ሽን ኦላ ጾንስያዌ መꬍና ጎዳ።