1 ሎኦ ሱንꬃይ ዳሮ ዱረተꬃፐ አꬌ፤ ሳበትያዌካ ብራፐነ ዎርቃፐ አꬌ።

2 ዱርያነ ማንቁዋ ኡባካ መꬍና ጎዳይ መꬌዳ፤ ሄዋን ኡንቱንቱ ላኡካ ቃራ።

3 ጭንጫ አሳይ ኢታ በኢደ፥ ቆሰት አꬄ፤ ሽን አኬካይ ፓጬዳ አሳይ መቱዋን ገሊደ ቆሄቴ።

4 ኔን አሽከ ግዶፐነ መꬍና ጎዳዉ ያዮፐ፥ ዱረተꬃ፥ ቦንቹዋነ ደኡዋ ደማና።

5 ኢታ ኡራ ኦግያን አጉንꬃይነ ጲሪ ደኤ፤ ሽን ባረና ናግያ አሳይ ኡንቱንቱፐ ሃኬ።

6 ናአይ ዋኒደ ደአና በስንቶ ታማርሳ፤ ያቶፐ፥ እ ጭሚደካ ሄዋ አገና።

7 ዱሪ ህዬሳ ሞዴ፤ ታልእ አኬዳዌ ታልእያ እሜዳዎ አይለ ግዴ።

8 ናጋራ ዘርያ ኡራይ ዋይያ ጫኬ፤ ሀራቱዋ እ ቱጋይያ ቱጋ ጻምአይ መኤና።

9 ኬካ አሳይ ባረ ቁማፐ ህዬሳዉ ጮ እምያ ድራዉ አንጀታና።

10 ቅሊጭያ አሳ ከሳ ድጎፐ፥ ፓሉሚ፥ ዋላሳይነ ቦሪ ክቻና።

11 ኔን ዎዛና ጌሻተꬃነ ኬካ ሃሳያ ዶሶፐ፥ ካቲ ኔናና ዳቦቴ።

12 መꬍና ጎዳይ ኤረተꬃ ናጌ፤ ሽን ዎርዳንቻቱዋ ቃላ እ አꬅ የጌ።

13 ቦዛ አሳይ፥ “ታን ካረ ከሶፐ፥ ጋሙ ታና ማና፤ ታና ኦግያን አሳይ ዎꬋና” ያጌ።

14 ዎሹምያ ማጫ ምሽራት ዶናይ ጪሞ ኦላ ማላ፤ መꬍና ጎዳይ ሀንቀቴዳ ኡራይ አ ግዶን ኩንዴ።

15 ናኣ ዎዛና አዛላተꬃይ ባቂ ኦይቄ፤ ሽን ቃይጼርያን ሙርያዌ አፐ ሃሴ።

16 ባረዉ ማጹዋ ጉጃና ጊደ፥ ህዬሳ ናቂያዌ ዱርያዉ እሙዋ እምያዌ ላኡካ ህዬሳና።

17 ነ ሀይꬃ ሃ የጋደ፥ አꬌዳ ኤራንቻይ ኦድያዋ ስሳ፤ ነ ዎዛናካ ታ ኤራኮ ዛራ። 18 አያዉ ጎፐ፥ ኡንቱንታ ነ ዎዛናን ዎꬆፐነ ነ ዶናንካ ኡንቱንቱ ኡባ ሀሳዮፐ፥ ኔን ናሸታና። 19 ነ አማኑ መꬍና ጎዳን ግዳና ማላ፥ ታን ኔና ሀች ታማርሳድ። 20 ታን ነዉ ዞሪነ ኤራተꬃይ ደእያ ሀታሙ ሌምሳቱዋ ጻፎዌሽ! 21 ኔና ኪቴዳዎ ኔን ልከ ዛሩዋ ዛራና ማላ፥ ታን ኔና ቱማተꬃ ታማርሳድ።

22 ህዬሳቶ አያይነ ባይና ድራዉ፥ ኡንቱንቱዋ ቦንቆፓ፤ ችሎታንካ መቶታንቻቱዋ ማታ ꬋይሶፓ።

23 አያዉ ጎፐ፥ መꬍና ጎዳይ ኡንቱንቱ ድራዉ ሞተታና፤ ኡንቱንታ ቦንቄዳዋንታካ እ ቦንቃና።

24 ሀንቀትያ ኡራና ላገቶፓ፤ ሀንቀታናዉ ኤሌልያ ኡራናካ ዙፐቶፓ።

25 ኔን አ ሀኑዋ ሜዘቶፐ፥ ጉየፐ አጋናዉ ዳንዳያካ።

26 አሳዉ አጩዋ ታ ቃንጻና ጋደ ዋስያ ገሎፓ።

27 ኔን ቃንጽያዌ ꬋዮፐ፥ ነ ግስያ ሂጻይ አተናን፥ ነዉ ደእያባይ ኡባይ አከታና።

28 ነ ማይዛ አዎቱ ቶኬዳ በን ዛዋ ሾዶፓ።

29 ባረ ኦሱዋ ሎሀተꬃን ኦꬅያ አሳ በኣድ? እ ካተቶ ኦꬄፐ አትና፥ ጮ አሳቶ ኦና።