1 ኔን አሳ ሞድያዋና እትፐ ቁማ ማናዉ ኡቴዳ ዎደ፥ ነ ስንꬃን ደእያዋ ሎይꬃደ አኬካ። 2 ኔን ዳሮ ዮራ አሳ ግዶፐ፥ ናገታ። 3 እ ኔና ፓጫናዉ ዳንዳይያ ድራዉ፥ አꬌዳ ማልኦ ቁማዉ ያዉነቶፓ።

4 ዱረታናዉ ዳቡሮፓ፤ ሄዋ ማላ ኬስያ አጋናዉ ጭንጫ ግዳ። 5 ሄዋ ማላ ዱረተꬃይ ኔን ጼልሽን ꬋያና፤ ቀፍያ ከሲደ አርጋንꬃዋዳን፥ ሳሉዋ ፓላና።

6 ኡዝያ ቁማ ሞፓ፤ አ ማልኦ ቁማካ ማናዉ አሞቶፓ። 7 ማላትሳናዉ እ ኔና፥ “ማ፤ ኡሻ” ያጌፐ አትና፥ አ ዎዛናይ ኔናና ደኤና። 8 ኔን ሜዳ ላፋ ቁማ ጮሻና፤ ነ ጋላታይካ መላ ግዳና።

9 ቦዛዉ ሎኦባ ሃሳዮፓ፤ አያዉ ጎፐ፥ ነ አꬌዳ ኤራ ሃሳያ እ ካꬋና።

10 በን ዛዋ ሾዶፓ፤ ቃይ አዉ ባይና ናናቱዋ ጋድያ ዛዋ ሱጎፓ፤ 11 አያዉ ጎፐ፥ ኡንቱንታ አሽያ ጾሳይ ምኖ፤ እ ኡንቱንቱ ድራዉ ኔናና ሞተታና።

12 ነ አስታማሪ ነዉ ኦድያዋ ሀይዛ፤ ነ ሀይꬃካ ኤራ ቃላኮ ዛራ።

13 ናኣ ሴረናን አጎፓ፤ ኔን አ ቃይጼርያን ዋꬎፐ፥ እ ሀይቀና። 14 ኔን አ ቃይጼርያን ዋꬎፐ፥ አ ሸምፑዋ ሀይቁዋፐ አሻሳ።

15 ታ ናአዉ፥ ኔን ነ ዎዛናን አꬌዳ ኤራንቻ ግዶፐ፥ ታ ዎዛናይካ ናሸታና፤ 16 ነ እንጻርሳይ ሱረባ ሃሳዮፐ፥ ታ ዎዛናይ ናሸቴ።

17 ናጋራንቻቱዋ ቃናቶፓ፤ ሽን ኡባ ገደ መꬍና ጎዳዉ ያይያዋ አጎፓ። 18 ያቶፐ ነዉ ስንꬃናዉ ሳአይ ኬካና፤ ነ ህዶታይካ ꬋየና።

19 ታ ናአዉ፥ ስሳ፤ ዎዛናማ ግዳ፤ ነ ዎዛና ሱረ ኦግያን ዎꬃ። 20 ዳሮ ዎይንያ ኤሳ ኡሽያዋንቱናነ አሹዋ ሙሳዉ ያረትያዋንቱና ዙፐቶፓ፤ 21 አያዉ ጎፐ፥ ማꬆትያዋንቱነ ዮራንቻቱ ማንቃና፤ ገምእሹዋ ዳሩ አሳ ዉሬዳ ጩርቃ ማይዝሴ።

22 ኔና የሌዳ ነ አቡ ኦድያዋ ስሳ፤ ነ አታካ ኤጬዳ ዎደ ካꬎፓ። 23 ቱሙዋ፥ አꬌዳ ኤራተꬃ፥ ትምርትያነ አኬካ ሻማፐ አትና፥ ኡባካ ዛልኦፓ። 24 ጽሎ ናኣ አቡ ሎይꬅ ናሸታና፤ ዎዛናማ ናኣ የሌዳ ኡራይካ አን ሀሹ ጋና። 25 ነ አቡነ ነ አታ ናሸትኖ፤ ኔና የሌዳናካ ሀሹ ጉ።

26 ታ ናአዉ፥ ታ ዞርያ ሀይዛ፤ ታን ሀንያዋዳን ሀና። 27 አያዉ ጎፐ፥ ዎሹምያ ምሽራታ ጪሞ ኦላ ማላ፤ ጫራቱዋ ኦይቂያ ማቻታካ ኡንአ ኦላ ማላ። 28 አ ፓኑዋዳን ቆሰታ ኡታደ ናጋዉ፤ አማነተና አቱማ አሳ አሳ ግዶን ዳርሳዉ።

29 “ዎ!” ግያ ዋሱ ኦሴ? ካዩ ኦሴ? ዋላሳይ ኦሴ? ዙዙንꬃይ ኦሴ? ጋሱ ባይናን ማዱጽያዌ ኦሴ? አይፊ ዞእያዌ ኦሴ? 30 ዎይንያ ኤሳ ኡሺደ ጋምእያዋንቱሳ ግደኔ? ዋላከቴዳ ዎይንያ ኤሳ ኡሽ ኡሽ በእያዋንቱሳ ግደኔ? 31 ዎይንያ ኤሳይ ዞኤዳ ዎደ፥ አ ማላይ ብርልያ ግዶን ጶልያ ዎደ፥ ኡሽሽን ዋላላቲደ ገልያ ዎደ፥ አ ጼሎፓ። 32 ዉርሰꬃን እ ሾሻዳን ዱኬ፤ ሙሉሙቀ ሾሻዳንካ ባረ ይሻ ፑኬ። 33 ነ አይፊ በእ ኤረናዋ በአና፤ ነ ዎዛናይካ ሱረ ቆፓናዉነ ሃሳያናዉ ዳንዳየና። 34 ኔን አባ ግዶን ሆቢ ቃꬅያ ማርካብያ ጼራን ግሴዳ ኡራ ማላ ግዳና። 35 ኔን፥ “ኡንቱንቱ ታና ደቼድኖ፤ ሽን ታን ቆሄታበይከ። ኡንቱንቱ ታና ዋꬌድኖ፤ ሽን ታዉ ኤረትቤና። ሀራ ኡሻ ኡሻናዉ ታን አዉደ ደንዳንድታሻ?” ያጋና።