1 ታ ናአዉ፥ ኢታ አሳቱዋ ማላ ግዳርክታሻ ጎፓ፤ ኡንቱንቱና ዳቦታናዉካ አሞቶፓ፤ 2 አያዉ ጎፐ፥ ኡንቱንቱ ኡባ ገደ ማካላባ ማቀቲኖ፤ ባረንቱ እንጻርሳን ገንያባ ሃሳዪኖ።

3 ጎሊ አꬌዳ ኤራተꬃን ኬጸቴ፤ አኬካንካ ምኔ። 4 ኤራይ ደኦፐ፥ ቆልኡ አልኦባንነ ሎኦባን ኡባን ኩሜ።

5 ዎዛናማ ኡራዉ ዎልቃማ ዎልቃይ ደኤ፤ ኤራንቻ አሳይካ ምኖተꬃ ጉጄ። 6 ኔን ኦላዉ ከሳናፐ ካሰታደ ሀልቹዋ ሀልቻናዉ ኮሼ፤ ዳሮ ዞርያዋንቱ ዞርያን ጾኑ ቤቴ።

7 ቦዛይ አꬌዳ ኤራተꬃ አኬካናዉ ዳንዳየና፤ ሀቃ ያአንካ ኦድያዌ አይነ ባዋ።

8 ኢታ ኦꬃናዉ ሀልችያ ኡራይ ገናንቻ ጌተታና። 9 ቦዛተꬃ ቆፋይ ናጋራ፤ አሳይ ቅሊጭያዋ እጼ።

10 ኔን መቱዋ ጋላስ ላፎፐ፥ ነ ዎልቃይ ጉꬃ ግያዋ።

11 ሀይቃናዉ በሰናን፥ ሀይቆ ፕርዲደ አፍያዋንታ አሻ፤ ዎꬋና ሀንያ ዎደ ጮኡ ጋደ ጼሎፓ። 12 ኔን፥ “ኑን ሀዋ ኤርበይኮ” ያጎፐ፥ ዎዛና ኤርያዌ እ በኤኔ? ነ ደኡዋ ናግያዌ ኤረኔ? አሳ ኡባዉ አ ኦሱዋ ኦሱዋዳን ዛረኔ?

13 ታ ናአዉ፥ ኤሳ ማ፤ ኤሳይ ሎአ። ኤሳ እልሉ ጎጎጩዋን ማልኤ። 14 አꬌዳ ኤራተꬃይካ ሄዋ ማላ፤ እ ነ ሸምፖ ማልኦ ግድያዋ ኤራ። ኔን አ ደምያዋ ግዶፐ፥ ስንꬃና ያና ህዶታይ ነዋ፤ ኔን አካና ጋደ ህዶታን ናግያዌካ ꬋየና።

15 ጽሉዋ ጎልያነ ማጹዋ ቦንቃናዉ ቆፕያ ኢታ አሳዳን ሀኖፓ። 16 ጽሎ አሳይ ላፑን ገደ ኩንዶፐካ ደንዴ፤ ሽን ኢታቱ መቱዋን ꬋያና።

17 ነ ሞርኪ ኩንድያ ዎደ ናሸቶፓ፤ እ ꬉበትያ ዎደካ፥ “ሀሹ!” ጎፓ። 18 ኔን ናሸቶፐ፥ መꬍና ጎዳይ ሄዋ በኢደ ናሸተና፤ አ ሀንቀትያዋካ አግ አጋና።

19 ኢታ ኦꬅያዋንቱ ድራዉ ህርጎፓ፤ ኡንቱንቱ ማላ ግዳርክታሻ ጎፓ። 20 አያዉ ጎፐ፥ ኢታ ኡራዉ ስንꬃና ያና ህዶታይ ባዋ፤ ኢታቱዋ ጾምፒካ ቶአና።

21 ታ ናአዉ፥ መꬍና ጎዳዉነ ካትያዉ ያያ፤ ኡንቱንቶ ማካልያዋንቱናካ ዙፐቶፓ። 22 አያዉ ጎፐ፥ ሄዋ ማላ አሳቱዋ ቆፐና መቱ ጋኬ፤ ካትያፐነ ጾሳፐ ያና መቱዋ ኦኔ ኤርያዌ?

ፕርዲደ ማድያዌ ሎአ ግደና። 24 ባይዛንቻ፥ “ኔን ባይዛባካ” ያግያ ዳና አሳይ ሸቃና፤ ካዉተꬃቱካ አ እጻና። 25 ባይዛንቻ ሙርያዋንቱ ሎይꬅ ናሸታናነ አንጀታና።

26 ሱረ ዛሩዋ ዛርያዌ ዳቦቶ ማላታ ማላ።

27 ካሰታደ ነ ጋድያ ኦꬃ፤ ካꬃካ ዘራ፤ ሄዋፐ ጉይያን፥ ነ ጎልያ ኬጻ።

28 ነ ሾሩዋ ቦላ ጋሱ ባይናን ማርካቶፓ፤ ነ ዶናንካ ጭሞፓ። 29 “እ ታዉ ኦꬄዳዋዳን፥ ታን አዉ ኦꬃና፤ ታን አዉ አ ኦሱዋ ኩሽያ ዛራና” ያጎፓ።

30 ታን እት ጋላስ፥ እት አዛላነ አኬካይ ፓጬዳ ብታንያ ጋደን ደእያ ዎይንያ ቱራ ግዱዋና አꬋድ። 31 አꬍያ ዎደ፥ አጉንꬃይነ ሻራፋይ ጎዝ ዎꬄዳ፤ ዩሹዋን ሹቻ ግምቢካ ኮለት ክቼዳ። 32 ታን አ በኤዳ ዎደ፥ ቆፓድ፤ ታን በኤዳዋፐ ትምርትያ ታማራድ። 33 ኔን ጉꬃ ልጵ ጋ፤ ጉꬃ ገምእሻ፤ ነ ኩሽያካ ሺሻደ ጉꬃ ሸምፓ አካ። ሌም. 6:10-11 34 ሄዋፐ ጉይያን፥ ህዬሳተꬃይ ፓኑዋዳን ያና፤ ፓጫይካ ኦላ ሚሻ ኦይቄዳ አሳዳን ፑቱ ጋና።