1 ሀዋንቱካ ቃይ፥ ይሁዳ ካትያ ህዝቂያሳ አሳቱ ዱቂደ ጻፌዳ ሶሎሞና ሌምሳቱዋ።

2 ጹራ ገንꬅያዌ ጾሳዉ ቦንቾ፤ ጹራ ፕልጊደ ከስያዌ ቃይ ካተቶ ቦንቾ።

3 ሳሎቱዋ ꬎቃተꬃነ ሳኣ ጪማተꬃ አሳይ ጋከናዋዳን፥ ካተቱዋ ቆፋካ አሳይ ኤራናዉ ዳንዳየና።

4 ብራፐ ቅታ ድጋ፤ ሄዋፐ ጉይያን፥ ዎጋጪ ቆጺደ፥ ሎኦባ ከሳና።

5 ካትያ ስንꬃፐ ኢታቱዋ ድጋ፤ ያቶፐ፥ አ ካዉተꬃ አራታይ ጽሎተꬃን ምን ኤቃና።

6 ካትያ ስንꬃ አꬍያ ዎደ ጬቀቶፓ፤ ዎልቃማ አሳቱዋፐ ግዱዋን ሳኣ ኮዮፓ። ሉቃሳ 14:8-10 7 ኔፐ ግታትያ አሳዉ ሳኣ እማናዉ ካፑ ኔና ደንꬅና ካዉሽያዋፐ፥ ካፑ ኔና፥ “ሀዋኮ ꬎቁ ጋ” ግያዌ ነዉ ኬካ።

8 ነ አይፍያን በኤዳዋ ማርካታናዉ ዳባባ ባናዉ ኤሌሎፓ፤ አያዉ ጎፐ፥ ኔን ማርካታ ስምና፥ ሀራ አሳይ ነ ማርካተꬃይ ባላ ግድያዋ ቆንጭሶፐ፥ ኔን ዬላታና። 9 ኔፐነ ነ ሾሩዋፐ ግዱዋን ፓሉሚ መቶፐ፥ አናና ሃሳያደ ነ ፓሉምያ ዉርሳ። ሀራ አሳ ጹራ ቆንጭሶፓ። 10 ሄዌ ꬋዮፐ፥ ኔን ኦድያዋ ስሴዳ አሳይ ኔና ካዉሻና፤ ሄዋን ነ ሱንꬃይ ላኤንꬆ ስመናዳን ባያና።

11 ኮሽያ ዎድያን ሃሳየቴዳ ልከ ቃላይ ብራ ቦላ ትጌዳ ዎርቃ አሌቁዋ ማላ።

12 ሀይዝያ ኡራ ኤራንቻ አሳይ ዞርያ ዞሪ ሀይꬃን ዎꬄዳ ዎርቃ ዎይ ጌሻ ዎርቃፐ ኦꬄዳ አሌቁዋ ማላ።

13 ካꬃ ጫክያ ቦንያን እርጻ ሃꬃይ ኡሽና አልያዋዳን፥ ኪትና አማነትያ አሳይ ባረና ኪትያዋንታ ናሸቼ።

14 እመናባ “እማና” ያጊደ ጬቀትያ አሳይ እራይ ባይና ሻርያነ ጫርኩዋ ማላ።

15 ዳንዳያንቻ አሳይ ደርያ ሞድያዎ ኦዲደ አማንꬄ፤ ሊቆ ቃላይ መቀꬃ አꬊደ ገሌ።

16 ኤሳ ደሞፐ፥ ካላና ጋካናዉ ማ፤ ሽን ዳርሶፐ፥ ኔን ጮሻና። 17 ኔና ኡፊደ እጸናዳን፥ ነ ሾሩዋ ጎለ ኡባ ገደ ቦፓ።

18 ባረ ሾሩዋ ቦላ ዎርዱዋን ማርካትያ አሳይ ጋትማይ፥ ማሻይነ ቃራ አዳይ አሳ ቆህያዋ ኬሻ ቆሄ።

19 መቱዋ ዎደ አማነተና ኡራን ዘምፕያዌ ቃጽያ ማታን ጮምያዋነ ስሌዳ ገድያን ሀመትያዋ ማላ።

20 ካዮት ኡቴዳ አሳዉ የꬃ የጽያዌ ሜጉዋ ጋላስ ማዩዋ ቃርያዋነ ማዱꬃ ቦላ ጫላባ ትግያዋ ማላ።

21 ነ ሞርኪ ኮሻቶፐ፥ ምዛ፤ ሳመቶፐ፥ ኡሻ። ሮመ 12:20 22 አያዉ ጎፐ፥ ኔን ሄዋ ኦꬅያዌ አ ሁጲያን ታማ ቦንቁዋ ካሺደ ቆልያዋ ማላ። መꬍና ጎዳይካ ነዉ ዎይታና።

23 ዶላሃ ባጋ ጫርኩ እራ አህያዋዳን፥ ዝግርሳይ ሀንቁዋ አዬ።

24 ዋላቀትያ ማቻትና እት ጎልያን ደአናፐ ጎልያ ካሻን ደእያዌ ኬካ።

25 ዳቡሬዳ ኡራይ እርጻ ሃꬃ ኡሺደ አልያዋዳን፥ ሃኮ ቢታፐ ይያ ሎኦ ኦዱ ናሸቼ።

26 ኢታ አሳ ስንꬃን ኩንድያ ጽሎ አሳይ ቡሉቀቴዳ ፑልቱዋነ ባዬዳ ኦላ ሃꬃ ማላ።

27 ዳሮ ኤሳ ምያዌ ሎአ ግደና፤ ሄዋዳንካ፥ ባረ ቦንቹዋ ኮይያዌ ቦንችሰና።

28 ባረ ሁጲያ ናገና አሳይ ድርሳይ መኤዳ ካታማ ማላ።