1 ቦንያን ሻቻይ፥ ካꬃ ጫክያ ዎድያንካ እራይ ኮሸናዋዳን፥ ቦዛዉ ቦንቹ ኮሸና።

2 ካፎቱ ያነ ሃነ ፓሊደ፥ አሳ ቆሄናዋዳን፥ ጋሱ ባይናን ሸቂያ ሸቃይ አሳ ጋከና።

3 ፓራዉ ልሱዋ፥ ሀርያዉ ፓጾሩዋ ኮሽያዋዳን፥ ቦዛ ዞክያዉ ዋꬋ ኮሼ።

4 ቦዛ ኡራዉ አ ቦዛተꬃዳን ዛሮፓ፤ ዛሮፐ ኔንካ አ ማላ ግዳና።

5 ቦዛ ኡራዉ አ ቦዛተꬃዳን ዛራ፤ ሄዌ ꬋዮፐ፥ እ ባረና ኤራንቻዳን ፓይዳና።

6 ቦዛ አሳ ቦላ ኪታ ኪትያዌ ባረ ገድያ ቃንጽያዋነ ዎꬍያዋ ኡሽያዋ ማላ።

7 ቦዛ ኡራ ሌምሱ ዎባ ኡራ ገድያ ማላ ማደና።

8 ቦዛ ኡራ ቦንችያ አሳይ ሹቻ ያምባርሻ ቦላ ቃች ዎꬂደ ዩሽያ አሳ ማላ።

9 ቦዛ ኡራ ሌምሱ ማꬆቴዳ አሳይ ባረ ኩሽያ ጫዴዳ አጉንꬃ ከሳናዉ ባጸትያዋ ማላ።

10 ቦዛ አሳ ዎይ ባረዉ ኦግያና አꬍያ አሳ ኦሶ ቃጻርያ አሳይ ደሜዳ አሳ ኡባ ጫዳናዳን ዎንዳፍያ ዱክያ አሳ ማላ።

11 ካናይ ባረ ጮሻ ጉየ ስሚደ ምያዋዳን፥ ቦዛይ ባረ ቦዛተꬃ ኦሱዋ ዛር ዛር ኦꬄ።

12 ባረካ ባረና፥ “ታን አꬌዳ ኤራንቻ” ግያ አሳ በኣድ? አፐ ቦዛ ኡራዉ ስንꬃፐ ሎኦ ህዶታይ ደኤ።

13 አዛላይ፥ “ኦግያን ጋሙ ደኤ፤ ያሽያ ጋሙ አኮ ኦግያን ዩዬ” ያጌ።

14 ፐንጊ ባረ ማጻፍያን ያነ ሃነ ቃጽያዋዳን፥ አዛላይካ ባረ ሂጻን ያነ ሃነ አꬍ ዎꬌ።

15 እት እት አሳቱ ዳሮ አዛላ፤ ኡንቱንቱ ሀራይ አትና፥ ዎጽያን ቱሼዳ ሶሉዋካ ፑደ ባራናዉ ዳቡሪኖ።

16 አዛላ አሳይ ማርካና ኦድያ ላፑን ኤራንቻቱዋፐካ ባረና አꬌዳ ኤራንቻ ጊደ ቆፔ።

17 ባረና ጋꬅያዌ ባይና ሳን ፓላማዉ አꬍያ አሳይ ኦግያና ብያ ካና ሀይꬃ ኦይቂያ አሳ ማላ።

18-19 ባረ ሾሩዋ፥ “ታን ካሳዉ ኦꬃድ” ያጊደ ጭምያ አሳይ፥ ጎዪደ ታማ ጺፋ ኦልያ፥ ዎይ ዎꬍያ ጩብያ ደንꬅያ አሳ ማላ።

20 ምꬃይ ዉሮፐ፥ ታማይ ቶኤ፤ ዝግርያዌ ꬋዮፐ፥ ዋላሳይ አቴ።

21 ጺጹንꬃይ ቦንቁዋ ዳርስያዋዳንነ ምꬃይ ታማ ዳርስያዋዳን፥ ፓሉማንቻ አሳይ ዋላሳ ዳርሴ።

22 ዝግርሳ ቃላይ ማልኦ ቁማ ማላ፤ ናሸቺደ ዱገ ጋንጅያ ጋኬ።

23 ዎዛናን ኢታባይ ደእሺና፥ ባረ እንጻርሳን ጭሙዋ ቃላ ሃሳይያ አሳይ ብራን ሼሼዳ ኡርቃ ሚሻ ማላ።

24 ሎኦ ማላትያ ኢታ አሳይ ባረ ዎዛናን ደእያ ኢታተꬃ ባረ ናሾ ሃሳያን ገንꬄ። 25 አ ዎዛናን ላፑን ቱናተꬃይ ኩም ኡቴዳ ድራዉ፥ እ ሎኦ ቃላ ሃሳዮፐካ አ አማኖፓ። 26 ባረ ሞርከተꬃ እ ገንꬆፐካ፥ እ ኦꬅያ ኢታተꬃይ ሺቁዋን ቆንጫና።

27 ሀራቶ ኦላ ቦክያ ኡራይ ሄ ኦላን ባረዉ ኩንዳና፤ ሀራቱ ቦላ ሹቻ ጎንዶርስያ ኡራ ቦላ ሄ ሹቻይ ስሚደ ጎንዶረታና።

28 ዎርዶትያ እንጻርሳይ ባረ ቆሄዳ አሳቱዋ እጼ፤ ጭምያ ሃሳያይ ባየꬃ አሄፐ አትን፥ ሀራባ አሄና።