1 ዎንት ሀናናባን ጬቀቶፓ፤ ዎንት አሀናባ ኔን ኤራካ። ያቆባ 4:13-16

2 ኔና ሀራ አሳይ ጋላቶፐ አትና፥ ኔን ኔና ኔረካ ጋላቶፓ፤ አሳይ ነ ድራዉ ማርካቶፐ አትና፥ ኔን ነ ኬካተꬃ ኦዶፓ።

3 ሹቻይ ዎልቃማ ቶኩዋ፤ ሻፈቱዋ ቶክያዌካ ዴጼ፤ ሽን ቦዛ ኡራይ ደንꬅያ ዋላሳይ ኡንቱንቱ ላኡዋፐካ ዴጼ።

4 ሀንቆ ቃረት ባዋ፤ ይሉካ ባይዝያ ድኡዋ ማላ፤ ሽን ቃናትያን ኡባ ጋꬆፖ።

5 ጌሜዳ ሲቁዋፐ ባልያ ዎደ ቆንጭያን ሴርያዌ ኬካ።

6 ሞርኪ ኔና ዳሮ ገደ የርያዋፐ ሲቁ ኔና ደችያዌ ኬካ።

7 ካሌዳ ኡራ ኤሳ እልሉ ኢቴ፤ ሽን ኮሻቴዳ ኡራ ጫምያባይካ ማልኤ።

8 ባረ ጎልያ አጊደ ዩይያ አሳይ፥ ባረ ጎልያፐ ሃካደ ፓልያ ካፋት ማላ።

9 ሽቱነ ሳዊያ እጻናይ አሳ ናሸችያዋዳን፥ ሲቁዋ ላግያ ዞሪካ ናሸቼ።

10 ነ ሲቆ ላግያነ ነ አዉዋ ሲቆ ላግያ አጎፓ፤ ኔና መቴዳ ዎደ ነ እሻ ጎለ ቦፓ። ሃኩዋን ደእያ እሻፐ ማታን ደእያ ሾሩ ኬካ።

11 ታ ናአዉ፥ ኔን አꬌዳ ኤራንቻ ግዳ። ያትንቶ ታን ናሸታናነ ታና ቦርያዋንቱ ኦሻካ ዛራና።

12 ጭንጫ አሳይ መቱ ይያ ዎደ በኢደ ቆሰቴ፤ ሽን አኬካይ ፓጬዳ አሳይ ስት ግ ቢደ፥ መቱዋን ገሌ፤ ያቲደ ጉየፐ አዬ አና ያጌ።

13 ኤረና አሳዉ ዋስያ ገልያ ኡራ ማዩዋ ቃር አክተ፤ እማꬃ አሳዉ፥ ዋስያ ገሌዳ ኡራ ማዩዋ ኦይቂተ።

14 ዎንታ ጉራን ባረ ቃላ ꬎቁ ኦꬂደ፥ ባረ ሾሩዋ ሳሮትያዌ አ ሸቂያዋ ማላ።

15 ዋላቀታደ ዱጸና ማቻታነ እራይ ቡክያ ዎደ ጾኪደ አገና ጎሊ እት ማላ። 16 ጫርኩዋ ተአናዉ ዎይ ዛይትያ ጩጩሚደ ኦይቃናዉ ዳንዳየተናዋዳን፥ እዞ ጮኡ ኦꬃናዉ ዳንዳየተና።

17 ብራታይ ብራታ ፖሽያዋዳን፥ አሳይ እቱ እቱዋፐ ታማሬ።

18 ባላስያ ግያ ምꬃቶ እሻልሲደ ናጌዳ ኡራይ እ አይፍያ ማና፤ ባረና አይሴዳዋ ካቦይያ ቆማይ ቦንቼታና።

19 ሃꬃይ ማስቶትያዳን ሶምኡዋ በስያዋዳን፥ አሳ ዎዛናይ እዛዉ ኤሻ በሴ።

20 ሀይቁነ ባሻይ ካል ኤርክኖ፤ ሄዋዳንካ፥ አሳ አይፊ ካለና።

21 ብራይነ ዎርቃይ ታማን ፓጨቲደ ጌይያዋዳን፥ አሳይካ ባረ አክያ ጋላታን ፓጨቴ።

22 ቦዛ አሳ ካꬃና ኡዱላን የጋደ፥ ኡዱላ ምꬃን ጫድንቶ፥ አፐ ቦዛተꬃይ ክቼና።

23 ነ ዶርሳቱ ደእያ ሀኖታ ሎይꬃደ ኤራ፤ ነ መህያ ዉድያካ ዎዛናፐ ሄማ። 24 አያዉ ጎፐ፥ ዱረተꬃይ መꬍናዉ ደኤና፤ ካላቻይካ የለታፐ የለታዉ አናን አጋናዉ ዳንዳዬ። 25 መላ ማታይ ቡጨቴዳዋፐ፥ አጫ ማታይ ከሴዳዋፐነ ደርያ ቦላን ደእያ ማታይ ሺቄዳዋፐ ጉይያን፥ 26 ዶርሳቱዋ እስክያፐ ኔን ነዉ ማይያዋ ከሳና፤ አማሬዳ ዴሻቱዋ ዛልኤዳ ብራንካ ነዉ ጋድያ ሻማና። 27 አትያ ዴሻቱዋ ማꬃይ ነዉ፥ ነ ሶ አሳዉነ ነ ማጫ ቆማቶ ቁማ ግዳናዋ።