1 ኢታቱ ኦንነ የደርሰናን ባቃቲኖ፤ ሽን ጽሎቱ ጋሙዋ ማላ ጻላ።

2 እት ካዉተꬃይ ማካላንቻ ግዶፐ፥ አ ሞድያዋንቱ ላመት ላመት ሞድኖ። ሽን ካለꬅያዋንቱ አꬌዳ ኤራንቻነ አኬካንቻ ግድያ ዎደ፥ ምኖ ግዲደ፥ ዳሮ ዎድያ ታኬ።

3 ህዬሳቱዋ ኡቁንያ ዳናይ ካꬃ ꬋይስያ ዎልቃማ እራ ማላ።

4 ህግያ ቦንቼና ኡራይ ባይዛንቻ ሳቤ፤ ሽን ህግያ ቦንችያዌ ባይዛንቻቱዋ ቆፋ ጳልቄ።

5 ኢታ አሳቶ ሱረ ፕርዳባይ ገለና፤ ሽን መꬍና ጎዳዉ ጎይንያዋንቶ ኡባባይካ ገሌ።

6 ጌላ አሳ ግዲደ፥ ዱረ ግድያዋፐ ሱረ አሳ ግዲደ፥ ህዬሳ ግድያዌ ኬካ።

7 ህግያ ናግያ ዎዳላይ አኬካንቻ። ሽን ፓና ሹፉሮቱዋና ዙፐትያዌ ባረ አዉዋ ዬላዬ።

8 ሚሻ ድቻዉ እምያዋንነ የሉዋን ዱረትያ አሳይ ሄ ማጹዋ ህዬሳቶ ኬክያ አሳዉ ሺሼ።

9 ህግያ ስሳናፐ ጊደ፥ ባረ ሀይꬃ ዎራ ዛርያ ኡራ ዎሳይ ጾሳ ሸነይያዋ።

10 ሱረቱዋ ኢታ ኦግያ ካለꬅያ ኡራይ ባረ ቦኬዳ ኦላን ባረዉ ኩንዳና፤ ሽን ጌሻ አሳይ ሎኦባ ላታና።

11 ዱረ አሳይ ባረና አꬌዳ ኤራንቻ ጊደ ቆፔ፤ ሽን አኬካይ ደእያ ህዬሳይ አ ፓጬ።

12 ጽሎቱ ጾኔዳ ዎደ፥ አሳይ ኡባይ ናሸቴ፤ ሽን ኢታቱ ማታ ኦይቄዳ ዎደ፥ አሳይ ቆሰቴ።

13 ባረ ናጋራ ገንꬅያ ኡራይ አጨና፤ ሽን ፓጽያዌነ ናጋራ አግያዌ ማረታናዋ።

14 መꬍና ጎዳዉ ኡባ ገደ ያይያ አሳይ አንጀቴዳዋ፤ ሽን ባረ ዎዛና ጉዙንꬅያ አሳይ መቱዋን ገላና።

15 ህዬሳ አሳ ሞድያ ኢታ ዳናይ ጉድያ ጋሙዋነ ኮሻቴዳ ባባርቂያ ማላ።

16 ዎዛን ፓጬዳ ዳናይ ባረ አሳ ናቄ፤ ሽን አሳ ናቂያዋ እጽያዌ ዳሮ ላይꬃ ሞዳና።

17 አሳ ዎꬌዳ አሳይ ሀይቃና ጋካናዉ ባቃቲደ ደኤ፤ አ ኦንነ ሺሽ አከና።

18 ቦሪ ባይናን ሀመትያ ኡራይ ቆሄተናን አታናዋ፤ ሽን ጌላ አሳይ እት ኩꬃን ኩንዳና።

19 ባረ ጋድያ ኦꬅያ ኡራይ ካꬃ ካሌ። ሽን ሹፉሮቱዋ ካልያ ኡራይ ኡባ ገደ ህዬሲደ ደኤ።

20 አማነቴዳ ኡራይ ዳሮ አንጀታና፤ ሽን ዱረታናዉ ጃምያዌ ሙረተናን አተና።

21 ሻኪደ ማድያዌ ሎኤና፤ ሽን አሳይ ጉꬃ ኡክꬃ ድራዉ ጊደካ፥ ባላባ ኦꬂኖ።

22 ኡዘትያ ኡራይ ዱረታናዉ ጃሜ፤ ባረና ህዬሳተꬃይ ኦይቃናዋካ ኤረና።

23 አሳ ጮ ሳቢያ ኡራፐ ሴርያ ኡራይ ጉየፐ ጋላተቴ።

24 ባረ አዉዋፐነ ባረ አትፐ ዉኢደ፥ “ታን አይነ ናጋራ ኦꬃበይከ” ያግያ ኡራይነ ባይዝያ ኡራይ እት ማላ።

25 ኡዘትያ ኡራይ ዋላሳ ደንꬄ፤ ሽን መꬍና ጎዳን አማነትያዌ ካሌ።

26 ባረናን አማነትያ አሳይ ቦዛ፤ ሽን አꬌዳ ኤራተꬃን ሀመትያዌ ሳሮ ደኤ።

27 ህዬሳዉ እምያ ኡራዉ ፓጨና፤ ሽን ኡንቱንታ በአናፐ ጊደ ጪልምያዌ ሸቃ አካና።

28 ኢታ አሳቱ ሱንትያ ዎደ፥ አሳይ ቆሰቴ፤ ሽን ኡንቱንቱ ꬋይያ ዎደ፥ ጽሎቱ ጮራቲኖ።