1 ዳሮ ገደ ሴርና እጺደ፥ ሞርጊ ꬉሌዳ ኡራይ ሀሳየናን መአና፤ ሄ ኡራዉ ፓጹካ ባዋ።

2 ጽሎ አሳቱ ሱንትያ ዎደ አሳይ ናሸቴ፤ ሽን ኢታቱ ቢታ ሞድያ ዎደ አሳይ ኦሌ።

3 አꬌዳ ኤራ ዶስያ አሳይ ባረ አዉዋ ናሸቼ፤ ሽን ዎሹምያ ማጫ አሳቱዋ ሄራን ዩይያ አሳይ ባረ ሚሻ ዉርሴ።

4 ቱሙዋ ፕርድያ ካቲ ባረ ካዉተꬃ ዎፑ ኦꬄ፤ ሽን ማታይያ ማናዉ ዮራትያዌ ባረ ካዉተꬃ ባይዜ።

5 ባረ ሾሩዋ ሳቢደ ሃሳይያ ኡራይ፥ አ ገድያዉ ግትያ የጌ።

6 ኢታ አሳይ ግቲ ኦይቂያዋዳን፥ ባረ ናጋራን ኦይቀቴ፤ ሽን ጽሎ አሳይ ናሸታናዉነ የጻናዉ ዳንዳዬ።

7 ጽሎ አሳይ ህዬሳ ማታ ቦንቼ፤ ሽን ኢታ አሳይ ሄዋ ማላ ኤራ ኡባካ ኤረና።

8 ቅሊጭያዋንቱ ካታማን ዋላሳ ደንꬂኖ፤ ሽን አꬌዳ ኤራንቻ አሳቱ ሀንቁዋ እርጽሲኖ።

9 አꬌዳ ኤራንቻ አሳይ ቦዛ አሳ ፕርዳ ጎለ አፎፐ፥ ቦዛይ ሀንቀቴነ ቅꬌ፤ አዉ ያቶፐ ሳሩ ꬋዬ።

10 ሱꬃ ጉሳናዉ ጃምያ አሳቱ ሱረ አሳ እጺኖ፤ ቃይ ጽሎ አሳካ ዎꬋናዉ ኮዪኖ።

11 ቦዛ አሳይ ባረ ሀንቁዋ የድ በሴ፤ ሽን አꬌዳ ኤራ አሳይ ባረ ሀንቁዋ ምቴ።

12 እት ሱንቴዳ ኡራይ ዎርዱዋ ኦዱዋ አኮፐ፥ አ ኦሳንቻቱ ኡባይ ኢታ ከሲኖ።

13 ህዬሳይነ አሳ ናቂያ አሳይ እትባ ኮጺኖ፤ ኡንቱንቱ ላኦካ አይፍያ መꬍና ጎዳይ ጼልሴ።

14 እት ካቲ ህዬሳዉ ሱረ ፕርዶፐ፥ እ ባረ ካዉተꬃን ጋምአና።

15 ቃይጼሪነ ሴራይ ናናቶ አꬌዳ ኤራ እሜ፤ ሽን የዳን ድጬዳ ናአይ ባረ አቶ ካዉሼ።

16 ኢታ አሳቱ ዳርያ ዎደ፥ ናጋራይ ዳሬ፤ ሽን ጽሎቱ ኡንቱንቱ ኩንደꬃ በአና።

17 ነ ናኣ ሴራ፤ ያቶፐ፥ እ ነዉ ሳሩዋ እማና፤ እ ኔና ናሸቻና።

18 ጾሳይ ካለꬅያ ካለሱዋ አከና ደሪ የዳ፤ ሽን ህግያ ናግያ ኡራይ አንጀቴዳዋ።

19 ቆማይ ጮ ኦዶ ጻላን ሴረት ኤረና፤ ኦዱ አዉ ገልንቶካ እ አዛዘተና።

20 ኤሌሌ ኤሌሌ ሃሳይያ ኡራ በአ ኤራይሻ? አፐ ቦዛ ኡራዉ ስንꬃናዉ ዳሮ ህዶታይ ደኤ።

21 ነ ቆማዉ ናአተꬃፔ ዶምና፥ እ ኮይያዋ ኡባ አዉ እማ ሜዘዮፐ፥ እት ጋላስ ነዉ ደእያዋ ኡባ አካናዉ እ ካጄላናዌ አተና።

22 ሀንቀትያ አሳይ ዋላሳ ደንꬄ፤ ኤለ ይሎትያ አሳይ ዳሮ ናጋራ ኦꬄ።

23 ኦቶሩ አሳ ካዉሼ፤ ሽን ሆክያ አያናይ ደእያ አሳይ ቦንቼቴ።

24 ካይሱዋና ሻክያ ኡራይ ባረና እጽያ አሳ፤ እ ዳባባን ቱሙዋ ኦዶፐካ ሙረቴ፤ ቱሙዋ ኦዳና ꬋዮፐ ቃይ፥ ጾሳይ አ ሙራና።

25 አሳዉ ያይያዌ ሄ ኡራዉ ጲረ ግዴ፤ ሽን መꬍና ጎዳን አማነትያ አሳይ ሳሮ ደኤ።

26 ዳሮቱ ሱንꬃተꬃይ ደእያ አሳቱዋ አዉዳሺኖ፤ ሽን ሱረ ፕርዳይ መꬍና ጎዳ ማታፐ ቤቴ።

27 ጽሎቱ ናጋራንቻቱዋ ሸነቲኖ፤ ናጋራንቻቱካ ሱረ ኡራ ሸነቲኖ።