ጌሻ ማጻፋ ዮሃንሳ ሳፃ 1

ዮሃንሳዉ

ዬዳ ሳፃ

ገሉዋ

ዮሃንሳዉ ዬዳ ሳጻይ ጻፈቴዳዌ፥ አማንያ አሳቱ የሱስ ክርስቶሳ ባረንቱ ጎዳ ኦꬂደ፥ ጌሻተꬃን ደኤዳ ድራዉ፥ ኡንቱንታ መቱነ ዋዪ ጋኬዳ ዎድያና። ጻፍያ ሁጰ ቆፋይ፥ ናባብያዋንቱ ህዶታይ ኩመንꬃ ግዳናዳን፥ ኡንቱንታ መንꬃናሳነ ባረንታ ጋኬዳ የደሳነ መቱዋ ግዶን ባረንቱ አማኑዋን ምናናዳን፥ ኡንቱንታ ምንሳናሳ።

ማጻፋ ግዶን ዳርያ ባጋይ ዳራነ ካል ካሊደ ቆንጬዳ ሳጻቱዋ ኦይቄዳዋ። ሳጻቱ ሄ ላይꬃን ደእያ አማንያ አሳዉ ገልያዋንታ። ሽን ሀራቶ ጹራ ግዲደ ቆንጨና ሃሳያን ሺቄድኖ። ማዝሙርያ አዝማች ዛረትያዋዳን፥ ሀ ማጻፋ ግዶን ደእያ ሁጰ የዋቱዋ ዱማ ዱማ ሳጻቱ ባጋና ዱማ ዱማ ማላንነ ዱማ ዱማ ምስልያ ፓይዳቱዋን ዛር ዛሪደ ሺቄድኖ። ሀ ማጻፋ ጼልያዋን ዱማ ዱማ ቆፋይ ደኦፐነ አዉ ግዶ ቆፋይ ቆንጬ። ሄዌነ፥ “ጾሳይ ጎዳ ግዴዳ ክርስቶሳ ባጋና ላኤና ሀኖታን፥ ባረ ሞርከቱዋ፥ ሴጻናናካ እትፐ፥ እት ገደ ዉርሰꬃ ጾኑዋ ጾናና። ፖሌዳዋፐ ጉይያን ባረዉ አማነቲደ ደኤዳ፥ ባረ ባጋቱዋ ኦራꬃ ሳሉዋነ ኦራꬃ ሳኣ አንጁዋ ላትሳና” ያግያዋ።

ሸምፓቱዋ ኡባቶ እመቴዳ ቃንꬃ ቆፋቱዋ

ገሉዋ 1:1-8

ሳፃ ዶያነ ላፑ ዎሳ ጎለቶ ኪተቴዳ ኪታ 1:9—3:22

ማጻፋነ ላፑ ማታፋቱዋ 4:1—8:1

ላፑ ማላካታቱዋ 8:2—11:19

ዳዊያነ ላኡ መሄቱዋ 12:1—13:18

ዱማ ዱማ ሳጻቱዋ 14:1—15:8

ጾሳ ሀንቁዋ ላፑ ጹአቱዋ 16:1-21

ባብሎነ ባሻ፥ ዱኣ፥ ዎርዶ ናብያነ ሴጻናይ ጾነትያዋ 17:1—20:10

ዉርሰꬃ ፕርዳ 20:11-15

ኦራꬃ ሳሉዋ፥ ኦራꬃ ሳኣነ ኦራꬃ የሩሳላሞ 21:1—22:5

ዉርሰꬃ ቁትያ 22:6-21

1 ኤሌል ሀናናዉ በስያዋ ባረ ኦሳንቻቱዋ በሳና ማላ፥ ጾሳይ የሱስ ክርስቶሳዉ እሜዳ ሳጻይ ሀዋ፤ የሱስ ባረ ኪታንቻ ኪቲደ፥ ሀ ሳፃ ባረ ኦሳንቻ ዮሃንሳ ኤርሴዳ። 2 ዮሃንስ በኢደ ቱማተꬃን ኦዴዳ ኡባባይ፥ ጾሳ ቃላነ የሱስ ክርስቶሳ ማርካተꬃ። 3 ሀ ማጻፋ ናባብያ ኡራይ * አንጀቴዳዋ፤ ቃይ ሀ ትምቢትያ ማጻፋ ስስያዋንቱነ ሀ ማጻፋን ጻፈቴዳዋ ናግያዋንቱ አንጀቴዳዋንታ፤ አያዉ ጎፐ፥ ሀ የዉ ፖለታናዉ ዎዲ ማታቴዳ።

ኢስያን ደእያ ላፑ ዎሳ ጎለቶ ኪተቴዳ ሳሮታ

4 ታን ዮሃንስ፥ ኢስያ ጋድያን † ደእያ ላፑ ዎሳ ጎለቶ ያጋይ፤

ካሰ ደእያ ጾሳፐ፥

ሀእካ ደእያ ጾሳፐ፥

ስንꬃፐካ ያና ጾሳፐ፥

ቃይ አ ካዉተꬃ ኦይድያ ስንꬃን ደእያ ላፑ አያናቱዋፐ፥

አꬎ ኬካተꬃይነ ሳሮተꬃይ፥

ህንተንቶ ግዶ።

5 ቃይ አማነቴዳ ማርካ፥

ሀይቁዋፐ ኮይሮ ደንዴዳ ናኣፐ፥

ሳኣ ካታቱዋ ሞድያ የሱስ ክርስቶሳፐ፥

አꬎ ኬካተꬃይነ ሳሮተꬃይ፥

ህንተንቶ ግዶ።

እ ኑና ሲቄነ፥

ቃይ ኑ ናጋራ አይለተꬃፐካ፥

ባረ ሱꬃን ኑና ከሴዳ።

6 ኑና ባረ ጾሳዉነ አዎ ኦꬃና ማላ፥

እ ኑና ካታቱዋነ፥

ቄሳቱዋ ኦꬄዳ፤

አዉ መꬍናፐ መꬍና ጋካናዉ፥ ቦንቹነ

ሞድያ ዎልቃይ ግዶ። አመንእ።

7 በእተ፥

የሱስ ሻርያን ዬ።

አሳይ ኡባይ፥ ሀራይ አቶ፥

አ ጫዴዳዋንቱካ፥ አ በአና፤

ሳኣን ደእያ አሳይ ኡባይ፥

አ ጋሱዋን ዬካናዋንታ።

ሀዌ ቱሙፐ ሀናናዋ። አመንእ።

8 ካሰ ደእያዌ፥ ሀእካ ደእያዌ፥ ስንꬃፐካ ያና ጎዳይ፥ ኡባፐ ዎልቃማ ጾሳይ፥ “ኡባባዉ አልፋይነ ኦሜጋይ፥ ኮይሩነ ዉርሰꬃይ ታና”‡ ያጌ።

ክርስቶስ ሳጻን ቆንጬዳዋ

9 ታን ዮሃንስ፥ ህንተንቱ እሻይ፥ ህንተናና የሱስ ክርስቶሳ ዋይያነ አ ካዉተꬃ ቃይ አ ዳንዳያ እትፐ ሻከትያዌ፥ ጾሳ ቃላ ኦዴዳ ድራዉነ የሱሳዋ ማርካቴዳ ድራዉ፥ ፒጽሞ ግያ ሃꬃይ ዶዶ ቢታን ደኣድ። 10 ጎዳ ጋላሳን ታን አያናን ደአይ፤ ታን ታፐ ጉየና ማላካታ ዋሱዋ ማላ ዎልቃማ ኮሻ ስሳድ። 11 ሄ ኮሻይ ታና፥ “ኔን በእያዋ ማጻፋን ጻፋ፤ ኢስያን ደእያ ላፑ ዎሳ ጎለቶ፥ ኤፈሶና፥ ሳምርኔሳ፥ ጰርጋሞና፥ ትያጽሮና፥ ሳርዴሳ፥ ፕላደልፍያ፥ ሎዶቅያ ዎሳ ጎለቶ ዬዳ” ያጌዳ።

12 ታን ታዉ ኦድያ ኮሻ በአናዉ ጉየ ስማድ፤ ጾምፕያ ዎꬅያ ላፑ ዎርቃ ባላቱዋ በኣድ። 13 ሄ ባላቱዋ ግዶን አሳ ናኣ ማላትያዋ በኣድ፤ አዱሳ አፍላ ባረ ገድያ ጋꬅ ማዪደ፥ ዎርቃ ዳንጩዋ ባረ ትራን ዩሽ አꬄዳ። 14 አ ሁጲነ አ ሁጲያ ብናናይ ቦꬃ ዶርሳ እስክያነ ሄዋፐካ አꬊደ ሻቻ ማላቴ፤ አ አይፊካ ታማ ላጩዋ ማላቴ። 15 አ ገዲካ ጮጭያ ታማን ቴሪደ ጶልያ ናሃስያ ግያ ብራታ ማላቴ፤ አ ኮሻይካ ዎልቃማ ሻፋ ጉንꬃ ማላ። 16 እ ባረ ኡሸቻ ኩሽያን ላፑ ጾልንታቱዋ ኦይቄዳ። አ ዶናፐ ላኡ ባጋና ቃረቴዳ ማሻይ ከሴዳ። አ ዴሙካ ሎይꬅ ፖእያ አዋይፍያ ማላቴ።

17 ታን አ በኤዳ ዎደ ሀይቄዳዋዳን ሀናደ፥ አ ገድያ ማታን ኩንዳድ። ባረ ኡሸቻ ኩሽያ ታ ቦላ ዎꬂደ፥ ታና ሀዋዳን ያጌዳ፤ “ያዮፓ፤ ኮይሩካ ዉርሰꬃይካ ታና። 18 ታን ደኡዋን ደእያዋ። ታን ሀይቃድ፤ ሽን በአ፥ መꬍ መꬍናዉካ ደኡዋን ደአይ። ሀይቁዋ ቁልፒነ ስኦልያ ቁልፒ ታ ኩሽያን ደኤ። 19 ስም ኔን በኤዳባነ ሀእ ደእያዋ፥ ቃይ ስንꬃፐ ሀናናባ ጻፋ። 20 ኔን ታ ኡሸቻ ኩሽያን በኤዳ ላፑ ጾልንታቱዋ ብለꬃይነ ቃይ ጾምፓቱዋ ዎꬅያ ላፑ ዎርቃ ባላቱዋ ብለꬃይ ሀዋ፤ ላፑ ጾልንታቱ ላፑ ዎሳ ጎለቱዋ ኪታንቻቱዋ፤ § ዎሳ ጎልያ ላፑ ዎርቃ ባላቱ ላፑ ዎሳ ጎልያ።”

*1:3 ናባብያ ኡራይ፦ ሀዋ ጉሳይ ኡባ አሳይ እትፐ ጾሳ ጎሸትያ ዎደን ሄዋንቶ ቃላ ናባብያ ኡራይ አንጀቴዳዋ ጉሳ።

†1:4 ኢስያ ጋድያ፦ 1:4—3:22 ደእያዌ ዳብዳቢያ ግዲደ ጻፈቴዳ። ኢስያ ጋዲ አዋይፊ ዶልያ ባጋና ደእያ ሮመ ካዉተꬃ ግዲደ ሀእ ሀ ዎድያን ቱርከ ጋድያ ጊደ ጼሰትያዋ።

1:4 ከሳ 3:14፤ ሳፃ 4:5

1:5 ኢሳ. 55:4፤ ማዝ. 89:27

1:6 ከሳ 19:6፤ ሳፃ 5:10

1:7 ዳኔላ 7:13፤ ማቶሳ 24:30፤ ማር. 13:26፤ ሉቃሳ 21:27፤ 1 ተስ. 4:17፤ ዛካ. 12:10፤ ዮሃ. 19:34፣ 37

‡1:8 አልፋይነ ኦሜጋይ፦ ሀዋ ጉሳይ ኦራꬃ ጫቁ ኮይሮ ግሪከ ቃላን ጻፈቴዳ ድራዉ፥ ኮይሩነ ዉርሰꬃይ ጋናዉ ኮዪደ፥ አልፋ ግያ ግሪከ ኮይሮ ፕዶልያ አኪደ ዉርሰꬃዉ ቃይ ኦሜጋ ግያ ዉርሰꬃን ደእያ ፕዶልያ አኬድኖ። ሀዋንታ ጉሳይ ሌምሱዋን ዳዉሮꬁዋ ፕዶላቱዋ አክንቶ [አ - ዝ] ያግያዋ ማላ ጉሳ።

1:8 ሳፃ 22:13፤ ከሳ 3:14

1:13 ዳኔላ 7:13፤ 10:5

1:14 ዳኔላ 7:9፤ 10:6

1:15 ህዝ. 1:24፤ 43:2

1:17 ኢሳ. 44:6፤ 48:12፤ ሳፃ 2:8፤ 22:13

§1:20 ኪታንቻቱዋ፦ ሀዋንታ ጉሳይ አማንያዋንታ ካለꬅያ ጭማቱዋ ዎይ አማንያዋንቶ ኪተቴዳዋንታ።