4
ፆሳይ ዮሃኒሳ ባሬ ካዉቴꬃ ኦይዲያ ሲንꬃ ኣሄዳ
1 ሄዋፔ ጉዪያን፥ ታኒ ሳሉዋን ዶያ ፔንጊያ ቤዓዲ፤ ቃሲ ታው ማላካታዳን ኦዲሺን፥ ታኒ ሲሴዳ ኮይሮ ኮሻይ ታና፤ «ሃዋፔ ጉዪያን፥ ሃናናው ቤሲያዋ ታኒ ኔና ቤሳና፤ ሃ ኬሳ» ያጌዳ። 2 ኤሌካ ታኒ ጌሻ ኣያና ሞዱዋ ጊዶ ጌላ ኣጋዲ። ቤዒቴ፥ ሳሉዋን ካዉቴꬃ ኦይዲ ዴዔ፤ ሄ ኦይዲያን ኢቱ ኡቴዳ። ሂዝ 1፡26-28፤ 10፡1 3 ሄ ኡቴዳዋ ማላይ ኣልዖ ኢያሲጲዲያ ሹቻዳኒኔ ኣልዖ ሴርዲኖኔ ሹቻዳኒ ጶሌ። ካዉታ ኦይዲ ዙሉዋን ዩዪ ኣꬊዴ ኡባ ባጋና ኣልዖ ማርጊዲያ ሹቻዳን ጶሌ። 4 ሄ ካዉቴꬃ ኦይዲያ ዩዪ ኣꬊዴ፥ ሃራ ላታማኔ ኦይዱ ካዉቴꬃ ኦይዳቱ ዴዒኖ፤ ኡንቱንቱን ቦꬃ ማዩዋ ማዪዴ፥ ሁጲያን ዎርቃ ኣኪሊሊያ ዎꬄዳ ላታማኔ ኦይዱ ጪማቱ ኡቴዲኖ። 5 ካዉቴꬃ ኦይዲያፔ ዋልቃንꬃይ፥ ኮሹንቻይኔ ጉጉንꬃ ጉንꬃይ ኬሴዳ፤ ቃሲ ካዉቴꬃ ኦይዲያ ሲንꬃን ላፑ ፆምፓቱ ፖዒኖ። ሄዋንቱ ፆሳ ላፑ ኣያናቱዋ። ኬስ 19፡16፤ ሳፅ 8፡5፤ 11፡19፤ 16፡18፤ ሂዝ 1፡13፤ ሳፅ 1፡4፤ ዛክ 4፡2 6 ካዉቴꬃ ኦይዲያ ሲንꬃን ቢሪሊያ ማላቲያ ቡርጩኩዋ ኣባይ ዴዔ። ሂዝ 1፡22፣ 5-10፤ 10፡14
ሄ ካዉቴꬃ ኦይዲያፔ ሲንꬃናኔ ጉዬና ኣ ማታን ዩዪ ኣꬊዴ፥ ኣይፊ ኩሜዳ ኦይዱ ዴዑዋን ዴዒያ ሜꬌታቱ ዴዒኖ። 7 ኮይሮ ዴዑዋን ዴዒያ ሜꬌታይ ጋሙዋ ማላቴ፤ ላዔንꬁ ሚዛ ማራ ማላቴ፤ ሄዜንꬁዋ ሶምዒ ኣሳ ዴሙዋ ማላቴ፤ ቃሲ ኦይዴንꬁ ፓሊያ ኣርጋንꬃ ማላቴ። 8 ኦይዱ ዴዑዋን ዴዒያ ሜꬌታቶ ሁጲያን ሁጲያን ኡሱፑን ቄፊ ዴዔ፤ ኡንቱንቶ ቦላን ጋርሳንካ ኡባሳን ኣይፊ ኩሜዳ። ኡንቱንቱ ቃማኔ ጋላሲ፥
«ጌሻው፥ ጌሻው፥ ጌሻው፥
ካሴ ዴዒያዎ፥ ሃዒካ ዴዒያዎ፥
ቃሲ ሲንꬃፔ ያናዎ፥
ጎዳው፥ ኡባፔ ዎልቃማ ፆሳው»
ጊያዋ ኣጊኪኖ። ሂዝ 1፡18፤ 10፡12፤ ኢሳ 6፡2-3 9 ሄ ሜꬌታቱ ካዉቴꬃ ኦይዲያን ኡቴዳ ሜꬊ ሜꬊናው ዴዑዋን ዴዒያዋ ማዚሙሪያን ሳቤዳ ዎዴ፥ ቦንቼዳ ዎዴኔ ጋላቴዳ ዎዴ፥ 10 ላታማኔ ኦይዱ ጪማቱ ካዉቴꬃ ኦይዲያን ኡቴዳ ሜꬊ ሜꬊናው ዴዒያዋ ሲንꬃን ጉፋኒዴ፥ ኣው ጎዪኒኖ፤ ባሬንቱ ኣኪሊሊያ ካዉቴꬃ ኦይዲያ ሲንꬃን ዎꬂዴ ሃዋዳን ያጊኖ።
11 «ኑ ጎዳው ፆሳው፥
ኔኒ ቦንቹዋ፥
ሳባኔ ዎልቃ
ኣካናው ቤሳሳ።
ኣዪሲ ጎፔ፥
ኡባባ ኔኒ ሜꬋዳ፤
ቃሲ ኡባባይካ
ኔኒ ኮዬዳዋዳን
ሃኔዳኔ ዴዔዳ»
ያጊኖ።