11
ጾሳይ እስራኤልያ አሳ ዉርስ ኦልቤና
1 ያትና፥ ጾሳይ ባረ አሳ እጼደ ጋደ ኦቾ? ሄዋ ግደና፤ አያዉ ጎፐ፥ ታን ታ ሁጰዉ እስራኤልያ አሳ፤ አብራሃመ ዛረ፤ ቢንያማ ያራ። 2 ጾሳይ ኮይሮ ዶሬዳ ባረ አሳቱዋ እጸና፤ ጾሳ ማጻፋይ፥ ኤላሳ ታርክያ ግዶን፥ ኤላስ እስራኤላቱዋ ጾሳ ስንꬃን ዎት ሞትንቶ፥ ህንተ ኤሪታ። 3 “ጎዳዉ፥ ኡንቱንቱ ሄ ሱንꬃን ናባቱዋ ዎꬌድኖ፤ ነ ያርሽያ ሳካ ኮሌድኖ። ያትና፥ ታን ታ ጻላላይ አታድ። ቃይ ኡንቱንቱ ታናካ ዎꬋናዉ ኮዪኖ” ያጌዳ። 1 ካታ. 19:10፣ 14
4 ጾሳይ አዉ ዋግ ዛሬዴ? “ታን ኤቃ ባኣላዉ ጉልባትቤና ላፑ ሻአ አሳ ታዉ አሻድ” ያጌዳ። 1 ካታ. 19:18
5 ሀዋዳንካ ቃይ ሀ ዎድያን፥ ጾሳይ ባረ አꬎ ኬካተꬃን ዶሬዳ አማሬዳ አሳቱ ደኢኖ። 6 ሽን እ ባረ አꬎ ኬካተꬃን ዶሬዳፐ አትን፥ ኡንቱንቱ ኦሱዋን ኡንቱንታ ዶርቤና፤ ሄዌ ꬋዮፐ፥ አ አꬎ ኬካተꬃይ ቱሙ አꬎ ኬካተꬃ ግደና።
7 ያትና፥ አዬ? እስራኤልያ አሳቱ ባረንቱ ኮይያዋ ደምበይክኖ፤ ሽን ጾሳይ ዶሬዳ አማሬዳዋንቱ ደሜድኖ። የኮንቱ ዎዛናይ ምኔዳ። 8 ሀዋዳንካ፥ ጾሳ ማጻፋይ፥
“ጾሳይ ኡንቱንቱ ባረንቱ አይፍያን በኤናዳንነ
ባረንቱ ሀይꬃን ስሰናዳን፥
ሀዋ ጋካናዉ ኡንቱንቶ፥
አዛላ አያና እሜዳ”
ያጌዳ።ዛረ. 29:4፤ ኢሳ. 29:10 9 ቃይ ዳዊተ ያጌዳ፤
“ኡንቱንቱ ምያ ጋይታይ ኡንቱንታ ጲርያዳን ኦይቆ፤
ኡንቱንታ ጉፋንꬆ፤ ኡንቱንቶ ኩሽያ ሽር ጭጎ። ማዝ. 69:22-23
10 ኡንቱንቱ ጼለናዳን፥ ኡንቱንቱ አይፊ ጎዘቶ፤
ኡባ ዎደ ባረንቱ መቱዋን ቁኒደ ደኢኖ”
ያጌዳ።
11 ያትና፥ አይሁዳቱ ꬉበቴዳ ዎደ፥ ደንደናዳን ኩንዴድኖ? ሄዋ ግደና፤ ኡንቱንቱ ናጋራ ኦꬄዳ ድራዉ፥ አቶተꬃይ ኡንቱንቱ አይሁዳ ግደና አሳቱዋ ቃናታናዳን፥ አይሁዳ ግደና አሳዉ ዬዳ። 12 ሽን አይሁዳቱ ናጋራ ኦꬄዳ ድራዉ፥ አላመዉ ዳሮ አንጁ ዬዳ፤ ቃይ ኡንቱንቱ ኩንደꬃይካ አይሁዳ ግደና አሳዉ ዳሮ አንጁዋ አሄዳ። ያትና፥ አይሁዳቱ ኡባይ ጉጀትያ ዎደ፥ አንጁ ዎይሳ ኬና ዳራንዴሻ!
አይሁዳ ግደና አሳይ አታና አቶተꬃ
13 ሽን ታን ሀእ ህንተንቶ፥ አይሁዳ ግደና አሳዉ ሃሳያይ፤ ታን አይሁዳ ግደና አሳዉ የሱስ ኪቴዳዋ ግድያ ድራዉ፥ ታ ኦሱዋ ቦንቻና። 14 ታን ታ ዛረ ግድያ አሳቱዋ ቃናታንቻቱዋ ኦꬆፐ፥ ኦን ኤር ኡንቱንቱፐ አማሬዳዋንታ አሸናን አግከ። 15 አያዉ ጎፐ፥ ጾሳይ ኡንቱንታ እጼዳ ዎደ፥ ሀ አላሚ ጾሳና ስገቴዳ። ያትና ጾሳይ ኡንቱንታ ሺሽ አክያ ዎደ፥ ሀይቄዳዌ ደኡዋ ደማናፐ አትን፥ አዬ ሀናኔ?
16 ኮይሮ አይፈ ባጋ ሙናቃይ አንጀቴዳዋ ግዶፐ፥ ሙመ ሙናቃይካ ቃይ አንጀቴዳዋ ግዳና፤ እት ምꬃ ጻጱ አንጀቴዳዋ ግዶፐ፥ ሀይꬃይ ኡባይካ ቃይ አንጀቴዳዋ ግዳና። 17 ሽን ዎራን ዶሌዳ ዎጋራ ምꬃ ቃንካፐ እቱዋ እቱዋ ካሬዳሳን፥ ኔና ዎራን ዶሌዳ ዎጋራ ምꬃ ማላ ሄ ዎጋራና ጋꬅ ቃቼዶ፤ ኔን ቃይ ዛይቲ ከስያ ዎጋራ ምꬃ ጻጱዋና እትፐ ደኣ። 18 ስም ኔን ሄ ካረት ዎꬌዳ ቃንካቱዋ ቦላን ኦቶረታናዉ በሰና፤ ሽን ኔን ኦቶረትያዋ ግዶፐካ፥ ጻጱ ኔና ቶኬፐ አትን፥ ኔን ጻጱዋ ቶከናዋ አኬካ።
19 ሄዋ ድራዉ ኔን፥ “ኤ፤ ሽን ቃንካቱ ታን ኡንቱንቱ ሳኣን ገላናዳን ካረቴድኖ” ያጋና። 20 ሄዌ ቱማ፤ ኡንቱንቱ አማንቤና ድራዉ፥ ካረቴድኖ፤ ኔን አማኔዳ ድራዉ፥ ሄ ሳኣን ኤቃዳ። ሽን ያያፐ አትን፥ ኦቶሮ ቆፋ ቆፖፓ። 21 አያዉ ጎፐ፥ ጾሳይ መታ ቃንካ ማላትያዋንቶ፥ አይሁዳቶ ቃረትቤናዋ ግዶፐ፥ ነዉ ቃረትያዋ ማላቲ?
22 ስም ጾሳ ኬካተꬃነ ጻላተꬃ በአ። ኩንዴዳዋንቶ እ ጻላ፤ ሽን ኔን አ ኬካተꬃን ምናደ ደኦፐ፥ እ ነዉ ኬካ፤ ሄዌ ꬋዮፐ፥ ኔንካ ቃይ ቃንጸታና። 23 አይሁዳቱካ ቃይ አማነናን እጽያዋ አጎፐ፥ ጾሳይ ካሰ ኡንቱንቱ ደእያ ሳን ዛሪደ ዎꬃና፤ አያዉ ጎፐ፥ እ ኡንቱንታ ዛሪደ ዎꬃናዉ ዳንዳዬ። 24 አያዉ ጎፐ፥ ጾሳይ ህንተንታ ዎራን ደእያ ኮይሮ መታ ዎጋራ ምꬃፐ ቃንጺደ፥ ህንተንቱ መታን ዎራን ዶሎዋንቱዳን ግደናን ጋደን ቶኬዳ ዎጋራ ምꬃና ጋꬅ ኦይꬄዳዋ ግዶፐ፥ ያትና፥ ሄ ካረት ዎꬌዳ ኮይሮ መታ ቃንካቱዋ ዛረꬂደ፥ ኡንቱንታ ኮይሮ መታን ዶሌዳ ባረንቱ ዎጋራ ምꬃና ጋꬅ ቃቻናዉ፥ አ አዬ ጾናናዌ?
ጾሳ ማሮታይ ኡባሳ
25 ታናዳን አማንያዋንቶ፥ ታን ህንተ ኤራናዳን ኮይያ ቱሙ ጹራ የዉ ደኤ፤ ሄዌ ህንተ ህንተንታ ህንተረካ፥ ኑን አꬌዳ ኤራንቻ ያጊደ ቆፕያዋ ድጌ፤ እስራኤልያ አሳፐ ባጋይ ስሰናን እጼዳ፤ ሽን ሄ ስሰናን እጽያዌ አይሁዳ ግደና አሳ ኩመንꬃ ፓይዱ ጾሳኮ ጋካናዉ ጋምአና። 26 ሀዋዳንካ፥ እስራኤልያ አሳይ ኡባይ አታና፤ ጾሳ ማጻፋይ ሀዋዳን ያጌ፤
“አሽያዌ ጽዮነ ጌተትያ ካታማፐ ዪደ፥
ናጋራ ኦሱዋ ኡባ ያቆባ ዛርያፐ ድጋና። ኢሳ. 59:20
27 ታን ኡንቱንቱ ናጋራ አቶ ያግያ ዎደ፥
ኡንቱንቱና ገላና ቃላ ጫቁ ሀዋ”
ያጌ።ኤር. 31:33-34
28 አይሁዳ ግደና አሳቶ፥ አይሁዳቱ ዎንጋላ ምሽራቹዋ ባጋና ህንተ ድራዉ፥ ጾሳና ሞርከ፤ ሽን ጾሳ ዶሩዋ ባጋና አዎቱዋ ድራዉ፥ ኡንቱንቱ እ ሲቅያዋንታ። 29 አያዉ ጎፐ፥ ጾሳይ ባረ እሜዳዋ ጉየ አከና፤ ቃይ ባረ ጼሴዳዋ እጻድ ጌና። 30 አይሁዳ ግደናዋንቶ፥ ጾሳዉ ህንተ ካሰና አዛዘትበይክታ፤ ሽን አይሁዳቱ አዛዘተናን እጼዳ ድራዉ፥ ጾሳ ማሮተꬃ ሀእ ህንተ አኬድታ። 31 ሀዋዳን፥ ህንተ አኬዳ ማሮተꬃ ድራዉ፥ አይሁዳቱ ቃይ ጾሳ ማሮተꬃ ሀእ አካናዳን፥ ጾሳዉ አዛዘተናን እጼድኖ። 32 አያዉ ጎፐ፥ ጾሳይ አሳ ኡባ ማራና ማላ፥ አሳይ ኡባይ አዉ አዛዘተናን እጽያ ሀኖታን ቃቼዳ።
33 ጾሳ ዱረተꬃይ ዎይሳ ኬና ዳሬ? አ አꬎ ኤራተꬃይነ አ ኤራተꬃይ ዎይሳ ኬና ጪሜ? አ ፕርዳ ኦዳናዌ ኦኔ? እ ባረ ኦꬅያዋ አያዉ ኦꬅንቶ፥ ኦኔ አኬክያዌ?ኢሳ. 55:8 34 ሄዋ ጾሳ ማጻፋይ፥ “ጎዳ ዎዛና ኤርያዌ ኦኔ? አ ዞራናዉ ዳንዳይያዌ ኦኔ?ኢሳ. 40:13 35 ዎይ ባረ ኩሽያ ዛራና ማላ፥ አዉ እትባ እሜዳዌ ደኢ?” ያጌ። ኢዮባ 41:11
36 አያዉ ጎፐ፥ ኡባባ እ መꬌዳ፤ ቃይ ኡባባይካ አ ማታንነ አዉነ ደኤ፤ ጾሳዉ መꬍናዉ ቦንቹ ግዶ። አመንእ። 1 ቆሮ. 8:6