1 አሳይ ኡባይ ጋድያ አይስያዋንቶ ኤኖ ጋናዉ በሴ፤ አያዉ ጎፐ፥ ጾሳይ ጌናን ደእሽን፥ ጋድያ አይስያዌ ደአናዉ ዳንዳየና። ሀእ ደእያ አይስያዋንቱካ ጾሳይ ዎꬄዳዋንታ። 2 ሄዋ ድራዉ፥ ሀእ ደእያ አይስያዋንታ እጽያ ኦንነ ጾሳ አዛዙዋ እጼ፤ ባረ ቦላ ፕርዳ አሄ። 3 አያዉ ጎፐ፥ አይስያዋንቱ ኢታባ ኦꬅያዋንታ ያሻናዋፐ አትን፥ ሎኦባ ኦꬅያዋንታ ያሽክኖ። አይስያዎ ያየናን አጋናዉ ኮያይ? ያቶፐ ሎኦባ ኦꬃ፤ እ ኔና ጋላታና። 4 አያዉ ጎፐ፥ እ ነዉ ሎኦባ ኦꬃናዉ፥ ጾሳዉ ቆማ። ሽን ኔን ኢታባ ኦꬆፐ፥ ኢታባ ኦꬄዳዋ እ ሴርያ ድራዉ፥ አዉ ያያ፤ እ ጾሳ ቆማ። ቃይ ኢታባ ኦꬅያዋንቱ ቦላ ጾሳ ሀንቁዋ እ አሄ። 5 ሄዋ ድራዉ፥ ጋድያ አይስያዋንቶ ኤኖ ግያዌ ጾሳ ሙራ ጻላላሳ ግደናን፥ ህንተንቱ ዎዛና ቆፋ ድራዉካ ኤኖ ጋናዉ በሴ።

6 አያዉ ጎፐ፥ ጋድያ አይስያዋንቱ ባረንቱ ኦሱዋ ኦꬅያ ዎደ፥ ጾሳዉ ኦꬅያ ድራዉ፥ ህንተ ቃራጻ ቃንጽያዌ ሄዋሳ። 7 ኡባ አሳዉካ በስያዋ እምተ። ጊራ ጊራናዉ በስያዎ ጊርተ፤ ቃራጻ ቃንጻናዉ በስያዎ ቃንጽተ፤ ያያናዉ በስያዎ ያይተ፤ ቦንቹ በስያዋ ቦንችተ።

8 ህንተንቱ እቱ እቱዋና ሲቀታናፐ አትን፥ ሀራ አጩ ኦ ቦላንነ ደኦፖ። አያዉ ጎፐ፥ ሀራ ሲቅያ ኦንነ ህጊ ግያዋ ፖሌዳ። 9 “ዎሹሞፓ፤ ዎꬎፓ፤ ዉኦፓ፤ አሳባ አሞቶፓ” ግያ አዛዛቱነ ሀራ አዛዛቱ ኡባቱ፥ “ነ ሾሩዋ ነ ሁጲያዳን ሲቃ” ግያ አዛዙዋን ኩሚኖ። ከሳ 20:13-15፣ 17፤ ዛረ. 5:17-19፣ 21፤ ዎጋ 19:18 10 ባረ ሾሩዋ ሲቅያ ኦንነ አዉ ኢታባ ኦና፤ ሄዋ ድራዉ፥ ሾሩዋ ሲቅያዌ ህግያ ኡባዉ ኤኖ ግያዋ።

11 ገምእሹዋፐ ህንተ ቤጎትያ ሳቲ ሀእ ጋኬዳ ድራዉ፥ ሀ ዎድያ አኬክተ። አያዉ ጎፐ፥ ኑን ኮይሮ አማኔዳ ዎድያፐ፥ ኑን አትያ ዎዲ ሀእ ኑኮ ማታቴዳ። 12 ቃማይ አꬋናዉ ሀኔ፤ ጋላሳይ ማታቴዳ። ስም ኑን ꬉማ ኦሱዋ አጊደ፥ ፖኡዋን ኦለታናዉ፥ ኦላ ሚሻ ማዮይተ፤ 13 ጋላስ ፖኡዋን ደእያ አሳዳን፥ አነ ማራ ደኦይተ። የꬃንነ ማꬁዋን ግዶፖ፤ ዎሹሙሳንነ ዎሹማናዉ ካጄሉሳና ግዶፖ፤ ፓሉማንነ ቃናትያን ግዶፖ። 14 ሽን ጎዳ የሱስ ክርስቶሳ፥ ኦላ ሚሻ አ ማይተ፤ ህንተ ናጋራንቻ አሳተꬃይ ባረ ዎዛና አሙዋ ፖላናዳን፥ አዉ ቆፖፕተ።