1 ሄዋፐ ጉይያን፥ ታናና ሃሳዬዳ ኪታንቻይ ስም ዪደ፥ ገምእሼዳ አሳ ቤጎꬅያዋዳን፥ ታና ቤጎꬄዳ። 2 እ ታና፥ “ኔን በእያዌ አዬ?” ያጌዳ።

ታን፥ “ታን ዎርቃ ጻላላፐ ኦሰቴዳ ጾምፕያ ዎꬅያ ባላ በአይ፤ አ ጼራን ዛይትያ ጻሩ ደኤ፤ ቃይ አ ቦላን ላፑን ጾምፐቱ ደኢኖ፤ ሄ ላፑን ጾምፐቶካ ላፑን ላፑን ሉኮቱ ደኢኖ። 3 ሄ ጾምፕያ ዎꬅያ ባላ ማታን ላኡ ዎጋራቱ ደኢኖ፤ ኡንቱንቱ ዛይትያ ጻሩዋፐ ኡሸቻ ባጋናነ ሀድርሳ ባጋና ደኢኖ” ያጋድ። ሳፃ 11:4

4 ታን ታናና ሃሳይያ ኪታንቻ ቃይካ፥ “ታ ጎዳዉ፥ ሀዋንቱ አዬ?” ያጋደ ኦቻድ።

5 ታናና ሃሳይያ ኪታንቻይ ዛሪደ፥ “ሀዋንቱ አየንቶ ኤርኪ?” ያጌዳ።

ታን፥ “ታ ጎዳዉ፥ ታን ኤርከ” ያጋድ።

6 ቃይካ እ፥ “ዛሩባቤላዉ መꬍና ጎዳይ ኦዴዳ ቃላይ ሀዋ፤ ‘ታ አያናናፐ አትና፥ ዎልቃን ዎይ ምኖተꬃን ግደና። ታን ኡባፐ ዎልቃማ መꬍና ጎዳይ ሀዋ ኦዳይ። እዝራ 5:2 7 ዎልቃማ ደርያዉ፥ ኔን አዬ? ኔን ዛሩባቤላ ስንꬃን ልጲ ጌዳ ደምባ ግዳና። ቃይ ዛሩባቤል ጌሻ ጎልያ ኬጽ ፖሊደ፥ ዉርሰꬃ ሹቻ ፑደ ከስያ ዎደ አሳይ፥ “ሀሹ! ሀሹ ፖለቴ!” ያጋና’ ያጌዳ።”

8 ቃይካ መꬍና ጎዳ ቃላይ ዛካራሳኮ ዬዳ። 9 ዛካራስ ሀዋዳን ያጌዳ፤ “ሀ ጌሻ ጎልያ ባሱዋ ዛሩባቤላ ኩሸቱ ባሴድኖ፤ ቃይ ፖሉዋካ አ ኩሸቱ ኬጺደ ፖላና። ሄዋፐ ጉይያን፥ ኡባፐ ዎልቃማ መꬍና ጎዳይ ታና ህንተኮ ኪቴዳዋ ህንተ ኤራና። 10 ሀ ጉꬃ ዶመꬃ ካꬍያ ኦናነ ግዶፐ ዛሩባቤላ ኩሽያን ቱምቢያ በኤዳ ዎደ ናሸታና፤ ሀዋንቱ ላፑን ጾምፐቱ ቢታ ኡባ ዩዪደ ጼልያ መꬍና ጎዳ አይፈቱዋ” ያጌዳ። ሳፃ 5:6

11 ታን ኪታንቻ ዛራደ፥ “ሀ ጾምፕያ ዎꬅያ ባላፐ ኡሸቻ ባጋናነ ሀድርሳ ባጋና ደእያ ሀ ላኡ ዎጋራቱ አዬ?” ያጋደ ኦቻድ። ሳፃ 11:4 12 ታን ላኤንꬁዋካ፥ “ሀ ዛይቲ ኡንቱንቱፐ ጎግያ ላኡ ዎርቃ ቦምባቱዋ ማታን ደእያ ላኡ ዎጋራ ታሸቱካ አዬ?” ያጋደ ኦቻድ።

13 እካ ዛሪደ፥ “ሀዋንቱ አየንቶ ኔን ኤርኪ?” ያጌዳ።

ታንካ፥ “ታ ጎዳዉ፥ ታን ኤርከ” ያጋድ።

14 እ ዛሪደ፥ “ሀዋንቱ ሳኣ ኡባ ጎዳዉ ኦꬅያ፥ ላኡ ኦከቴዳ አሳቱዋ” ያጌዳ።