1 ቃይካ ታን ꬎቁ ጋደ ጼልያ ዎደ፥ እት ጻጸት ኡቴዳ ማጻፋይ ቦላና ፓልያዋ በኣድ።

2 ኪታንቻይ ታና፥ “ሀ ኔን በእያዌ አዬ?” ያጊደ ኦቼዳ።

ታን፥ “ታን እት ጻጸት ኡቴዳ ፓልያ ማጻፋ በአይ፤ አዉ ጌሳይ ላታሙ ዋꬋ፤ ጎምፓይካ ታሙ ዋꬋ” ያጋድ።

3 እ ታና ሀዋዳን ያጌዳ፤ “ሀ ጻꬃ ማጻፋ ግዶን ደእያዌ ቢታ ኡባ ቦላን ይያ ሸቃ። ሄ ማጻፋን እት ባጋና፥ ‘ዉእያ ኡባይ ጋድያፐ ꬋያና’ ያግያዌ ጻፈቴዳ፤ ቃይ የንኮ ባጋና፥ ‘ዎርዱዋን ጫቂያ ኡባይ ꬋያና’ ያግያዌ ጻፈቴዳ። 4 ኡባፐ ዎልቃማ መꬍና ጎዳይ ሀዋዳን ያጌ፤ ‘ታን ሄ ሸቃ ኪታና፤ እ ቢደ፥ ካይሱዋ ሶነ ታ ሱንꬃን ዎርዱዋን ጫቂያዋ ጎለ ገላና፤ ያን ደኢደ፥ ሄ ጎልያ እ ኬጸቴዳ ምꬃናነ ሹቻና ጋꬂደ፥ ም ꬋይሳና’ ያጌ” ያጌዳ።

5 ሄዋፐ ጉይያን፥ ሄ ታናና ሃሳይያ ኪታንቻይ ታኮ ዪደ፥ “አነ ꬎቁ ጋደ፥ ሀ ይያዌ አየንቶ በአ” ያጌዳ።

6 ታን፥ “እ አዬ?” ያጋደ ኦቻድ።

እ ዛሪደ፥ “ሀዌ ማክያ ቁንኣ” ያጌዳ። ቃይካ ጉጂደ፥ “ሀዌ አሳይ ሀ ቢታ ኡባን ኦꬄዳ ናቁዋ ማላታ” ያጌዳ።

7 እርሳስያ ግያ ብራታፐ ኦሰቴዳ ቁንኣ ቁምኢ ፖከቴዳ ዎደ እት ምሽራታ ቁንኣ ግዶን ኡቴዳኖ በኣድ። 8 ኪታንቻይ ታዉ ኦዲደ፥ “ሀና ኢታተꬃቶ ጌተታዉ” ያጌዳ። እዞ ጉየ ቁንኣ ግዶ ሱግ ገልሲደ፥ እርሳስያ ቁምእያካ ዱገ ናቂደ፥ ቁንኣ ቁምኤዳ።

9 ሄዋፐ ጉይያን፥ ታን ꬎቁ ጋደ ጼልያ ዎደ፥ ኡንቱንቱ ቀፍያን ጫርኩ ደእያ ላኡ ማጫ አሳቱ ይያዋንታ በኣድ፤ ኡንቱንቱ ቀፊ ሾርትያ ቀፍያ ማላ። ኡንቱንቱ ሄ ኬሻ ሳኣፐነ ሳሉዋፐ ግዶ ፑደ ደንꬄድኖ።

10 ያትና፥ ታን ታናና ሃሳይያ ኪታንቻ፥ “ሀዋንቱ ቁንኣ ሀቃ አፊኖ?” ያጋደ ኦቻድ።

11 እ፥ “ኡንቱንቱ ቁንኣ ጎልያ ኬጻናዉ ባብሎነ ቢታ አፊኖ፤ ጎሊ ኬጸቴዳ ዎደ፥ ኡንቱንቱ ሄ ቁንኣ አዉ ጊጌዳ ሳኣን ዎꬃና” ያጌዳ።