1 ቃይካ ታን ꬎቁ ጋደ ጼላድ፤ ጼልያ ዎደ ኦይዱ ፓራ ጋረቱ ላኡ ደረቱዋፐ ግዱዋና ይያዋንታ በኣድ፤ ደረቱካ ቃይ ናሃሰ ግያ ብራታ ደረቱዋ። 2 ኮይሮ ፓራ ጋርያ ዞኦ ፓራቱ ጎቺኖ፤ ላኤንꬆ ፓራ ጋርያ ካረꬃ ፓራቱ ጎቺኖ፤ ሳፃ 6:4፣ 5 3 ሄዘንꬆ ፓራ ጋርያ ቦꬃ ፓራቱ ጎቺኖ፤ ኦይደንꬆ ፓራ ጋርያ ዋንጮ ፓራቱ ጎቺኖ፤ ኡንቱንቱ ኡባቱካ ዎልቃማ። ሳፃ 6:2 4 ታን ታናና ሃሳይያ ኪታንቻ፥ “ታ ጎዳዉ፥ ሀዋንቱ አዬ?” ያጋደ ኦቻድ።

5 ኪታንቻይ፥ “ሀዋንቱ ሳኣ ኡባ ጎዳ ስንꬃን ባረና ሺሺደ ከስያ ኦይዱ ሳሉዋ ጫርኮቱዋ። ሳፃ 7:1 6 ካረꬃ ፓራቱ ጎችያ ጋሪ ሁጲሳ ባጋ ቢታ ቤ፤ ቦꬃ ፓራቱ ጎችያ ጋሪ አዋይ ዶልያ ባጋ ቤ፤ ዋንጮ ፓራቱ ጎችያ ጋሪ ቃይ ገድሳ ባጋ ቤ” ያጊደ ዛሬዳ። 7 ሄ ፓራቱ ከሴዳ ዎደ፥ ቢታ ኡባ ዩዪደ ጾሞሳናዉ ፓቹሪኖ። ኪታንቻይ ኡንቱንታ፥ “ቢተ፥ ቢታ ኡባ ዩዪደ ጾሞስተ” ያጌዳ። ኡንቱንቱ ቢታ ኡባ ዩዪደ ዎቼድኖ። 8 ሄዋፐ ጉይያን፥ ኪታንቻይ ባረ ቃላ ꬎቁ ኦꬅ ታኮ ዋሲደ፥ “በአ፥ ሁጲሳ ባጋ ቢታ ቤዳ ፓራቱ ባረንቱ ቤዳ ሁጲሳ ባጋ ጋድያን ጾሳ አያና ሸምፕሴድኖ” ያጌዳ።

9 መꬍና ጎዳ ቃላይ ታኮ፥ ቃይካ ሀዋዳን ያጊድ ዬዳ፤ 10 “ባብሎነ ኦሞዱዋፐ ስሜዳ ሄልዳይ፥ ጾቢነ ያዳይ እምያ እሞታ አካ፤ ሄ ጋላስካ ጻፋንያ ናኣ እዮስያሳ ጎለ ባ። 11 ኡንቱንቱፐ አኬዳ ብራፐነ ዎርቃፐ ካላቻ መꬋ፤ እዮጸዴቃ ናኣ፥ ቄስያ ኡባቱ ካፑዋ ኢያሱ ሁጲያን ዎꬃ። 12 አዉ፥ ‘ኡባፐ ዎልቃማ መꬍና ጎዳይ ሀዋዳን ያጌ፤ “በአ፥ አ ሱንꬃይ ታሽያ ጌተትያ እት ብታኒ ባረ ደእያ ሳን ድጫና፤ እ መꬍና ጎዳ ጌሻ ጎልያ ዛር ኬጻና። ኤር. 23:5፤ 33:15፤ ዛካ. 3:8 13 መꬍና ጎዳ ጌሻ ጎልያ ኬጻናዌ አ፤ እ ካትያዳን ቦንቹዋ ማዪደ፥ ባረ ካተቱዋ አራታን ኡታናነ ሞዳና። ቃይ እ ባረ አራታን ኡቲደ ቄሰተꬃን ኦꬃና፤ ኡንቱንቱ ላኡ ባረንቱ ቆፋን እቱዋ ግዳና” ያጌ’ ያጋ። 14 ሄ ካላቻይ ሄልዳያ፥ ጾቢያ፥ ያዳያነ ጻፋንያ ናኣ እዮስያሳ ሀሳይስያዋ ግዲደ፥ መꬍና ጎዳ ጌሻ ጎልያን ደአና” ያጌዳ።

15 ሄ ዎደ ሃኮ ሳን ደእያዋንቱ መꬍና ጎዳ ጌሻ ጎልያ ኬጺደ ማዳናዉ ያና። ኡባፐ ዎልቃማ መꬍና ጎዳይካ ታና ህንተኮ ኪቴዳዋ ህንተ ሄዋን ኤራና። መꬍና ጎዳዉ፥ ህንተ ጾሳዉ፥ ህንተ ፖሎ አዛዘቶፐ፥ ሄዌ ሀናና።