1 ዳርዮሰ ካተቴዳ ኦይደንꬆ ላይꬃን፥ ክስሌዋ ግያ ኡዱፑንꬃ አግናን፥ ኦይደንꬆ ጋላሳን መꬍና ጎዳ ቃላይ ዛካራሳኮ ዬዳ። 2 ቤቴለ ካታማ አሳይ ሳርጼጸና፥ ረጌም-መለካነ ኡንቱንቱና እትፐ ደእያ አሳቱዋ መꬍና ጎዳፐ አንጁ ያና ማላ ዎሳናዉ ኪቴድኖ። 3 ቃይ ኡባፐ ዎልቃማ መꬍና ጎዳ ጌሻ ጎልያን ኦꬅያ ቄሳቱ ዋነ ትምቢትያ ኦድያዋንታ፥ “ዳሮ ላይꬃፐ ኦꬃደ ጋምኤዳዋዳን፥ ታን ሀእካ አገናን እቼሸንꬆ አግናን ዬካናዉነ ጾማናዉ በሲ?” ያጊደ ኦቻናዳን ኪቴድኖ።

4 ሄዋፐ ጉይያን፥ ኡባፐ ዎልቃማ መꬍና ጎዳ ቃላይ ሀዋዳን ያጊድ ታኮ ዬዳ፤ 5 “ቢታን ደእያ አሳ ኡባነ ቄሳቱ ዋ ሀዋዳን ያጋደ ኦቻ፤ ‘ህንተ ሄ አꬌዳ ላፑን ታሙ ላይꬃ ግዶን እቼሸንꬆ አግናንነ ላፑንꬃ አግናን ጾሜዳዋነ ዬኬዳዋ ታዉ ጾሜድቴ? 6 ህንተ ምያ ዎደነ ኡሽያ ዎደ፥ ህንተንቶ ሚታነ ኡሺታ ግደኔ። 7 የሩሳላመ ካታማንነ አ ዩሹዋን ደእያ ካታማቱዋን አሳይ ደኤዳ ዎደ፥ ኡንቱንቱ እሻሊደ ደኤዳ ዎደነ ኔጌበንነ አዋይ ዶልያ ባጋ ዝቃ ጋድያን አሳይ ደኤዳ ዎደ፥ መꬍና ጎዳይ ባረ ትምቢትያ ኦድያዋንቱ ባጋና ኦዴዳ ቃላይ ሀዋ ግደኔ?’ ያጋ” ያጌዳ።

8 መꬍና ጎዳ ቃላይ ቃይካ ዛካራሳኮ ሀዋዳን ያጊድ ዬዳ፤ 9 “ኡባፐ ዎልቃማ መꬍና ጎዳይ ካሰ ሀዋዳን ያጌዳ፤ ‘ቱሙ ፕርዳ ፕርድተ። ህንተ ግዶን እቱ እቶ ኬካተꬃነ ማሮተꬃ ኦꬅተ። 10 አምኤቱዋ፥ አታ አዉ ባይና ናናቱዋ፥ በተቱዋነ ህዬሳቱዋ ናቆፕተ። ቃይ ህንተፐ ኦንነ ባረ እሻ ቦላን ኢታባ ኦꬃናዉ ባረ ዎዛናን ቆፖፖ’ ያጌዳ” ያጊድ ዬዳ።

11 ሽን ኡንቱንቱ ስሰናን እጼድኖ፤ ቃይ ዞክያ ዛሬድኖነ ስሰናዳን፥ ባረንቱ ሀይꬃካ ቱጬድኖ። 12 ኡባፐ ዎልቃማ መꬍና ጎዳይ ባረ አያናን ካሰ ባረ ትምቢትያ ኦድያዋንቱ ባጋና ኪቴዳ ህግያነ ቃላ ስሰና ማላ፥ ኡንቱንቱ ባረንቱ ዎዛና ዛላዳን ምንሴድኖ። ሄዋ ድራዉ፥ ኡባፐ ዎልቃማ መꬍና ጎዳ ማታፐ ዎልቃማ ሀንቁ ኡንቱንቱ ቦላ ዬዳ።

13 ኡባፐ ዎልቃማ መꬍና ጎዳይ ሀዋዳን ያጌ፤ “ታን ጼሴዳ ዎደ፥ ኡንቱንቱ ስሰናን እጼዳዋዳን፥ ኡንቱንቱ ጼሴዳ ዎደ፥ ታንካ ስስከ። 14 ታን ጎትያ አሃደ፥ ኡንቱንታ ኡንቱንቱ ኤርቤና ካዉተꬃቱዋ ግዶን ላላድ፤ ቢታይ አሳይ ያነ ሃነ ስመረተና መላ ቢታ ግዴዳ፤ ሄዋዳን ሀኒደ፥ ሀ ሎኦ ቢታይ መላ ግዴዳ” ያጌ።