1 ኡባፐ ዎልቃማ መꬍና ጎዳ ቃላይ ቃይካ ታኮ፥ ሀዋዳን ያጊድ ዬዳ፤ 2 “ኡባፐ ዎልቃማ መꬍና ጎዳይ፥ ‘ታን ጽዮንዉ ሎይꬃ ምሸታይ፤ ታና እ ምሹ ጹጌ’ ያጌ። 3 መꬍና ጎዳይ ሀዋዳን ያጌ፤ ‘ታን ጽዮነ ስማና፤ የሩሳላመ ግዶን ደአና። ቃይ የሩሳላመካ አማነትያ ካታማ ጌተታና፤ ኡባፐ ዎልቃማ መꬍና ጎዳ ደሪ ቃይ ጌሻ ደርያ ጌተቲደ ጼሰታና’ ያጌ።

4 “ኡባፐ ዎልቃማ መꬍና ጎዳይ ሀዋዳን ያጌ፤ ‘ጭሚደ ጉፍያን ብያ አቱማ አሳይነ ማጫ አሳይ ካሰዋንቱዋዳን ቃይካ የሩሳላመ ዳባባን ኡታና። 5 የሩሳላመ ካታማ ኦገቱ ካሳ ካእያ አቱማ ናናቱዋንነ ማጫ ናናቱዋን ኩማና’ ያጌ። 6 ኡባፐ ዎልቃማይ መꬍና ጎዳይ፥ ‘ሀዌ ሀቃ አሳፐ አቴዳዋንቶ ማላልስያባ ግዶፐነ፥ ታዉ ማላልስያባ ግደና’ ያጌ ኡባፐ ዎልቃማይ መꬍና ጎዳይ። 7 ኡባፐ ዎልቃማይ መꬍና ጎዳይ ሀዋዳን ያጌ፤ ‘በእተ፥ ታን ታ አሳ አዋይ ዉልያ ባጋ ቢታፐነ አዋይ ዶልያ ባጋ ጋድያፐ አሻና። 8 ኡንቱንቱ የሩሳላመ ግዶን ደአናዳን አሀና። ኡንቱንቱ ታ አሳ ግዳና፤ ታንካ ኡንቱንቱ ጾሳ፥ አማነትያነ ጽሎ ጾሳ ግዳና’ ያጌ” ያጊድ ዬዳ።

9 ኡባፐ ዎልቃማ መꬍና ጎዳይ ሀዋዳን ያጌ፤ “ህንተኖ፥ ኡባፐ ዎልቃማ መꬍና ጎዳ ጌሻ ጎልያ ባሱዋ ባስያ ጋላሳፐ ዶሚደ፥ ትምቢትያ ኦድያዋንቱ ኦዴዳ ቃላ ስሴዳዋንቶ፥ ህንተ ኩሽያ ምንሲደ ፖልተ። 10 አያዉ ጎፐ፥ ሄ ጋላሳቱዋፐ ካሰ ባጋን አሳዉ ድርጉ ባዋ፤ መህያዉካ ከራ ጭጋይ ባዋ፤ ቃይ ታን አሳ ኡባ እቱዋ እቱዋ ቦላ ሞርከተꬃን ደንꬃ ዎꬄዳ ድራዉ፥ ገልያዋዉነ ከስያዎ ሳሩ ባዋ። 11 ሽን ሀእ ታን ሀ አሳፐ አቴዳዋንታ ካሰ ኦꬄዳዋዳን ኦꬅከ። ታን ኡባፐ ዎልቃማ መꬍና ጎዳይ ሀዋ ኦዳይ።

12 “ኡንቱንቱ ባረንቱ ዘረꬃ ሳሩዋን ዘራና፤ ኡንቱንቱ ዎይንያ ቱራይካ ባረ አይፍያ አይፋና፤ ቢታይካ ካꬃ ዳርሲደ ሞካና፤ ሳሎቱካ እራ ቡካና። ሀ አሳፐ አቴዳዋንቶ ታን ሀ ኡባ አንጁዋ እማና። 13 ህንተኖ ይሁዳ አሳቶ፥ ህንተኖ እስራኤልያ አሳቶ፥ ካዉተꬃቱዋ ግዶን ህንተ ሸቀቴዳዋንታ ግዲደ ደኤድታ፤ ሽን ሀእ ታን ህንተና አሻና፤ ህንተካ አንጀቴዳዋንታ ግዳና። ያዮፕተ! ህንተ ኩሽያካ ምንስተ!” ያጌ።

14 ኡባፐ ዎልቃማ መꬍና ጎዳይ ሀዋዳን ያጌ፤ “ህንተ ማይዛ አዎቱ ታና ሀንቀꬄዳ ዎደ፥ ኡንቱንቱ ቦላን ኢታባ አሀና ጋደ ቃቼዳ ቆፋ ላመናን ኦꬄዳዋዳን፥ 15 ሄዋዳንካ ሀእ ታን የሩሳላመዉነ ይሁዳዉ ሎኦባ ኦꬃናዉ ቆፋ ቃቻድ። ስም ያዮፕተ! 16 ህንተ ኦꬃናዉ ኮሽያዌ ሀዋንታ: እቱ እቱዋና ቱሙዋ ሃሳይተ፤ ህንተ ፕርዳ ጎልያንካ ቱሙዋነ ሳሩዋ አህያ ፕርዳ ፕርድተ፤ ኤፈ. 4:25 17 እቱ እቱዋ ቆሀናዉ ኢታባ ህንተ ዎዛናን ማቀቶፕተ፤ ዎርዱዋን ጫቂያዋ ዶሶፕተ። ሄዋንታ ኡባ ታን መꬍና ጎዳይ እጻይ” ያጌ።

18 ኡባፐ ዎልቃማ መꬍና ጎዳ ቃላይ ቃይካ ታኮ፥ ሀዋዳን ያጊድ ዬዳ፤ 19 “ኡባፐ ዎልቃማ መꬍና ጎዳይ ሀዋዳን ያጌ፤ ‘ኦይደንꬆ፥ እቼሸንꬆ፥ ላፑንꬆነ ታማንꬆ አግናቱዋን ህንተ ጾሜዳ ጾማቱ ይሁዳ አሳዉ ፓሽክስያ ዎደነ ናሸችያ ግብራ ግዳናዋ። ሄዋ ድራዉ፥ ህንተ ቱማተꬃነ ሳሮተꬃ ዶስተ’ ያጌ።

20 “ኡባፐ ዎልቃማ መꬍና ጎዳይ ሀዋዳን ያጌ፤ ‘አሳይ፥ ኡባ ቃይ ዳሮ ካታማቱዋን ደእያ አሳይ ብሮ የሩሳላመ ያና። 21 እት ካታማን ደእያ አሳይ ሀራ ካታማን ደእያ አሳኮ ቢደ፥ “መꬍና ጎዳ አንጁ ያና ማላ ዎሳናዉነ ኡባፐ ዎልቃማ መꬍና ጎዳ ኮያናዉ አነ ቤቶ፤ ታንካ ባይ” ያጋና። 22 ቃይ ዳሮ አሳይነ ዎልቃማ ካዉተꬃቱ ኡባፐ ዎልቃማ መꬍና ጎዳ ኮያናዉነ ዎሳናዉ የሩሳላመ ያና’ ያጌ።

23 “ኡባፐ ዎልቃማ መꬍና ጎዳይ ሀዋዳን ያጌ፤ ‘ሄ ጋላሳቱዋን ዱማ ዱማ ቃላን ሃሳይያ ካዉተꬃቱዋ ኡባፐ ታሙ አሳቱ ዪደ፥ እት አይሁዳ ብታንያ ማዩዋ ማጫራ ኦይቂደ፥ “ጾሳይ ህንተናና ደእያዋ ኑን ስሴዳ ድራዉ፥ አነ ኑንካ ኔናና ቤቶ” ያጋና’ ያጌ” ያጊድ ዬዳ።