2
1 E Bayuda! Langiizi ku migazi!
Si hali mu yija indumwa ígweti igaleeta imyazi miija yoꞌmutuula!
Aaho! Mugirage isiku ngulu!
Na ngiisi byo mukalagaania Rurema, mubikwizagye.
Banangora-mabi, batâye ki teere ikihugo kiinyu.
Mukuba, ngabashereeza lwoshi-lwoshi!
2 E kaaya keꞌNinaawi! Langiiza! Abagoma bagayiji kuteera.
Mulangage akaaya kazitire! Mulaliire ku mitalimbwa!
E maashi! Mukenyere, munasikame, munayibiike ibiringiini ukulwa!
3 Ikyanya abanyazi bakateera Abayuda, banabasiga maboko mamaata,
banabashereegeza kiri neꞌndalo zaabo zeꞌmizabibu.
Kundu kwokwo, Rurema akalagaania Abahisiraheeri kwo agaki bagalulira ubulangashane bwabo.
Kiri naꞌBayuda kwakundi, Nahano akola agabagalulira ubweꞌmwabo.
4 E Baninaawi! Indwani zaꞌbagoma biinyu, zifumbiiti isiribo ndukula, neꞌbyambalwa bidukula.
Ikyanya zikola mu yitegaanura, amagaare gaazo giꞌzibo gali mu ba gakeyengiini.
Zifumbiiti amatumu gaazo, zinagalengeziizi hiꞌgulu.
5 Amagaare gaazo giꞌzibo, gagweti gagasuula umulindi mu njira za mu kaaya, na mu zeꞌbutambi lyako.
Zinagweti zigayilyemuza nga mbigi za muliro,
zinagweti zigasuula umulindi nga biryamu.
6 Mwami weꞌNinaawi, agweti agatabaaza abakulu baꞌbasirikaani.
Na kundu bagweti bagatibitira imunda ali,
haliko bali mu genda bagasisiitwa.
Abagoma baabo bakwabadukira iwa luzitiro,
banalingaania ikindu kihamu kyoꞌkubakingira.
7 Lyeryo, imiryango yoꞌkugomera ulwiji, yanatikira.
Akajumiro, kanayami yihongoleka haashi.
8 Abagoma banashaaza umugisi gwo bâli kizi yikumba,
banagutwala i mahanga.
Kyo kitumiri abaja-kazi bakoli gweti bagalira-lira nga mahumba.
Banakizi yititimba-titimba ku bifuba, mu kuyerekana umwizingeerwe gwabo.
9 Si Abaninaawi bakola ngiꞌbenga íryatulika.
Kundu bali mu deta: «Mulekage ukutibita, mulekage ukutibita!»
Haliko, ndaaye úli mu yimanga.
Si booshi bali mu tibita!
10 Emwe bagoma! Si mu kano kaaya, mulyagagi akanyabungaka keꞌbindu.
Biri kandaharuurwa.
Kwokwo, mushahulage inooro, kuguma neꞌharija!
11 Duba-duba, yibyo bindu byoshi, bigweti bigashahulwa mu kaaya.
Abandu beꞌNinaawi, imitima yabo keera yahola.
Indege zitaki kaniri, si bakoli shengusiri ngana.
Banakoli yulubaliirwi i malanga!
12 Aahago! Akaaya kahamu keꞌNinaawi, kuti úkwaba?
Si kashuba nga lwala lweꞌndare!
Mwomwo, mweꞌnjuuke zeꞌndare zishuba mu longera ibyokulya.
Ifiizi yeꞌndare, ikyanya ishuba mu genda i ruhiiviro,
ndaaye mundu úshuba mu kakaza abaana baayo.
13 Ishuba mu genda, inayite inyamiishwa,
inazibaagire ibuguma lyayo, naꞌbaana baayo.
Ee! Ikyanya yayita inyamiishwa,
inyama zaazo ziri mu yijula ibundo lyayo.
14 Nahano woꞌbushobozi bwoshi adetaga kwokuno:
«E Ninaawi, ngola mugoma wawe.
Amagaare gaawe giꞌzibo, ngagajigiivya, halinde ikyusi kyago kinatutumuke.
Imisore yawe, kundu ishuba nga njuuke zeꞌndare, booshi bagafwira mwiꞌzibo,
utanâye gendi shahula ibya beene.
Kiri neꞌndumwa zaawe, zitâye shubi gendi teera abandu ikyoba.»