3
Abandu beꞌNinaawi bahera
E kaaya keꞌNinaawi! Yayewe imwawe!
Si ulyagagi mwitani, unali mutebani!
Mu kati kaawe, muyijwiri ibindu byo ukashahula!
Si wâli kizi tindimaza abandi bweneene.
Yuvwiriza ngiisi kweꞌngoni, iri twa-twa!
Amagaare giinyu giꞌzibo, gali mu girigimba,
Neꞌfwarasi ziinyu, ziri wa giriti-giriti,
Naꞌmagaare giꞌzibo gagweti gagalunduma!
Abasirikaani ábali mu gendera ku fwarasi bayiji kuteera.
Ingooti zaabo, naꞌmatumu gaabo, bigweti bigakyemula.
Keera bakamùyita mwaꞌbandu bingi.
Na buno, ibirunda bikoli ba kandaharuurwa,
halinde abasirikaani bagweti bagabisiitara-siitara kwo!
 
E Ninaawi! Ushuba bulambe woꞌmukazi!
Ushubi gweti ugalungumirwa, iri unakoleesa amaleere gaawe.
Keera ukashweka abandu beꞌbihugo bingi,
mu busambani bwawe, na mu bulozi bwawe.
Kwokwo, Nahano woꞌbushobozi bwoshi adetaga kwokuno:
«Umulondo gwawe, ngolaga ngagushonia halinde kwiꞌtwe.
Kwokwo, lyaꞌbandu baꞌgandi maami gooshi babone ubukondwe bwawe, iri banakuteeza ishoni.
Ngakufuka kwiꞌjolera,
halinde abandu booshi banakuloleere, banakunenuuke.
Ngiisi ábagakubona, bagakutibita, iri banakushekeereza kwokuno:
“Niino! Leero, Ninaawi ahongolwa ngana!
Aahago! Nyandi úgamúlirira?
Hayi tugaki longa abandu boꞌkumúholeeza?”»
 
E Ninaawi! Ka we himiri akaaya Tebeesi?
Si yako kaaya, kakayubakwa ha butambi lyoꞌlwiji Niire,
kanazungulusirwi naꞌmiiji.
Ulwiji Niire, lwâli kizi kalanga bweneene.
Naꞌmiiji gaalwo, lwo luzitiro lwako.
Abandu beꞌTebeesi, bâli biisiri umulangaaliro ku bushobozi bweꞌKuushi, na ku bweꞌMiisiri.
Bâli kizi tabaaza kandi naꞌbandu beꞌPuuti, naꞌbeꞌLibiya,
10 Kundu kwokwo, yabo bandu beꞌTebeesi nabo bakagwatwa imbohe, banatwalwa i mahanga.
Kiri naꞌbaana baage baanuke, abagoma baabo bakabatenga-tenga,
halinde banafwira mu ngiisi mashangaaniza.
Abanalushaagwa baabo booshi, bakabagaba mu kubataarira ikibare.
Abatwali baage booshi, bakabashweka iminyororo.
11 E Ninaawi! Si na naawe, leero ugalaluka.
Ugagendi looza ukuyibisha, gira abagoma batakugwate.
 
12 Inzitiro zaawe zooshi zoꞌkukukingira, zigahongolerwa haashi,
zinagwe nga bitumbwe byeꞌmitiini keera íbyayera.
Neꞌkyanya bigashaganizibwa,
biri mu yami tibukira mu kanwa ka úloziizi ukubimiragusa.
13 Abasirikaani baawe, honyo! Si booshi bakoli ba nga bakazi bazira misi!
Imiryango yeꞌkihugo kyawe, ikoli yanuusiri imbere lyaꞌbagoma baawe.
Ee ma! Umuliro keera gukajigiivya inyigaliro zaayo.
14 E bandu beꞌNinaawi! Muyibiikire ikihinda kyaꞌmiiji!
Munasikamye inzitiro ziinyu, lyo mulonga ukugooyera ikiteero.
Muyabiirage ibidaka, munabihonde naꞌmagulu,
halinde lyo mubumba amatafaari, munagayokye.
15 Yibyo byoshi, kundu mugweti mugabigira,
si baguma biinyu bagasingoolwa ngana ku muliro,
naꞌbandi banayitwe ku ngooti.
 
Mugajanganula-janganula, nga kweꞌnzige ziri mu piisa byoshi.
E bandu beꞌNinaawi! Kundu mwangaluguuka nga mahaazi, mugashaganibwa naaho.
16 Mu mwawe, abadandaza keera bakaluguuka, banakoli ba bingi ukuhima indonde.
Ehee! Yabo bagatee lya byoshi íbiri mu kihugo,
bakabuli nyerera nga nzige íziri mu balala.
17 Abalaazi baawe, kuguma naꞌbakulu, bakaluguuka
ngaꞌmahaazi ágali mu yiguga ku kibambaazi ku kyanya kyeꞌmbeho.
Haliko, ikyanya kyeꞌndara, ikyanya izuuba liri mu tunduuka,
byoshi binayami guruka, gwi! Binayami yinywerereka.
Ndaanaye úyiji ngiisi ho biri mu genda!
Abahasuriya bahimwa lwoshi-lwoshi
18 E mwami weꞌHasuriya! Si abakulu baawe keera bayitwa,
banakoli lambamiri mu luvu.
Abanalushaagwa baawe, batakiri mu shagala.
Abagunda baawe, bashabukiiri mu migazi, ndaanaye woꞌkushubi bakuumania!
19 Keera wakomeresibwa. Na buno naawe, ukola ugafwagaga!
Ikyanya abandu bali mu yuvwa ngiisi kwo wahanyagala,
bali mu koma amagasha ngana mu kushagaluka.
Si hiꞌgulu lyoꞌbulangi bwawe, yabo booshi bâli kizi libuuka. Butakanahooha!