IRA PINAPALIM TA
IRA KABA APOSTOLO
Luk ga hatahun no pir uta Iesu tano nuna Tahut na Hinhinawas (nas Luk 1.1) ma ga hapataam no pir ma iakan ra pakpakat nong i hinawas tano hinahaan harbasiai tano tahut na hinhinawas uta Karisito. Luk ga tar kaiken ra airua pakpakat bakut taar ta Tiopilas (nas no ula nianga ta Luk). Ira Pinapalim ta ira Kaba Apostolo i hinawasei dahat tano hathatahun tano lotu ma bia no lotu ga hanahaan kakari hoeh, makaia Ierusalem uras Samaria ma ukarawa abuka ta ira mutuaina sibaan tano ula hanua (Apostolo 1.8). Iakanong no suruna ta iakan ra pakpakat. I hinawasei dahat bia no lotu ga tahuat hoeh manamur tano tamtaman tut hut ta Iesu. Ira Iudeia diet ira luena mataniabar wara nurnur, io, ma no Halhaliana Tanua ga puka suur ta diet (2.1-41). Iasen no tahut na hinhinawas pai wara gaia diet ira Iudeia sena mon. Taia. No Tanua ga puka suur taar ta diet ira Samaria mah ing diet ga nurnur ta Karisito wara hamhaminis bia Kalou na halon mah diet (8.14-17; 8.25). No Tanua ga puka suur mah ta diet ing pai Iudeia diet ta dahin wara hamhaminis bia ira tunatuna tano ula hanua bakut diet tale bia diet na kap iakan ra harhalon ing bia diet na nurnur ta Karisito (10.1-11.18). I hinawasei mah dahat tano nilon ma ira pinapalim ta Pol nong ga warawai harbasiai ma no tahut na hinhinawas taar ta diet ing pai Iudeia diet kanong ira Iudeia diet ga mola sei no tahut na hinhinawas. Io hua, i tale dahat bia dahat na palai ta aring linga ta kaikek ra lotu ing Pol ga tulei ira nuna pakpakat tupas diet. Ma tiga mes na linga mah. Luk ga pakat iakan ra pir ing Pol ga kis tano hala na harpidinau aras Rom airua tinahon. Pol ga huteta bia na tur ra warkurai ma i nanaas bia Luk ga wara hamhaminis bia Pol pa ga gil tiga sakena. Ira tinirih ing ga haan tupas Pol ga hanuat kanong ira Iudeia diet ga lilik sakasaka ta Pol ma pataia bia tiga tamat ma Rom ga nas lah tiga sakena ta Pol.
1
Iesu ga haan hut uram ra mawai
1-2 Tiopilas:
Tano nugu luena nianga iau ga pakpakat uta ira linga bakut ing Iesu ga gil ma ga hauhausur tanai, tur lah makarawa ing ga hatahun no nuna pinapalim, tuk taar tano bung Kalou ga kap haut ia uram ra mawai. Manaluai mon ta ing Kalou gata kap haut lah Iesu uram ra mawai, no Halhaliana Tanua ga tar no dadas ta Iesu hua gaam pir timaan tar diet ing gata pilak lah wara nuna apostolo. Ma namur tano nuna tinirih na minaat, ga hatutun tar ta diet bia gata lon huat balin. Ga hatutun hua ma ra haleng na mangana haphapuasa. Ga puasa ta diet tuk taar bia aihat na sangahul na bung ga sakit. Ma narako ta iakano pakana bung ga iangianga utano matanitu ta Kalou. Ta nong tiga bung, ing ga ianiaan tikai ma diet, ga pir diet hoken: “Pa muat na haan laah ma Ierusalem, senbia muat na kis kahai no hartabar nong nagu Sus gata kukubus taar utana. Ma iakanong nong muat ga hadadei iau ma iau ga iangianga utana. Iau ta tangai hua kanong Ioanes ga bapitaiso ma ra taah, senbia a bar bung taar um kana ma muat na kap no bapitaiso tano Halhaliana Tanua.”
Ma ing Iesu ma ira apostolo diet ga hanuat hulungai, diet ga tiri ia bia, “Watong, hoeh, kaiken um u na hatut habalin no matanitu ta Kalou kai Israel?”
Io, Iesu ga tangai ta diet hoken: “Pai numuat linga wara nunurei ira pakana bung ing Mama gata hakilang tar kanong ia sen at i warkurai. Senbia muat na hatur kahai ra dadas ing no Halhaliana Tanua na burung muat ma muat na hasahesa ta ira tutun utagu hatahun lah makai Ierusalem ma ta ira kaba simsibaan narako Iudeia ma Samaria tuk taar tano haphapataam tano ula hanua.” Ma namur ta ing gata tangai tar kaiken, Kalou ga kap haut ia uram ra mawai ra matmataan ta diet ma ga bahit tiga baakut, hua pa diet gaam nas habal um ia.
10 Ma bia diet ga walwalar a baa bia diet na nas Iesu ing ga hananhut uram ra mawai, io, kaikek a mon airua tunatuna dir ga sigam tar ra palpalana sigasigam dir ga me tur huteta ta diet. 11 Io, dir ga tangai ta diet hoken: “Kaba tunatuna ma Galili, pai tahut bia muat tur taar kaiakai ma muat baa tadeng taar uram ra mawai. Iakan a mon ra Iesu, nong Kalou i ta kap lah ia ta muat uram ra mawai, na hanuat baal a mon hoing muat ta nas tar ia ing i hanhut hua uram ra mawai.”
Matias ga kap no mahua ta Iudas
12 Io, diet ga tapukus balin uram Ierusalem makaia tano uladih di la kilkilam ia bia no uladih Olip. Ma no uladih ga helik haruat ma tiga kilomita maram tano pisa na hala Ierusalem. 13 Ing diet ga hanuat, diet ga haan uram naliu tano sibaan tano hala diet ga kiskis baa kaia. Ma diet kaiken ing diet ga kiskis kaia: Pita, Ioanes, Jemes, ma Endru; Pilip ma Tomas, Batalomiu ma Matiu; Jemes no nati ne Alpias ma Iudas no nati ne Jemes, ma ne Saimon nong di ga kilam ia bia no Silat. * Di ga kilam ia hua kanong i nanaas bia ia tikai ta diet ing diet i la sipsip bia Israel na tur sena talur Rom waing Rom pa na kurei diet. 14 Ma diet bakut diet git saasaring hait ma tiga lilik mon, tikai ma aring hahina. Ma Maria no puasi Iesu ma ira tasina mah.
15 Ma ta kaikek ra bar bung, Pita ga tur nalamin ta diet ira kaba haratasin narako ta Karisito. (Ma no nudiet winawas ga haruat ma tiga maar ma airua sangahul.) 16 Ma ga tangai bia, “Kaba tasigu, no nianga ta Kalou nong di ga pakat ia pa ga tale bia na piel. I ta hanuat tutuna iat hoing no Halhaliana Tanua ga luena hasasei tar Dewit naluai bia na hanuat tutuna. Hua, Dewit gaam hasahesa uta ne Iudas, nong ga luai diet ing diet ga palim kahai Iesu. 17 Ma ia ga tikai ta dahat ma ga mon tiga sibaan tano nudahat pinapalim.”
18 (Ma iakan ra tunatuna gata kul tiga sibana pisa ma ira kinewa ga kap tano nuna magingin sakena. Ma ga puka pampoba kaia, no balana gaam tabisang ma ira pakona balana bakut ga taluar suur. 19 Ira mataniabar ma Ierusalem diet ga ser iakan, io, diet gaam kilam iakano sibana pisa ma ra nudiet nianga bia ‘Akeldama’, no kukuraina bia ‘Pisa na Gaap.’)
20 Ma Pita ga tangai balin bia, “Ga hanuat hua kanong ira nianga di ga pakat tano Buk na Nirudu i tangai hoken:
‘Na mumuau no ngasiana;
ma pataia tikai na kis tana.’
I tangai mah bia,
‘Tiga mesa na banot lah no nuna mahua.’
21-22 Io, hua, kaiken dahat supi bia da pilak lah tikai wara hasahesa tikai ma dahat tano tamtaman tut hut balin tano Watong Iesu. Ma na tahut bia ia tikai at ta diet ing diet ga saksakatei dahat ta ira pakana bung bakut ing no Watong Iesu ga hanahaan tikai ma dahat, hatahun ta ing Ioanes ga harharpir tano nuna bapitaiso tuk taar tano bung Kalou ga kap haut Iesu ta dahat uram ra mawai.”
23 Io, diet ga kilam ra irua tunatuna, ne Matias ma ne Iosep nong di ga kilam ia bia Barsabas (ma tiga mes na hinsana mah ne Jastus). 24-25 Namur diet ga sasaring hoken: “No Watong, uga iat u nunurei ira bala diet ira tunatuna bakut. Io, u na haminis ta mehet bia siga ta dir kaiken u ta pilak lah ia wara banbanot lah iakan ra mahua tano pinapalim na apostolo nong Iudas ga haan talur ia wara hinahaan taar tano nuna sakana sibaan tus.” 26 Io, diet ga mamagu ma ra mangana haat hoing ra satu, ma no haat ga tuka haminis bia Matias. Io, diet ga was tikanei um ia ma ira sangahul ma tikai na apostolo.

*1:13 Di ga kilam ia hua kanong i nanaas bia ia tikai ta diet ing diet i la sipsip bia Israel na tur sena talur Rom waing Rom pa na kurei diet.