1 ታ ሲቆቶ! ታኒ ኢንቴስ ፃፊሺን ሃይሲ ናምዓንꬆ ኪታ። ታኒ ኢንቴስ ናምዑ ኪታታካ ፃፊዳይ ሃይታ ሃ ዮዖታ ኣኬኪ ኤኪዲ ኢንቴ ሱሬ ቆፋ ቆፓና ማላ ኢንቴና ቤጎꬃና ጋዳ። 2 ሃይሳፌ ካሴ ጌሻ ናቤቲ ዮቲዳ ቃላኔ ቃስ ኢንቴ ሃዋሬታ ባጋራ ኢንቴ ዴሚዳ ኑ ጎዳኔ ኑና ኣሺዳይሳ ኣዛዞ ኢንቴ ዩሺ ቆፓና ማላ ታ ኮያይስ።

3 ሃራ ኡባፌ ካሴቲዲ ሃይሳ ዩሺ ቆፒቴ። ዉርሴꬃ ጋላሳታን ቂꬊዛይቲኔ ባ ኢታ ኣሞ ካሊሼ ኣሳ ካꬊዛይቲ ያና። *ዩሁ 18 4 ኢስቲ ቃስ “ጎዳ ዬሱሲ ‘ያና’ ጊዛ ሂዶታይ ዮቴቲቤኔ? ሂስቲን ኢዚ ኣዋን ዲዜ? ቤኒ ኑ ኣዋቲ ሃይቆሳፔ ሃ ሲሚን፥ ሃኒዛ ሚሺ ዉሪካ ሜꬌቶሳፔ ሃ ሲሚን ሄኮ ካሴ ባ ዲዛ ማላ ዴስ” ጌቴስ። 5 ሄይቲ ሄ ኣሳቲ ካሴ ዳሮ ዎዴፔ ካሴ ሳሎይ ፆሳ ቃላን ሜꬌቶይሳኔ ቢታይካ ሃꬃፌኔ ሃꬃን ዲዛይሳ ኤሪሼ ካዴቴስ። *ሜꬌ 1፡6-9 6 ሄ ዎዴ ዲዛ ኣላሜዚ ሃꬃን ሚቴቲ ꬋዪዴስ። *ሜꬌ 7፡11 7 ሄሳꬆካ ሃዒ ዲዛ ሳሎይኔ ቢታይ ናጋራንቻቲ ꬋያና ዲዛ ፒርዳ ጋላስ ጋካናስ ታማስ ጊጊ ኡቲዳ።

8 ታ ሲቆቶ! ኢንቴ ጊዲኮ ጎዳ ኣቻን ኢሲ ጋላሲ ሺ ላይꬃ ማላ፥ ቃሴካ ሺ ላይꬂ ኢሲ ጋላሳ ማላ ጊዲዳይሳ ሄሳ ሄ ሃኖዛ ባሎፒቴ። *ማዛ 90፡4 9 ኢሲ ኢሲ ኣሳታስ ሚሳቲዛ ማላ ጎዳይ ባ ዮቲዳ ሂዶታ ቃላ ፖላናስ ጋምዔናኮ ሺን ኣሲ ዉሪካ ማሬታና ማላኔ ኣይ ኣሲካ ꬋዮንታ ማላ ኮይዲ ኢዚ ኢንቴ ጊሽ ታኬስ።

10 ጎዳ ጋላሳይ ቃሴ ካይሶ ዬꬃ ማላ ቆፖንታ ዲሺን ጋኪ ዎꬋና። ሄ ጋላስ ሳሎቲ ጊታ ጊሪሳን ኣꬋና። ሜꬌቴꬂ ዉሪካ ታማን ፁጌቲ ꬋያና፤ ቢታይኔ ኢዛ ቦላ ዲዛዚ ዉሪካ ፁጌታና። *ማቶ 24፡43፤ ሉቃ 12፡39፤ 1ታሶ 5፡2፤ ኣጁ 16፡15 11 ሄሳ ጊሽ ሄይቲ ዉሪካ ሄሳꬆ ꬋያናዚ ጊዲኮ ሂስቲን ኢንቴ ጌሻቴꬃን ፆሳስ ጎይኒሼ ዳናስ ኢንቴስ ዋኒ ቤሴኔ? 12 ሄሳ ጊሽ ፆሳ ጋላሳይ ያናይሳ ኢንቴ ላሞቲዛይታኔ ኢዚ ኤሌሊ ያና ማላ ኦꬂዛይታ ጊዲቴ። ሄ ጋላስ ሳሎይ ታማን ፁጌቲ ꬋያና። ሜꬌቴꬃቲካ ታማ ሴላን ሴራና። 13 ጊዶ ኣቲን ኑኒ ኢዚ ኑስ ኢሚዳ ሂዶታ ማላ ፂሎቴꬃ ኦሶይ ኦሴቲዛሶ ኦራꬃ ሳሎኔ ኦራꬃ ቢታ ናጎስ። *ኢሳ 65፡17፤ 66፡22፤ ኣጁ 21፡1 14 ሄሳ ጊሽ ታ ሲቆቶ! ሄሲ ዉሪካ ሃናና ጋላስ ኢንቴ ናጊሼ ዲኮ ጎዳይ ኢንቴና ኢንቴ ቦላ ቦሮይ ባይንዳ ዲሺን ሳሮቴꬃን ዴማና ማላ ሚኒ ዲቴ። 15 ኑ ጎዳ ዳንዳያይ ኢንቴና ኣሻናስ ጊዲዳይሳ ኢንቴ ኤሪቴ። ኑ ሲቆ ኢሻ ጳዉሎሲ ባስ ኢሜቲዳ ኤራቴꬃ ማላ ኢዚ ኢንቴስ ፃፊዳይሲ ሃይሳ። 16 ኢዚ ሃይሳ ሃ ሃኖዛ ጊሽ ባ ኪታታን ኡባን ሃይሳꬆካ ፃፊዴስ። ኢዛ ኪታታ ጊዶን ኤራናስ ዋይሲዛ ኢሲ ኢሲ ሃኖቲ ዴቴስ። ኤራቴꬂ ኢስታስ ፓጪዳይቲኔ ናምዑ ቆፋን ዮቁ ጊዛይቲ ሃራ ጌሻ ማፃፋታ ሚርቂዛይሳꬆካ ሃይታካ ኢስቲ ሚርቃና። ኢስቲ ሄሳꬆ ኦꬂዛይ ባስ ꬋያናሳ።

17 ታ ኢሻቶ! ኢንቴ ቃስ ሄሳ ካሴቲዲ ኤሪዳ ጊሽ ሃንኮ ማካላታ ባላ ጌዶን ጎሼቲ ቢዲ ካሴ ኢንቴ ሚኒ ዲዛሶፔ ኩንዶንታ ማላ ናጌቲቴ። 18 ሄሳፌ ቦላራ ኑ ጎዳኔ ኑ ꬋሌ ዬሱስ ኪርስቶሳ ኪያቴꬃኒኔ ኢዛ ሻኪ ኤሮን ፑዴ ዲጪቴ። ኢዛስ ሃዒካ ሜርናስካ ቦንቾይ ጊዶ። ኣሚን።