ሎኦ ሱንꬂ ኣꬌስ፤

ዬሌታ ጋላሳፌ

ሃይቆ ጋላሲ ሎኦ። ሌሚ 22፡1

ዬሆ ኬꬅ ቡሲ ሎኦ፤

ጋሶይካ ሃይቆይ

ኣስ ኡባስ ዉርሴꬃ፤

ሼምፖራ ፓጻ ዲዛ

ኣሲ ኡባይ

ሄሳ ባ ዎዚናን

ዎꬃናስ ቤሴስ።

ጋሶይካ ካዮይ

ሲንꬅ ካሬꬂኮካ

ዎዚና ፖኢሴስ።

ካዮ ኬꬃን ዴስ፤

ኤያታ ዎዚናይ ጊዲኮ

ኡፋይሳ ኬꬃን ዴስ።

ዬꬅ ሲያናፔ

ኣꬎ ኤራንቻይ ሴሪዛ

ሴራ ኤዝጎይ ሎኦ።

ኦቶ ጋርሳን ኤጺሼ

ꬉቄቲዛ ኣጉንꬃ ማላ፤

ሄሲካ ሃዳ።

ኤያ ኬሴስ፤

ማጋንጾይ ኣሳስ ዎዚና ሞሬስ።

ዉርሴꬂ ኪያ፤

ቃሴ ኦቶራንቻፌ

ዳንዳያንቻይ ኪያ።

ኢስታ ኪኦ ጋርሳን ዲዛ ጊሻስ

ኔኒ ሃንቆስ ኤሶቶፓ። ያቆ 1፡19

ካሴ ኣꬊዳ ዎዴታፔ

ኣይስ ሎኢዴ?» ጋ ኦይቾፋ፤

ሄይታንታ ማላ ኦይሻታ ኦይሾይ

ኣꬎ ኤራቴꬅ ጊዴና።

ሎኦ ጺንጾ ማላ፤

ኢዛ ጎኣይ

ፖኦ ቤኢዛ ኣስ ኡባሳ።

ካሚ ኣሺዛ ማላ

ኣꬎ ኤራቴꬂ ኣሼስ።

ሄሳፌ ቦላራካ

ኣꬎ ኤራቴꬂ

ኬꬃ ኣዋ ሼምፖ ናጌስ።

ዎዚናን ዎꬃ!

ኢዚ ቦካሲዳይሳ

ኦኒ ሉሊሳና ዳንዳይዜ?

ጊዶ ኣቲን ዎዴይ ኢቲሺን

ሃይሳ ዎዚናን ዎꬃ፤

ጾሲ ኢሳ ኦꬂዳ ማላ

ሃራካ ኦꬂዴስ፤

ሄሳ ጊሻስ ኣሲ

ሲንꬃፌ ሃናና ሚሽ

ኣይኮካ ፒልጊዲ

ኤራና ዳንዳዬና።

ኣዱሳ ላይꬅ ዴኢሺን፥

ጺሎይ ባ ጺሎቴꬃራ

ኤሶን ሃይቂሺን

ሃዳ ጊዲዳ ታ ዴኦ ላይꬃታን

ሃይታ ቤኣዲስ።

ኬሃ ጺሎ፥

ዎይኮ ኬሃ

ኣꬎ ኤራንቻ ጊዶፓ።

ዎይኮ ኡባ ኤያ ኣስ ጊዶፓ፤

ኔ ኣይስ ዎዴይ ባይንዳ ሃይቃይ?

ዬዶንታ ኣጎይ ሎኦ፤

ጾሳስ ያዪዛ ኣሲ

ሺካላቴꬅ ኢጼስ።

ኢሚዛ ዎልቃይ

ኢሲ ካታማን ዴሬ ሃሪዛ

ታማታፔ ኣꬌስ።

ሙሌራ ሱሬ ኦሶኒኔ

ጺሎቴꬃን ጻላ ካንꬂዛ ኣሲ

ቢታ ቦላ ዴና።

ዬጋ ሲዮፓ፤

ኔ ሂስቶንታ ኣጊኮ

ኔ ኣሽካራይ ኔና ቃንጊሺን

ኔ ሲያንዳሳ።

ሃራታ ቃንጎይሳ

ኔ ዎዚናይ ኤሬስ።

ኣꬎ ኤራቴꬃን

ፒልጋ ጼላዳ፥

«ታኒካ ኣꬎ ኤራንቻ

ጊዳናስ ቃቻዲስ» ጋዲስ።

ጊዶ ኣቲን ታኒ

ጊዳ ማላ ሃኒቤና።

ኬሂ ጪማኔ ሃኮ፤

ሂስቲን ኦኒ ጋኪ

ኤራና ዳንዳይዜ?

ዮኦቲ ሃኒዛይሳ ፒልጋ ኤራናስ፥

ጻናኣናስ ናጋራ

ኢታቴꬂኔ

ኤያቴꬂ ጎሻቴꬅ

ጊዲዳይሳ

ኣኬካናስ ታ ዎዚናን

ዩሻ ቆፓዲስ።

ኢዚ ኩሼቲ ኣግሪሞቄ ማላኔ

ያርዴ ማላ ጊዲዳ

ሃይቆፔ ኢታ

ማጫስ ቤኣዲስ፤

ኢዚፔ ኬሲ ኤካናይ

ጾሳስ ያዪዛ ኣስ ጻላ፤

ናጋራንቻ ኣስ ጊዲኮ

ያርዴን ኦይካዉስ።

«ታኒ ካላ ፒልጋ

ጼላዳ ዴሚዳ

ሃራ ሚሺ

ሃይሳፌ ካሊዛይሳ።

ዮኦቲ ሃኒዛይሳ

ሂላቴꬃን ፒልጊዲ

ዴማናስ

ኢሳ ኢሳ ቦላ ጉጆ፤

ፒልጋሼ ꬋይዳይሳ

ሺ ኣቱማሳፔ

ኢሲ ሱሬ ኣስ ዴማዲስ።

ጊዶ ኣቲን ሃይታንታ ጊዶፌ

ኢሲ ሱሬ ማጫስ ዴማቤኬ።

ኢሲ ሚሽ ታማራዲስ፤

ጾሲ ኣስ ሱሬ

ሂስቲ ሜꬊዴስ፤

ጊዶ ኣቲን ኣሲ

ዳሮ ጊቴቲዳዝ ጊግሲዴስ» ጊዴስ።