1 ፆሳ ሸንያን የሱስ ክርስቶሳ ሀዋረ ግዳናዉ ፄገትዳ ጳዉሎስነ፥ ኑ እሻ ሶስተኔስ፥ 2 ቆሮንቶሳን ደእያ ፆሳ ዎሳ ኬꬃስ፥ የሱስ ክርስቶሳን ጌይዳይሳታስነ ጌሽ ግዳና መላ ፄገትዳይሳታስ፤ ቃስ ኤንታዉነ ኑስ ጎዳ ግድያ ኑ ጎዳ የሱስ ክርስቶሳ ሱንꬃ ኡባ በሳን ፄግያ ኡባስ። ሀዋ 18:1.

3 ፆሳይ፥ ኑ አዋይነ ጎዳይ የሱስ ክርስቶሲ ህንተዉ አꬎ ኬሀተꬃነ ሳሮተꬃ እሞ።

4 ፆሳይ ክርስቶስ የሱሳ ባጋራ ህንተዉ እምዳ አꬎ ኬሀተꬃ ግሾ፥ ታኒ ኡባ ዎደ ፆሳ ጋላታይስ። 5 እያን ኦዳንነ ኤራተꬃ ኡባን ህንተ ዱረትደታ። 6 ታኒ ክርስቶሳባ ማርካትዳይስ ቱማ ግደይሳ ሄስ ቆንጭሴስ። 7 ሄሳ ግሾ፥ ህንተ ኑ ጎዳ የሱስ ክርስቶሳ ዩሳ ናግሸ ደእሽን፥ አይ አያና እሞይካ ህንተዉ ፓጨና። 8 ኑ ጎዳ የሱስ ክርስቶሲ ስምያ ዎደ ህንተ ቦረቶናይሳታ ግዳና መላ ዉርሰꬅ ጋካናዉ እ ህንተና ምንꬃና። 9 ባ ናአ፥ ኑ ጎዳ፥ የሱስ ክርስቶሳራ እስፈተꬅ ዳና መላ ህንተና ፄግዳ ፆሳይ አማነትዳይሳ።

10 ታ እሻቶ፥ ህንተ ግዶን ሻከተꬅ ዶና መላነ ህንተ እስ ዎዛናንነ እስ ቆፋን እሶ ግድድ ዳና መላ፥ ኑ ጎዳ የሱስ ክርስቶሳ ሱንꬃን ህንተና ዎሳይስ። 11 ታ እሻቶ፥ ቀሎኤ ሶ አሳይ ህንተ ግዶን ኦሽ ደኤይሳ ታዉ ኦድዶሶና። 12 ታ ህንተዉ ኦደይስ ሀይሳ፦ ህንተፈ እሶት እሶት፥ “ታኒ ጳዉሎሳሳ፤ ታኒ አጵሎሳሳ፤ ታኒ ጰፅሮሳሳ፤ ታኒ ክርስቶሳሳ” ያጌታ። ሀዋ 18:24. 13 ክርስቶስ ሻከትደዬ? ህንተ ግሾ፥ ማስቃልያ ቦላ ካቀትዳይ ጳዉሎሰዬ? ዎይኮ ህንተ ጳዉሎሳ ሱንꬃን ፃማቀትደትዬ?

14 ታኒ ቃርስጶስነ ጋዮስ አትሽን፥ ህንተፈ ኦናካ ፃማቃቦና ግሾ፥ ፆሰ ጋላታይስ። ሀዋ 18:8፤ ሀዋ 19:29፤ ሮመ 16:23. 15 ሄሳ ግሾ፥ ኦንካ ህንተና ታ ሱንꬃን ፃማቀትደታ ጋናዉ ዳንዳኤና። 16 [ቃስ እስፅፋኖሰ ሶ አሳካ ታ ፃማቅዳይሳ አኬካይስ፥ ሽን ሀራ ኦና ፃማቅዳኮ ሀሳይከ።] 17 ክርስቶስ ታና ኪትዳይ ዎንገላ ኦዳና መላሳፈ አትሽን፥ ፃማቃና መላ ግደና። ክርስቶስ ማስቃለይ ሀዳ ግዶና መላ ታኒ አሳ ጭንጫተꬃ ቃላን ኦድከ።

18 ክርስቶሳ ማስቃላ ቃላይ ꬋየይሳታስ ኤያተꬅ፥ ሽን ኑስ አተይሳታስ ፆሳ ዎልቃ። 19 ጌሻ ማፃፋን፥

20 ያትን፥ ጭንጭ አዉን ደኢ? ህገ አስታማረይ አዉኔ? ዎይኮ ሀ ሳአ ኤራንቾይ አዉን ደኢ? ፆሳይ ሀ ሳኣ ጭንጫተꬃ ኤያተꬅ ኦꬅቤኔ?እዮ 12:17፤ እሳ 19:12፤ 33:18፤ 44:25.

21 ሀ ሳኣ አሳይ ባንታ ጭንጫተꬃን ፆሳ ኤሮና መላ ባ ጭንጫተꬃን ድግድ፥ ኤያተꬃን ታይበትያ፥ ኑኒ ኦድያ ቃላን አማነይሳታ አሻናዉ ፆሳ ሸነ ግድስ። 22 አይሁደት ማላታ በአናዉ ኮዮሶና፤ ቃስ ግርከት ጭንጫተꬅ ኮዮሶና። 23 ሽን ኑኒ ማስቃለ ቦላ ካቀትዳ ክርስቶሳ ሳባኮስ። ሄስ አይሁደታስ ꬉበ፤ ቃስ ግርከታስ ኤያተꬅ ግድስ። 24 ሽን ፆሳይ ፄግዳይሳታስ፥ አይሁደ ግድን፥ ግርከ ግድን ክርስቶስ ፆሳ ዎልቃነ እያ ጭንጫተꬃ። 25 ፆሳ ኤያተꬅ አሳ ጭንጫተꬃፈ አꬌስ፤ ቃስ ፆሳ ዳቡራይ አሳ ምኖተꬃፈ ምኔስ።

26 ህዛ፥ ታ እሻቶ፥ ፆሳይ ህንተና ፄግያ ዎደ ህንተ አይ መላ አሴኮ ቆፕተ። አሳ ቆፋን፥ ህንተ ግዶፈ ዳሮት ጭንጫ፥ ዎልቃማነ ꬎቃ ኮቸ ግደከታ። 27 ሽን ፆሳይ ጭንጫታ ዬላያናዉ አላመን ደእያ ኤያታ ዶርስ፤ ቃስ ምኖታ ዬላያናዉ አላመን ደእያ ዳቡራንቾታ ዶርስ። 28 ሀ አላምያን ግታ ጌተትዳባ ꬋይሳናዉ፥ ፆሲ፥ ሀ ሳኣ ካዉሻባ፥ ካትዳባነ ፓꬆናባ ዶርስ። 29 ፆሳ ስንꬃን ኦንካ ጬቀቶና መላ ሄሳ ኦꬅስ። 30 ሽን፥ ህንተዉ ክርስቶስ የሱሳራ እስፈተꬅ ዳና መላ ፆሳይ ሄሳ ኦꬅስ። እ፥ ኑስ ፆሳፈ ጭንጫተꬅ፥ ፅሎተꬅ፥ ጌሻተꬅነ አቶተꬅ ግድስ። 31 ሄሳ ግሾ፥ ጌሻ ማፃፋን፥ “ጬቀትያ ኦንካ ጎዳን ጬቆ” ያጌስ። ኤርም 9:24.