1 ክንክረ ካታማን ደእያ ዎሳ ኬꬃን ኦꬅያ ኑ ምችያ ፌበና ሎኦ ማጫስ ግደይሳ ህንተ ኤራና መላ ኮያይስ። 2 ህንተ እዮ አማንያ አሳት ጎዳ ሱንꬃን ሞካናዉ በሲያ አማንያ አሳታፐ እሱዋዳ ሞክተ። እያ ህንተፈ ኮያባ ኡባ እዮ ማድተ። እያ ባ ሁጰን ዳሮ አሳ ማዳሱ፤ ቃስ ታና ታ ሁጰንካ ዳሮ ማዳሱ።

3 ክርስቶስ የሱሳ ኦሱዋ ታራ እስፈ ኦꬅያ ጵርስቅላነ አቅላ ሳሮ ጊተ። ሀዋ 18:2. 4 ኤንቲ ታ ግሾ ባንታ ሸምፑዋ አꬅድ እምዶሶና። ታ ፃላላ ግዶናሽን፥ አይሁደ ግዶና አሳ ዎሳ ኬꬃ ኡባይ ኤንታ ጋላቴስ። 5 ኤንታ ሶን ሺቅያ አማንያ አሳ ሳሮ ጊተ።

ኢሰ ቢታን ክርስቶሳ ኮይሮ አማንዳ፥ ታ ዶስያ ኤጳነፆሳስ ታ ሳሮꬁዋ ኦድተ።

6 ህንተ ግሾ ኦሶን ዳሮ ዳቡርዳ ማይራሞ ሳሮ ጊተ። 7 ታራ ቃሾ ኬꬃን አꬅዳ ታ አይሁደ ላገታ አንድራንቆሳነ ዩንያሳ ሳሮ ጊተ። ኤንቲ የሱሳ ሀዋረታ ግዶን ኤረትዳይሳታ። ቃስ ኤንቲ ክርስቶሳ ታፐ ስን አማንዶሶና።

8 ጎዳን አማንያ ታ ሲቆ ላግያ፥ ጵልያፆና ሳሮ ጊተ። 9 ክርስቶሳ ኦሱዋ ኑራ እስፈ ኦꬅያ ኡርባኖሳነ ታ ዶስያ እስታኩሳ ሳሮ ጊተ። 10 ክርስቶሳን አማንꬅያ አይልያ አጰልሳስ ታ ሳሮꬁዋ ኦድተ። አርስፆቡሎሳ ሶ አሳስ ታ ሳሮꬁዋ ኦድተ። 11 ታ አይሁደ ላግያ ሄሮድዮና ሳሮ ጊተ።

ናርስሳስነ እያ ሶ አሳፐ ክርስቶሳ አማንዳይሳታ ሳሮ ጊተ።

12 ጎዳ ኦሱዋን ዳቡርያ ትሩፋይናነ ትሩፎሳ ሳሮ ጊተ። ቃስ ጎዳስ ዳሮ ዳቡራዳ ኦꬅያ፥ ታ ዶስያ ፃርስዶ ሳሮ ጊተ። 13 ጎዳ ኦሱዋን ዳሮ ኤረትዳ ሩፎሳስነ ታና ባ ናአዳ በእያ እያ አየስ ታ ሳሮꬁዋ ኦድተ። ማር 15:21. 14 አስቃርፆናስ፥ አፍለሶንጳስ፥ ሄርሜሳስ፥ ጳፅሮባናስ፥ ሄርማስነ ኤንታራ ደእያ አማንያ እሻታ ኡባስ ታ ሳሮꬁዋ ኦድተ። 15 ፍሎሎጉሳ፥ ዩላ፥ ኔራ፥ እያ ምችዉ፥ አልንፆሳነ ኤንታራ ደእያ አማንያ አሳ ኡባ ሳሮ ጊተ።

16 ጌሻ ዬረተꬅ ዬረትሸ፥ እሶይ እሱዋ ሳሮꬅተ። ክርስቶሳ ዎሳ ኬꬃ ኡባይ ህንተና ሳሮ ያጎሶና።

17 ታ እሻቶ፥ ህንተ ታማርዳ ትምርትያ እፅድ፥ ህንተ ግዶን ሻከተꬅነ መቶ መꬍያ አሳታፐ ናገትተ። ኤንታፈ ሃክተ። 18 ሄሳ መላ አሳት ባንታዉ ኦꬆሶናፐ አትሽን፥ ኑ ጎዳ ክርስቶሳስ ኦꬆኮና። ባንታ ማልእያ ዶናንነ ሳጶꬅያ ቃላን አይኮ ኤሮና አሳ ዎዛና ባለꬆሶና። 19 ዎንገላስ ህንተ ኪተትዳይሳ አሳ ኡባይ ስእዳይስ ታና ኡፋይሴስ። ሽን ህንተ ሎኦባ ኤራና መላነ ኢታባፐ ሃካና መላ ታ ኮያይስ። 20 ሳሮተꬃ ፆሳይ ፃላህያ ህንተ ቶሁዋፐ ጋርሳን ጋጭ የጋና።

ኑ ጎዳ የሱስ ክርስቶሳ አꬎ ኬሀተꬃይ ህንተራ ግዶ።

21 ታራ ኦꬅያ ፅሞትዮስ ህንተና ሳሮ ያጌስ። ሀዋ 16:1. ሄሳዳካ፥ ታ ዳቦት ሉቅዮስ፥ ያሶንነ ሶስጳፅሮስ ህንተና ሳሮ ያጎሶና።

22 ታኒ፥ ሀ ዳብዳብያ ፃፍዳ፥ ፃርፅዮስ፥ ህንተና ጎዳ ሱንꬃን ሳሮ ያጋይስ።

23 ታና ሞክዳይነ ዎሳ ኬꬃ ኡባይ እያ ሶን ሺቅያ ጋዮስ፥ ህንተና ሳሮ ያጌስ። ካታማ ሚሽያ ኦይክያ ኤራስፆስነ ኑ እሻ ቃርፆስ ህንተና ሳሮ ያጎሶና። ሀዋ 19:29፤ 2 ቆሮ 1:14፤ 2 ፅሞ 4:20. 24 [ኑ ጎዳ የሱስ ክርስቶሳ አꬎ ኬሀተꬃይ ህንተ ኡባራ ግዶ። አምንእ።]*በን ኮይሮ ማፃፋታን ፓይዶ 24 ዴና። ሀዋ 19:29፤ 2 ቆሮ 1:14፤ 2 ፅሞ 4:20.

25 ጋላታይ ፆሳስ ግዶ። ታኒ፥ የሱስ ክርስቶሳባ ኦድያ ዎንገላ ቃላነ ዳሮ ዎደፐ ቆሰትድ ጋምእዳ ቱማተꬃን፥ ፆሳይ ህንተና አማኖን ምንꬅድ ኤሳናዉ ዳንዳኤስ። 26 ሽን ሀእ ሄ ቱማይ ቆንጭስ። ካዎተꬃ ኡባይ አማንድ ኪተታና መላ መርና ፆሳ ኪታን ናበት ሄ ቱማባ ፃፍዶሶና።

27 የሱስ ክርስቶሳ ባጋራ ጭንጫተꬅ እያ ፃላላስ ደእያ፥ እስ ፆሳስ መርናዉ ቦንቾይ ግዶ። አምንእ።