2
1 ታ እሻቶ፥ ታኒ ኮይሮ ፆሳ ቃላ ህንተዉ ኦዳሸ ይዳ ዎደ፥ ዶና ብላተꬃንነ ጭንጫተꬃን ያቢከ። 2 ታኒ ህንተራ ደእያ ዎደ ማስቃልያ ቦላ ካቀትዳ የሱስ ክርስቶሳፐ አትሽን፥ ሀራባ ኤራናዉ ኮይከ ጋዳ ታ ቆፋ ቃቻስ። 3 ታ ህንተራ ደእያ ዎደ ዳቡራን፥ ያሻንነ ዳሮ ኮኮርሳን ደአስ። ሀዋ 18:9. 4 ታ ኪታይነ ታ ትምርተይ ዶና ብላተꬃንነ ጭንጫተꬃን ግዶናሽን፥ ጌሻ አያና ዎልቃ ቆንጭሰꬃና። 5 ሄስካ፥ ህንተ አማኖይ ፆሳ ዎልቃናፐ አትሽን፥ አሳ ጭንጫተꬃን ዘምፖና መላሳ።
ፆሳ ጭንጫተꬅ
6 አያና ደኦን ድጭዳይሳታስ ኑኒ ጭንጫተꬃ ቃላን ኦዶስ። ሽን ሄ ጭንጫተꬃይ፥ ሀ ሳአ ጭንጫተꬅ ዎይኮ ꬋያናዉ ደእያ ሀ ሳአ ሃረይሳታ ጭንጫተꬅ ግደና። 7 ሽን ኑኒ ኦድያ ጭንጨተꬃይ፥ ዳሮ ዎደፐ ስን ፆሳይ ኑ ቦንቹዋስ ጊግስዳይሳነ ጌምድ ደእያ ፁራ ጭንጫተꬅ። 8 ሀ ሳኣ ሃረይሳታፐ ኦንካ ሀ ጭንጫተꬃ ኤርቦኮና። ኤንቲ ኤርዳባ ግድያኮ፥ ቦንቾ ጎዳ ማስቃልያ ቦላ ካቆኮና። 9 ሽን ጌሻ ማፃፋን፥
“አይፈይ በእቦናባ፥
ሀይꬅ ስእቦናባ፥
ዎዛን ቆፕቦናባ፥
ፆሳይ ባና ዶሰይሳታስ ጊግስስ” ያጌስ። እሳ 64:4.
10 ፆሳይ ባ ፁራ ባ አያና ባጋራ ኑስ ቆንጭስስ። ጌሻ አያናይ ሀር አቶሽን፥ ጌምዳ ፆሳ ፁራ ኡባ ፕልጌስ። 11 አሳን ደእያ አሳ አያናፐ አትሽን፥ አሳባ ኦንካ ኤረና። ሄሳዳካ፥ ፆሳባ፥ ፆሳ አያናፐ አትሽን፥ ኦንካ ኤረና። 12 ፆሳይ ኑስ ጮ እምዳባ ኑ ኤራና መላ ፆሳ አያና ኤክዳፐ አትሽን፥ ሀ ሳአ አያና ኤክቦኮ።
13 ኑኒ አያናባ፥ አያና አሳታስ አሳ ጭንጫተꬃን ግዶናሽን፥ ፆሳ አያናይ እምያ ጭንጫተꬃን ታማርሶስ። 14 ጌሻ አያን ባይና አስ ፆሳ አያና እሞታታ ኤከና። ሄስ እያዉ ኤያተꬅ፤ ኡባይ ጌሻ አያናን ፕልገትያ ግሾ፥ እ ኤራናዉ ዳንዳኤና። 15 ጌሻ አያን ደእያ አስ ኡባባ ፕልጌስ፥ ሽን እያ ኦንካ ፕልገና። 16 ጌሻ ማፃፋን፥
“ጎዳ ዎዛና ኤረይ ኦኔ?
እያ ዞራናዉ ዳንዳኤይ ኦኔ?”
ጌተትድ ፃፈትዳይሳ መላ። ሽን ኑስ ክርስቶሳ ዎዛን ደኤስ። እሳ 40:13.