1 አሳይ ኑና ክርስቶሳ አይለዳነ ፆሳ ፁራ ቆንጭሳናዉ ሀዳር እመትዳ አሳዳ ኦꬅድ ቆፖ። 2 ሀዳራ ኤክዳ አሳት ባንታ ጎዳስ አማነትዳይሳታ ግዳናዉ በሴስ። 3 ሽን ህንተ ዎይኮ ሀር ታና ፕርድኮ፥ ታዉ አይኮካ ግደና። ሀር አቶሽን፥ ታካ ታ ቦላ ፕርድከ። 4 ታ ካሀይ ጌሽ፥ ሽን ሄስ ታኒ ፖሎ ፅሎ ግደይሳ በሰና። ታ ቦላ ፕርዳናይ ጎዳ ፃላላ። 5 ሄሳ ግሾ፥ ዎደይ ጋኮና፥ ጎዳይ ዮና ኦደ ቦላካ ፕርዶፍተ። እ ꬉማን ጌምዳባ ፖኦን ከሰና፤ አሳ ዎዛናን ቆሰትዳ ቆፋ ቆንጭሳና። ሄ ዎደ፥ እሶይ እሶይ ፆሳፈ ጋላታ ኤካና።

6 ታ እሻቶ፥ ህንተ ግሾ፥ ታናነ አጵሎሳ፥ ህንተዉ ሌምሶ ኦꬃዳ ኦዳስ። ሄሳ ታ ኦꬅዳይ፥ “ፃፈትዳይሳፈ አꬎፋ” ግያ ዞርያ ህንተ ኑፐ ታማራና መላሳ። ሄሳ ግሾ፥ ኦንካ እሱዋ ሳብድ ሀንኩዋ ካꬋናዉ በሰና። 7 ነ ሀራታፐ አይብን አꬋይ? ኔኒ ኤካቦናባይ አይብ ደኢ? ኔኒ ኤክዳባ ሀራ አሳፐ ኤክዳ ግድኮ፥ ያትን፥ ኤክቦና አሳዳ አይስ ጬቀታይ?

8 ሀእ ህንተ ካልደታ። ሀእ ህንተ ዱረትደታ። ኑኒ ባይና ህንተ ፃላላ ካዎትደታ። ህንተ ቱማ ካዎትዳባ ግድያኮ፥ ኑካ ህንተራ ካዎታናሽን። 9 ታዉ፥ ፆሳይ ኑና ሀዋረታ፥ ሀይቆስ ፕርደትዳ አሳዳ፥ አሳ ኡባፈ ኑና ጉየ አꬅዳ ዳኔስ። ኑኒ ሀ አላምያስ፥ ኪታንቾታስነ አሳስ ካሳባ ግድዳ።

10 ኑኒ ክርስቶሳ ግሾ ኤያ ግድዳ፥ ሽን ህንተ ክርስቶሳን ጭንጫታ ግድደታ። ኑኒ ዳቡራንቾ፥ ሽን ህንተ ምኖ ግድደታ። ህንተ ቦንቸትደታ፥ ሽን ኑኒ ቶሸትዳ። 11 ሀእ ጋካናዉ ኑ ኮሻቶስ፥ ሳሞቶስ፥ ካሎቶስ፥ ዋቶስ፤ ዳና ሶ ꬋይድ ቶይላቶስ። 12 ኑኒ ኑ ኩሸን ኦꬅድ አቆስ። ኑና አስ ባድያ ዎደ አንጆስ፤ ኑና ጎድያ ዎደ ዳንዳኦስ። ሀዋ 18:3. 13 ኑ ቦላ ኢታባ ኦደትያ ዎደ ሎኦ ቃላ ዛሮስ። ኑ ሀእ ጋካናዉ ሀ አላምያ ፕቶነ ዎራ የገትያ ቡረ ግድዳ።

14 ታኒ ሄሳ ፃፍዳይ፥ ታ ዶስያ ናይታዳ፥ ህንተና ዞራናዉ ፃፋስፐ አትሽን፥ ዬላያናዉ ግደና። 15 ክርስቶሳን ህንተና ድችያ ታይቦፐ ቦላ ግድዳ ካለይሳት ደእኮካ፥ ህንተዉ ዳሮ አዋት ዶኮና። ታ ህንተና ክርስቶስ የሱሳ ዎንገላን የላስ። 16 ህዛ፥ ህንተ ታና ሌምሶ ኦꬅድ ካላና መላ ህንተና ዎሳይስ። 2 ቆሮ 11:1፤ ፍልጵ 3:17. 17 ሄሳ ግሾ፥ አማነትዳ፥ ታ ዶስያ፥ ጎዳን ታ ናአ፥ ፅሞትዮሳ ህንተኮ ኪታይስ። እ ዱማ ዱማ በሳን ደእያ ዎሳ ኬꬃን ታኒ ታማርስዳ፥ ክርስቶሳ የሱሳን ደእያ፥ ታ ኦግያ ህንተና ሀሳይሳና።

18 ታኒ ህንተኮ ዮናባ ዳንን፥ ኦቶርትያ እስ እስ አሳት ደኦሶና። 19 ሽን ጎዳይ ጊኮ፥ ማታ ዎደ ታኒ ህንተኮ ባና። ሄ ዎደ ኦቶራንቾታ ሃሳያ ፃላላ ግዶናሽን፥ ኤንታ ዎልቃካ ኤራና። 20 ፆሳ ካዎተꬃይ ኦዳ ግዶናሽን፥ ዎልቃ። 21 ታኒ ህንተኮ ፃምአራ ቦየ ዎይኮ ሲቆራነ አሽከ አያናራ ቦ? አዉሳ ዶረቲ?