አሞፀ ማፃፋ
ጋꬃ ቆፋ
አሞፀይ ክ.የ.ስ. 760 ሄራን፥ ሆሰፐ ጉꬃራ ስን ደንድድ፥ ፑደሀ ባጋ ካዎተꬃ፥ እስራኤለ ቦላ ትንብተ ኦድዳ ናበ። እ ፄገታናፐ ስን መሄ ሄምያ አስ። እ ዱገሀ ካዎተꬃን የለትኮካ፥ ጎዳይ እ ቤተለ ካታማ ብድ እስራኤለን ትንብተ ኦዳና መላ እያ ኪትስ። አሞፀይ፥ አራመይ፥ ፍልስፄመይ፥ ፅሮስ፥ ኤዶመይ፥ አሞነይ፥ ሞአበይነ ይሁድ ፕርደታናይሳ ኦድስ። ግዶሽን፥ አሞፀይ እስራኤለን ደእያ ዱረ አሳይ ማዶይ ባይና ማንቆታ ቆህያ ግሾ፥ እስራኤለይ ሴረታናዉ ደኤይሳ ባ አዱሳ ኪታን ቆንጭስስ።
እስራኤለን፥ ቤተለ ጌሻ በሳን ኦꬅያ ካህነት አሞፀይ ባንታ ቢታን ትንብተ ኦዶና መላ እያ ሞትዶሶና፤ ድጋናዉ ኮይዶሶና (7:10-17)። አሞፀ ኪታታ ግዶን ቆንጭድ በንትያ ኪታይ፥ “ሱረ ፕርድ ፑልቶ ሃꬃዳ፥ ፅሎተꬅ መሎና ሻፋ ሃꬃዳ ጎጎ” ግድ እስራኤለ አሳ ናግስያ ኪታ።
ጎዳይ እስራኤለ አሳ አላጋ ካዎተꬃታ ግዶን ላላናይሳ ጉጅድ ኦድስ። ሽን ፆሳይ ባ ደርያ ዛሪድ ኤሀናዉነ ጋሽትሳናዉ ኡፋይሳ ቃላ እምዳይሳ ጉጅድ ኦዴስ።
ማፃፋ አይፈ ቆፋታ
ካዎተꬃታ ቦላ ኦደትዳ ፕርዳ (1:1—3:2)
እስራኤለይነ ሳማረይ ፕርደታና (3:3—6:14)
እስራኤለ ፕርዳ ማልያ እቻሹ ቆንጨꬃታ (7:1—9:10)
እስራኤለስ ስንꬃን ደእያ ኡፋይሳ (9:11-15)
1
1 ኦዝያን ይሁዳ ቢታን፥ እዮኣሳ ናአይ እዮርባም እስራኤለ ቢታን ካዎትዳ ላይꬃን ታቆሀ ቢታን መሄ ሄመይሳታፐ እሶይ፥ አሞፀይ፥ ቢት ቃፃናፐ ናምኡ ላይꬃፈ ስን እስራኤለባ ኦድዳ ትንብተይ ሀይሳ፦
2 እ፥
“ጎዳይ ፅዮነ ዙማ ቦላ ጉዴስ፤
የሩሳላመ ካታማን ደቼስ።
መሄ ሄምያ በሳት መሎሶና፤
ቃርመሎሳ ዙማ ቦላ ደእያ እርፃይ ሹሌስ” ያግስ።
እስራኤለ ሾሮ ካዎተꬃት ፕርደታና
ሶረ
3 ጎዳይ፥ “ዳማስቆ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ጋላዳ ቢታ አሳ ብራታ አች ደእያ ጋረን ጎንዶርስድ የꬍዶሶና። 4 ሄሳ ግሾ፥ ታኒ ካዋ ሀዛኤላ ኬꬃን ታማ የዳና፤ ሄ ታማይ ካዋ በን-ሀዳዳ ሚፃታ ማና። 5 ታኒ ዳማስቆ ካታማ ፐንግያ መንꬃና፤ አዌና ዛንጋራን ደእያ አሳ የደꬃናነ ካዎታ ፃምኣ ኦይክዳይሳታ ቤት-ኤደናፐ ꬋይሳና፤ ሶረ አሳይ ደኤትድ፥ ቂራ ባና” ያጌስ።
ፍልስፄመ
6 ጎዳይ፥ “ጋዛ ካታማ አሳይ ዛር ዛር ኦꬅዳ ናጋራ ግሾ፥ ታ ኤንታ ሴሮና አግከ። ኤንቲ ቢታን ደእያ አሳ ኡባ ድእድ፥ ኤዶመ ቢታ አሳስ ባይዝዶሶና። 7 ሄሳ ግሾ፥ ታኒ ጋዛ ካታማ ድርሳን ታማ የዳና፤ ሄ ታማይ ካታማ ሚፃታ ማና። 8 አሽዶዳን ደእያ አሳ ታኒ የደꬃናነ ካዎታ ፃምኣ ኦይክዳይሳታ አስቃሎናፐ ꬋይሳና። ኤቅሮና ካታማን ደእያ አሳ ሴራና፤ ፍልስፄመ አሳፐ አትዳይሳት ሀይቃና። ታኒ ኡባ ሃርያ ጎዳይ ሄሳ ኦዳይስ” ያጌስ።
ፅሮሳ
9 ጎዳይ፥ “ፅሮሳ ካታማ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ጫቅዳ እሻተꬃ ጫቁዋ መንꬅድ፥ ደኤትዳ አሳ ኡባ ኤዶመ አሳስ ባይዝዶሶና። 10 ሄሳ ግሾ፥ ታኒ ፅሮሳ ካታማ ድርሳን ታማ የዳና፤ ሄ ታማይ ካታማ ሚፃታ ማና” ያጌስ።
ኤዶመ
11 ጎዳይ፥ “ኤዶመ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ባንታ እሻ እስራኤለ ማሻን የደꬅዶሶና፤ ኤንቲ ኤንታዉ ቃትቦኮና፤ ኤንታ ይሎይ መርናዉ እርፀና። 12 ሄሳ ግሾ፥ ታኒ ተማና ካታማ ቦላ ታማ የድን፥ ሄ ታማይ ቦሶራ ካታማ ሚፃታ ማና” ያጌስ።
አሞነ
13 ጎዳይ፥ “አሞነ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ባንታ ዛዋ አሳናዉ ጋላዳ ቢታን ደእያ ቃንꬃትዳ ማጫሳታ ኡሉዋ ዳክዶሶና። 14 ሄሳ ግሾ፥ ታኒ ራባ ካታማ ድርሳን ታማ የዳና፤ ሄ ታማይ ካታማ ሚፃታ ማና። ሄሳፈ ጉየ፥ ኦላ ጋላስ ዋሶይ ዳራና፤ ኦላንቾት ጎተዳ ዎልቃማና። 15 ኤንታ ካዎይነ እያራ ኦꬅያ ሀላቃት ኡባይ ደኤትድ ባና” ያጌስ።