1 ጎዳይ፥ “ሞአበ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ኤዶመ ካዋ መቀꬃይ ብዶ ግዳና ጋካናዉ ፁግዶሶና። 2 ሄሳ ግሾ፥ ታኒ ሞአበ ቢታን ታማ የዳና፤ ሄ ታማይ ቅርዮታ ካታማ ሚፃታ ማና። ኦላንቾታ ዋሱዋን፥ ሞይዘ ፑኑዋንነ ኦላ ግርሳን ሞአበ አሳይ ዉራና። 3 ታኒ ሞአበ ሃረይሳነ እያ ሞርናታ ኡባ ꬋይሳና” ያጌስ።

4 ጎዳይ፥ “ይሁዳ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ጎዳ ህግያ እፅዶሶና፤ እያ ኪታ ናግቦኮና። ኤንታ አዋት ካልዳ ዎርዶ ፆሳት ኤንታና ባለꬅዶሶና። 5 ሄሳ ግሾ፥ ታኒ ይሁዳ ቦላ ታማ የዳና፤ ሄ ታማይ የሩሳላመ ሚፃታ ማና” ያጌስ።

6 ጎዳይ፥ “እስራኤለ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ፅሉዋ ሚሸስ፥ ማንቁዋ ጫማስ ባይዞሶና። 7 ማንቆታ ቢታ ባናን የግድ፥ ኤንታ ሁጵያ የꬎኦሶና፤ ኡንኤትዳይሳታ ፕርዳ ድጎሶና። አዋራነ ናኣራ እስ ማጫስ ላገꬅድ ታ ጌሻ ሱንꬃ ቱንሶሶና። 8 ኤንቲ አሳፐ አጮስ ኦይክዳ ማኡዋ ያርሽያ በሳታን ኡባ ማታን ሂፅድ፥ ዝንኦሶና፤ ቃስ አሳፐ አጮስ ኤክዳ ዎይነ ኡሻ ባንታ ፆሳታ ኬꬃን ኡዮሶና።

9 “ግዶሽን፥ ህንተ ግሾ ጋዳ ዝጋዳ አዱቅዳ፥ ዎላዳ ምንዳ አሞረ አሳታ ህንተ ስንꬃፈ ꬋይስዳይ ታና። ታኒ ኤንታዉ ቦላ አይፍያ፥ ጋርሳ ፃጱዋ ኡባ ꬋይሳስ። 10 ታኒ ህንተና ግብፀ ቢታፈ ከሳዳ፥ ባዞን ኦይታሙ ላይꬅ ካለꬃስ፤ አሞረታ ቢታ ህንተዉ ላታ ኦꬃዳ እማስ። 11 ህንተ አደ ናይታ ግዶፈ ናበታ፥ ህንተ ናአተꬃታ ግዶፈ ናዝራወታ ደንꬃስ። እስራኤለ አሳዉ፥ ሄስ ቱማ ግደኔ? ታኒ ጎዳይ ሄሳ ኦዳስ። 12 ሽን ህንተ ናዝራወታ ጫቆ መንꬅስድ፥ ዎይነ ኡሻ ኡሽደታ፤ ናበታ ትንብተ ኦዶና መላ ድግደታ።

13 “ሄሳ ግሾ፥ ካꬅ ዳርስድ ጫንዳ ጋረይ መኤይሳዳ ታኒ ህንተና መንꬃና። 14 ጎባ ዎፀይስ ከስ ኤከና፤ ምኑዋስ ዎልቅ እፃና፤ ኦላንቾይ ባ ሸምፑዋ አሸና። 15 ዶንገን ዱከይስ ኤቃናዉ ዳንዳኤና፤ ጎባ ዎፅያ ኦላንቾይ ከስ ኤከና፤ ፓራዋይ ባ ሸምፑዋ አሸና። 16 ሄ ጋላስ ሀር አቶሽን ኦላንቾታ ግዶን ዳሮ ፃላ ጌተተይሳት ፅረ ካሎ ባቃታና” ያጌስ ጎዳይ።