1 ግብፀ ቢታፈ ህንተና ከስዳ፥ እስራኤለ አሳዉ፥ ጎዳይ ህንተዉ ኦደይሳ ስእተ። 2 ጎዳይ፥ “ሳአን ደእያ አሳ ኡባፈ ታኒ ህንተ ፃላላ ዶራስ። ሄሳ ግሾ፥ ህንተ ኦꬅዳ ናጋራ ኡባስ ታኒ ህንተና ሴራና” ያጌስ።

3 ናምኡ አሳት ዎላ ባና ግድ ቆፋ ቃቾና ደእሸ እስፈ ሄመቶና?

4 ጋሞይ ዎꬋ ደሞና ዎራን ጮ ጉድዬ? ዎይኮ ዎዳላ ጋሞይ አይኮ የደꬅድ ኦይኮና ኡት ደንድድ ሳርቡቅዬ?

5 ካፎይ ፅሄይ ባይና ጮ ደንባን ኦይከትዬ? ዎይኮ ፅሄይ አይኮይ ቦቾና ጮ ፕርዬ?

6 ካታማ ግዶን ኦላ ሞይዘይ ፑነትያ ዎደ አሳይ ያሻን ኮኮረነዬ? ዎይኮ ጎዳይ ኪቶና ደእሽን ꬋዮይ እስ ካታማ ቦላ ዪዬ?

7 ቱማ ኡባ ሃርያ ጎዳይ ባ ፁራ ናበታስ፥ ባ ኦሳንቾታስ ካሰትድ ቆንጭሶና ደእሸ አይኮካ ኦና።

8 ጋሞይ ጉድን ያዮናይ ኦኔ? ኡባ ሃርያ ጎዳይ ኦድን፥ ትንብተ ኦዶናይ ኦኔ?

9 አሽዶዳንነ ግብፀን ደእያ ሚፃ ኡባስ ሀይሳዳ ያግድ አዋጅተ፦ “ሳማርያ ደረታ ቦላ ሺቅድ፥ ያን ደእያ ኢታተꬃነ ሱገꬃ በእተ” ያግተ።

10 “ሀ አሳይ ሎኦባ ኦꬅ ኤሮኮና፤ ኢታተꬃንነ ቦንቅድ ኤህዳ ሚሸን ባንታ ኬꬃ ኩንꬆሶና” ያጌስ ጎዳይ። 11 ሄሳ ግሾ፥ “ሞርከይ ህንተ ቢታ ተቃና፤ ህንተ ባሱዋ ላላና፤ ህንተ ኬꬃ ቦንቃና” ያጌስ ኡባ ሃርያ ጎዳይ።

12 “ሄንꬃንቾይ ጋሞ ዶናፐ ናምኡ ሹቁለ ዎይኮ ዱፃ ሀይꬅ የግስ ኤከይሳዳ፥ ሳማረ ቢታን እንጀ ዱሱ ደእያ እስራኤለ አሳፐ ጉꬃት አታና” ያጌስ ጎዳይ።

13 “ሀይሳ ስእድ ያይቆባ ኮቻታ ቦላ ሀይሳዳ ያግድ ማርካትተ። 14 ታኒ እስራኤለ አሳ ኤንታ ናጋራ ግሾ ሴርያ ዎደ፥ ቤተለ ካታማን ደእያ ያርሾ በሳታ ላላና፤ ያርሾ በሳን ደእያ ካጨት መእድ፥ ሳአን ዎꬋና። 15 ኤንቲ ባልጎነ ቦነ ደእያ ኬꬃታ ኡባ ታኒ ꬋይሳና። ኤንቲ ዳንጋርሳ ዛለን አሌቅስድ፥ ኬፅዳ ኬꬃ ላላና፤ ቃስ ግታ ግታ ኬꬃት ኡባይ ꬋያና” ያጌስ ጎዳይ፥ ኡባፈ ዎልቃማ ፆሳይ።