1 ህንተኖ፥ ባሳነ ሚዛታዳ ሞꬍዳ ሳማረ ማጫሳቶ፥ ሀይሳ ስእተ! ህንተ ማንቆታ ኡንኤꬄታ፤ መቶታንቾታ ዋየታ። ህንተ አዝናታኮ፥ “ኑስ ኡሽ እምተ” ያጌታ። 2 ኡባ ሃርያ ጎዳይ ሀይሳዳ ያግድ፥ ባ ጌሻተꬃን ጫቅስ፥ “ህንተ ማንፃቆን ኦይከትድ ጎሸታና ጋላስነ ህንተፈ አትዳ ጉꬃት ማንፃቆን ኦይከትድ ብያ ሞሎዳ ሀናና ጋላስ ያና። 3 ህንተ ኡባይ ድርሳ ፆኤራ ጎሸትድ፥ ከይድ፥ አርሞነ ሆለታና” ያግስ ።

6 “ህንተ ካታማ ኡባን ታኒ ኮሻ የዳዳ፥ ሀር አቶሽን ህንተ አቻን ጋꬅያባ ꬋይሳስ፤ ሽን ህንተ ሄሳን ታኮ ስምበከታ። 7 ካꬅ ጫክያ ዎደይ ጋካናዉ ቡሮ ሄꬑ አጌን ደእሽን፥ ታኒ ህንተዉ እራ ተቃስ። ታኒ እስ ካታማን እራ ቡክሳዳ ሀራ ካታማን ቡኮናዳ ድጋስ፤ እስ ጎሻን ቡክስ፤ ሀራ ጎሻይ ቃስ እራ ꬋይድ መልስ። 8 ሄሳ ግሾ፥ ናምኡ ዎይኮ ሄꬑ ካታማ አሳይ ሃ ኡያናዉ እስ ካታማ ብዶሶና፤ ሽን አልቦኮና። ሄሳንካ ህንተ ታኮ ስምበከታ” ያጌስ ጎዳይ።

9 “ታኒ ህንተ ካꬃ ቦላ ሀርገ የዳስ፤ ህንተ አታክልትያ፥ ህንተ ዎይንያ ህንተ ባላስያነ ህንተ ሻማሆ ኡባ ቦለይ ምስ፤ ሽን ህንተ ሄሳንካ ታኮ ስምበከታ” ያጌስ ጎዳይ።

10 “ታኒ ግብፀ አሳ ቦላ ጋዶ የድዳይሳዳ፥ ህንተ ቦላ ጋዶ የዳስ። ህንተ ፓንꬃ ናይታ ማሻን ዎꬋስ፤ ህንተ ፓራት ድኤታና መላ ኦꬃስ። ህንተ ሞꬃ አሀ ፅንቆን ኡላስ፤ ሽን ህንተ ሄሳንካ ታኮ ስምበከታ” ያጌስ ጎዳይ።

11 “ሶዶመነ ጋሞራ ካታማታ ꬋይስዳይሳዳ ህንተፈ ዳሮታ ꬋይሳስ፤ ህንተ ታማፐ አትዳ ዱንቻ መላ፤ ሽን ሄሳንካ ህንተ ታኮ ስምበከታ” ያጌስ ጎዳይ።

12 ሄሳ ግሾ፥ “እስራኤለ አሳዉ፥ ታኒ ህንተና ሀይሳዳ ኦꬃዳ ሴራና። ታኒ ህንተና ሀይሳዳ ኦꬃዳ ሴራና ሀንያ ግሾ፥ እስራኤለ አሳዉ፥ ህንተ ፆሳራ ጋሄታናዉ ጊግተ” ያጌስ ጎዳይ።