3
ሀራ ካዎተꬃት ፕርደታና
1 “ሄ ጋላሳንነ ሄ ዎድያን
ታኒ ይሁዳነ የሩሳላመ አሳ
ድኤተꬃፈ ዛራዳ አንጃና።
2 ታኒ ካዎተꬃታን ደእያ አሳ ሺሻዳ፥
ዮሳፈፃ ዛንጋራ ዎꬍሳና።
ታ አሳ እስራኤለ ቦላ ኤንቲ ኦꬅዳ ኢታ ኦሱዋ ግሾ፥
ታኒ ኤንታ ያን ፕርዳና።
ኤንቲ ካዎተꬃታ ግዶን ታ አሳ ላልዶሶና፤
ታ ቢታ ባንታዉ ሻክ ኤክዶሶና።
3 ታ አሳ ቦላ ሳማ የግዶሶና፤
ላይማትያ ማጫስ ደማናዉ፥ አደ ናይታ እምዶሶና፤
ዎይነ ኡሻስ ማጫ ናይታ ባይዝዶሶና።
4 “ህንተኖ፥ ፅሮሳ፥ ስዶናነ ፍልስፄመ ቢታ አሳቶ፥ ህንተ ታ ቦላ አይ ኦꬃናዉ ቆፕደቲ? ታ ቦላ ሀሎ ከያናዉ ኮዬቲ? ህንተ ሄሳ ኮይኮ፥ ታኒ ኤለሳዳ ህንተ ኦሱዋ ህንተ ቦላ ዛራና። 5 ታ ብራ፥ ታ ዎርቃነ ታ አልኦ ሚሽያ ኡባ ኤክድ ህንተ ኤቃ ኬꬃ ገልስደታ። 6 ይሁዳነ የሩሳላመ አሳ ኤንታ ቢታፈ ሃስ ኤፍድ፥ ግርከ አሳስ ባይዝደታ። 7 ሄኮ፥ ህንተ ባይዝዳ በሳፈ ታኒ ሀእ ኤንታ ከሳዳ ህንተ ኦꬅዳባ ኡባ ህንተ ሁጰን ዛራና። 8 ታኒ ህንተ አደ ናይታነ ህንተ ማጫ ናይታ ይሁዳ አሳስ አꬃ እማና። ኤንቲ ሃሆ ቢታን ደእያ ሳባ አሳስ ኤንታ ባይዛና። ታኒ ጎዳይ ሀይሳ ኦዳስ።
9 “ሀይሳዳ ያግድ ካዎተꬃታ ግዶን አዋጅተ፤
ኦላስ ጊግተ፤ ምኖ አሳታ ደንꬅተ፥
ኦላንቾት ሺቅድ ኦላስ ከዮ።
10 ህንተ ማራሻ ማሸ፥
ህንተ ባጫ ቶራ ኦꬅድ ቆፅተ!
ዳቡራንቾይ፥ ‘ታኒ ምኖ!’ ያጎ።
11 ህንተኖ፥ ዩሹዋን ደእያ ካዎተꬃቶ፥
ኤለ ከይተ፤ ሃ ሺቅተ” ያግተ።
አቤት ጎዳዉ፥ ነ ኦላንቾታ ዱገ የዳ!
12 “ካዎተꬃት ደንድድ፥
ዮሳፈፃ ዛንጋራ ዮ፤
እስራኤለ ዩሹዋን ደእያ ካዎተꬃታ፥
ኡባ ቦላ ፕርዳናዉ ታኒ ያን ኡታና።
13 ኤንታ ኢታተꬃይ ዳሮ፤
ጫካ ዎደይ ጋክዳ ካꬃዳ ኤንታ ጫክተ።
ዎይነ አይፈይ ኦላን ኩምን የይሳዳ፥
ኤንታ የꬍተ።
14 ፕርዳ ዛንጋራን ጎዳይ ፕርድያ ጋላሳይ ጋክስ፤
ሄሳ ግሾ፥ ታይቦን ዳሮ አሳይ ሄ ዛንጋራን ሺቅስ።
15 ሄ ጋላስ አውነ አጌን ꬉማና፤
ፆልንቶት ባንታ ፖኡዋ ድጋና።
16 ጎዳይ ፅዮነን ግድድ ደቻና፤
የሩሳላመን ባ ቃላ ስሳና፤
ሳሎይነ ሳእ ኮኮራና።
ሽን ጎዳይ ባ አሳስ፥
እስራኤለስ ባቃትድ አትያ በሲ ግዳና።”
ፆሳ ደረይ አንጀታና
17 “ሄ ዎደ ህንተ፥ ታኒ ታ ጌሻ ዙማ ቦላ፥
ፅዮነን ደእያ ጎዳ ህንተ ፆሳ ግደይሳ ኤራና።
የሩሳላመ ካታማይ ጌሽ ግዳና፤
አላጋት ዛሪድ የሩሳላመ ኦሎኮና።
18 ሄ ጋላስ ደረት ማልአንቶ ዎይነ ኡሻን ፆካና፤
ዙማት ማꬅ ጎጋና።
ይሁዳ ቢታን ደእያ ሻፋ ኡባን
ሃꬅ ፑልታና።
ጎዳ ኬꬃን ፑልቶይ ꬉቃና፤
ሴፅማ ዛንጋራ ኡሻና።
19 “ግብፀይ ባይሳ ግዳና፤
ኤዶመይ ቦድላ ባዞ ግዳና።
ኤንቲ ይሁዳ አሳ ቦላ ኢታባ ኦꬅዶሶና፤
ፅሎ አሳ ሱꬃ ጉስዶሶና።
20 ሽን ይሁድነ የሩሳላመይ መርናዉ፥
የለታ ኡባስ ደእያ በሲ ግዳና።
21 ታኒ ሀሎ ከዮና አግዳ ኤንታ ሱꬃ
ሃሉዋ ቡሮ ከያና” ያጌስ ጎዳይ።