ታ ጌሻ ዙማ ቦላ ዋስተ።

ጎዳ ጋላሳይ ዬስ፤ ካረን ደኤስ።

ሻራነ ሳካና ꬉማ ጋላስ!

ዳሮነ ዎልቃማ ቦለይ ቢታ ማአና።

ስንꬃፈካ ሄሳ መላባይ ሀነና።

ኤንታፈ ጉየራ ላጮይ ፁጌስ።

ሽን ኤንታ ጉየይ ቦድላ ባዞ መላ፤

ኤንታፈ አይብካ ከስ ኤከና።

ኤንቲ ኦላ ፓራዳ አዳርሶሶና።

ደርያ ሁጰራ ጉፖሶና።

ኦላ ባናዉ ከይዳ ዎልቃማ ኦላንቾ ዳኖሶና።

ያሻን አሳ ሶምኦይ ካሬፄስ።

ቶራ አሳዳ ድርሳ ቦላራ ጉፖሶና።

ባንታ ሳልፕያፈ ጋፃ ከዮኮና።

ኡባይ ቅንፅ ግድ ስን ቦሶና።

ኤንታ ተቅያባይ ባዋ።

ድርሳ ግምብያ ቦላራ ዎፆሶና።

ካይሶዳ ማስኮተራ ገሎሶና።

ሳሎት ኮኮሮሶና።

ፆልንቶት ባንታ ፖኡዋ ድጎሶና።

እያዉ ኪተትያ ኦላንቾት ታይቦፐ ቦላ።

ሄ ጋላሳ ዳንዳአናይ ኦኔ?

ህንተ ፖሎ ዎዛናፐ ታኮ ስምተ።”

ህንተ ማኡዋ ፔꬎፕተ።

እ፥ ቃይነ ማሮት ኩምዳይሳ፤

እ፥ ህንተና ሴራናዉ ኤለሰና።

ባ ሀንቁዋፈ ስሚድ

ህንተና አንጃነኮ ኦን ኤሪ?

ካꬃ ያርሾነ ኡሻ ያርሾ ያርሻና።

ፆማ አዋጅተ፤

ጌሻ ሺቁዋ ሺቅተ!

ጭማታ እስፈ ሺሽተ፤

ጉꬃ ናይታነ ꬋመይሳታ አሾፍተ።

ባንታ ቁሩፁዋፐ ከዮ።

ባራንዳፈነ ያርሾ በሳፈ ግዶን ኤቅድ ዬኮ።

“አቤት ጎዳዉ፥ ነ አሳስ ቃታ፤

ካዎተꬃት፥ ‘ኤንታ ፆሳይ አዉኔ? ያጋና መላ ኦꬃዳ፥

ነ አሳ ቦረስነ ሚቻስ የጎፋ’ ” ያጎ።

ባ አሳስ ቃትስ።

“ሄኮ፥ ታኒ ህንተዉ ካꬃ፥ ዎይንያነ ዛይትያ፥

ካልሳና ጋካናዉ የዳና፤

ህዛፐ ጉየ ካዎተꬃታ ግዶን ህንተና ቦረስ አግከ።”

ታኒ የደꬃዳ ህንተፈ ሃሳና።

ስንꬃ ባጋራ ደኤይሳታ ማፅነ አባ፥

ጉየ ባጋራ ደኤይሳታ መደትራነ አባ፥ የደꬃና፤

ያን ኤንቲ ሀይቅድ ፅንቃና።

ጎዳይ ግታባ ኦꬅዳ ግሾ፥

ኡፋይታነ ሀሹ ጋ!

ባዞን ደእያ ማታይ አጭስ።

ባላሰይነ ዎይነ አይፈይ ቡርኩክስ።

ጎዳን ህንተ ፆሳን፥ ሀሹ ጊተ!

ካሰይሳዳ ስላነ ቶርቸ እራ ግድስድ እሚስ።

ዎይንያነ ዛይትያ ጉምእያ ኦላይ ኩምድ ፓላሀና።

ዎልቃማ ጎንዶይ፥ ቦለይ፥ ጉዶትነ ፃቆት ምዳይሳ፥

ታ ህንተዉ ዛራና።

ማላልስያባ ህንተዉ ኦꬅዳ ጎዳ።

ህንተ ፆሳ ሱንꬁ ጋላታና፤

ታ አሳይ ዛሪድ ዬላተና።

ታኒ ጎዳይ ህንተ ፆሳ ግደይሳነ

ታፐ ሀራ ፆሲ ባይናይሳ ህንተ ኤራና።

ታኒ አሳ ኡባ ቦላ ታ አያና ጉሳና።

ህንተ ጭማት አሙሆ አሙሀና፤

ህንተ ናአተꬃት ቆንጨꬅ በአና።

ታ ማጫ አይለታ ቦላ ታ አያና ጉሳና።

ታማነ ሳሎ ደንድያ ጩያ በሳና።

አው ꬉማና፤ አጌን ሱꬁ ዳናና።

ጎዳ ሱንꬃ ፄግያ ኡባይ አታና።

የሩሳላመን አትዳይሳት ዳና።