1 እስ እስ ካህነ ሀላቅ አሳ ግዶፈ ዶረትድ፥ ፆሳራ ጋꬅያባን አሳ ግሾ እሞታነ ናጋራ ያርሾ ያርሻናዉ ሹመቴስ። 2 እ ባ ሁጰን ዳቡራንቾ ግድያ ግሾ፥ ኤሮናይሳታስነ ባለይሳታስ ቃታናዉ ዳንዳኤስ። 3 እ ባ ናጋራ ግሾነ አሳ ኡባ ናጋራ ግሾ ያርሾ ያርሻናዉ በሰይ ሄሳሳ። ሌወ 9:7.

4 ኦንካ ሀ ቦንቹዋ ባዉ ኤካናዉ ዳንዳኤና፥ ሽን አሮን ካህነ ሀላቃ ግዳናዉ ፄግዳይሳዳ ፆሳን ፄገታናዉ በሴስ። ከሳ 28:1. 5 ሄሳዳካ፥ ክርስቶስ ካህነ ሀላቃ ግድያ ቦንቹዋ ባዉ ኤክቤና። ሽን ፆሳይ እያ፥

7 የሱሲ አሰ ግድድ ሀ አላምያን ደእያ ዎደ ባና ሀይቆፐ አሻናዉ ዳንዳእያ ፆሳ ዳሮ ዬሆንነ አፉꬃን ዎስስ። እ፥ እያ ቦንችድ ኪተትዳ ግሾ ፆሳይ እያ ዎሳ ስእስ። ማቶ 26:36-46፤ ማር 14:32-42፤ ሉቃ 22:39-46. 8 የሱሲ ፆሳ ናአ ግድኮካ ባ ዋየትዳ ዋያን ኪተተꬅ ታማርስ። 9 ሄሳንካ፥ የሱሲ ባ ኦሱዋ ፖልዳፐ ጉየ ባዉ ኪተትያ ኡባይ መርና አቶተꬃ ደማና መላ ጋሶ ግድስ። 10 ፆሳይ ማልከፃደቃ ሹምዳይሳዳ ካህነ ሀላቃ ኦꬅድ እያ ሹምስ።

11 ሀ ኑ ኦዳ ቦላ ጉጅ ኦዳናባይ ዳሮባይ ደኤስ፥ ሽን ህንተ አኬካይ ጉꬃ ግድያ ግሾ ህንተዉ ኦድ ገልሳናዉ ዋይሴስ። 12 ህንተ ሀኖደ አስታማረ ግዳናዉ በሴስ፥ ሽን ፆሳ ቃላ ኮይሮ ትምርትያ ህንተና ዛር ታማርስያ ሀራ አስ ኮሼስ። ህንተ ምኖ ካꬅ ማናዉ ዳንዳኦና ግሾ ማꬅ ኮሼስ። 2 ቆሮ 3:2. 13 ማꬅ ፓሄትያ ኦንካ ዮጋ ናአ ግድያ ግሾ፥ ሎኦነ ኢታ ሻክ ኤረና። 14 ሽን ምኖ ካꬅ ሎኦነ ኢታ ሻክ ኤርያ ካሃማ አሳሳ።