1 ህዛ፥ ክርስቶሳባ ታማርስያ ኮይሮ ትምርትያ አግድ ክርስቶሳን ካሃማተꬃኮ ቦስ። ሀይቆ ኦሶፐ ስሞባነ ፆሳ አማኖባ ኮይሮ ትምርትያኮ ጉየ ስሞኮ። 2 ሄሳዳካ፥ ፅንቃተታባ፥ *ፅንቃተታባ፦ ሀ በሳን ፅንቃተታባ ጌተትዳይ ዱማ ዱማ ጌሾ ዎጋታባ ኦዳናሳ። ኩሸ ዎሶባ፥ ሀይቆፐ ደንዶባነ መርና ፕርዳባ ዛር ታማሮኮ። 3 ፆሳይ ጊኮ ኑ ሄሳ ኦꬃና።

4 እስ ቶሆ ፖኦይ ፖእዳይሳታ፥ ሳሎ እሞታ ኤክዳይሳታ፥ ጌሻ አያናን ሻከትዳይሳታ፥ 5 ሎኦ ፆሳ ቃላነ ስንꬃፈ ያና አላምያ ዎልቃ በእዳይሳታ፥ 6 ጉየፐ ካድዳይሳታ ናጋራፐ ናምአንꬆ ዛራናዉ ዳንዳኤተና። አይስ ጊኮ፥ ኤንቲ ባንታ ꬋዩዋስ ፆሳ ናኣ ዛር ካቅያ መላ ማስቃልያ ቦላ እያ ካቆሶናነ አሳ ስንꬃን ካዉሾሶና።

7 ኡባ ዎደ እ ቦላ ቡክያ እራ ኡያዳ፥ ጎይዳ ኡራ ማድያ ካꬅ እምያ ቢትያ ፆሳን አንጀትዳሮ። 8 ሽን አጉንꬅነ ክንቾተ ዶልያ ቢትያ አይብባካ ማዱኩ፤ እዉ ባደꬃይ ማታትስ፤ ዉርሰꬃን ፁገታና። መ 3:17-18.

9 ኑ ሲቆ እሻቶ፥ ኑኒ ሀይሳዳ ኦድያባ ግድኮካ፥ ህንተና አቶተꬃኮ ካለꬅያ ሎኦባይ ህንተዉ ደኤይሳ ኤሮስ። 10 ፆሳይ ሱረ ፕርደይሳ። ፆሳይ፥ ህንተ ኦꬅዳ ኦሱዋነ ካሰ ግድን ሀእካ አማነይሳታ ማድድ፥ እያዉ ደእያ ሲቁዋ በስዳይሳ ዶገና። 11 ህንተ ኡባይ ኡፋይሳን ናገይሳ ደማና ጋካናዉ ሀ ምኖተꬃ ዉርሰꬅ ጋካናዉ በሳና መላ ኑ አሞቶስ። 12 ህንተ አማኖንነ ዳንዳአን ናግያ ኡፋይሳ ላትያ አሳ ዳናና መላፐ አትሽን፥ አዛላ ግዳና መላ ኮዮኮ።

13 ፆሳይ አብራሃመስ እማና ግድ ጫቅዳ ዎደ ባፐ አꬍያ ሀር ግት ባይና ግሾ ባ ሁጰን ጫቅስ። 14 እያኮ፥ “ታኒ ነና አንጃና፤ ነ ዘረꬃካ ዳርሳና” ያግስ። መ 22:16-17. 15 አብራሃመይ ዳንዳአን ናግድ ፆሳይ እማና ግዳ ኡፋይሳ ኤክስ።

16 አስ ጫቅሸ ባፐ ግታትያ ኡራን ጫቄስ፤ ሄ ጫቆይ ጌተትዳባ ምንꬅድ፥ ፓላማ ኡባ ተቄስ። 17 ሄሳ ግሾ፥ ፆሳይ ባ ላመቶና ቆፋ ኡፋይሳ ቃላ ላተይሳታስ ቆንጭሳናዉ ኮይዳ ግሾ ጫቆን ምንꬅስ። 18 ፆሳይ ዎርዶተና። እያ ኡፋይሳ ቃላይነ ጫቆይ፥ ናምአይካ ላመቶኮና። ሀ ናምኡባታን ኑ ስንꬃን ደእያ ኡፋይሳ ኦይካናዉ ዳንዳአና መላ ገሸ ደማናዉ እያኮ ባቃትዳ ኑኒ፥ ዎልቃማ ምንꬆ ደማና።

19 ሀ ኡፋይሳይ ኑ ሸምፑዋ፥ ማርካበይ ቃፆናዳ ምንꬅ ኦይክያ ብራታ መላ። ሄ ኡፋይሳይ ማጋራጁዋፈ ጉየ ባጋን ደእያ ጌሻ በሳ ገልስ። ሌወ 16:2. 20 የሱሲ ማልከፃደቃ ሹማተꬃዳ መርናዉ ካህነ ሀላቃ ግድድ፥ ኑ ግሾ ኑፐ ስንꬃትድ ሄ በሳ ገልስ። ማዝ 110:4.