28
1 “ብራ ቦክድ ከስያ በስነ
ዎርቃ ሴርስያ በሲ ደኤስ።
2 ብራት ቢታፈ ከዬስ፤
ናሰ ብራት ሹቹ ሴርስን ከዬስ።
3 አሳይ ፆምፐ ኤክድ ꬉማ ፖእሴስ፤
ቢታ ጋꬅ ጋካናዉ ገሌስ፤
ሳካና ꬉማን ሄ ሹቻ ኮዬስ።
4 አሳይ ደእያ በሳፈ ሃክድ፥
አሳ ቶሆይ የꬍ ኤሮና ሶ ጋክድ፥
ያን ግታ ኦላ ቦኬስ።
ዎዶሮን ያነ ሃነ ኩሎትሸ፥
አሳፐ ኮፀትድ ደኤስ።
5 ካꬅ ቢታፈ ሞኬስ፤
ሽን እያ ግዶይ ታማን ሴርድ፥
ሽረት ሽረት ዎꬌስ።
6 ሄ ዛላፈ ሳንፓረ ጌተትያ አልኦ ሹቻይ ከዬስ፤
እያ ቢታፈ ዎርቃይ በንቴስ።
7 ሄ ሹቻ ቦክያ በሳ ፅሎይ ኤረና፤
ጵርጮይካ በእቤና።
8 ኢታ ዶአት ሄ በሳ የꬍ ኤሮኮና፤
ጋሞይ ያራ አꬍቤና።
9 አስ ምኖ ዛላ መንረꬄስ፤
ደርያ ቦክድ ፃጱዋፐ አꬅድ የጌስ።
10 ዛላ ሉክድ ካንꬅያ ኦገ ከሴስ፤
ሄ አልኦ ሹቻ ደሜስ።
11 ሃꬅ ሄ በሳራ ጎጎና መላ ዜረስ፤
ጌምዳባታ ፖኦ ከሴስ።
12 “ሽን ጭንጫተꬅ አዉፐ በንታናዉ ዳንዳኢ?
አኬክ ደእያ አዌ?
13 አስ እያ ጋትያ ኤረና፤
እ ደኦን ደእያ መተꬃት ደእያ ቢታን በንተና።
14 አባ ጪሞይ፥ ‘ጭንጫተꬅ ታ ግዶን ባዋ’ ያጌስ።
15 ጭንጫተꬅ ዎርቃን ሻመተና
ዎይኮ ብራን በንተና።
16 ጭንጫተꬅ ኦፍራ ዎርቃን፥
ማርግደነ ሳንፓረ ጌተትያ አልኦ ሹቻን ሻመተና።
17 ዎርቅነ ማስቶተይ እያራ ልከተና፤
ዎርቃፈ ኦሰትዳ አልኦ ሚሸን ላመተና።
18 ጭንጫተꬃ ጋተይ ዛጎለፐ፥
አልማዘፐነ አልኦ ሹቻ ኡባፈ አꬌስ።
19 ቶጳዘ ጌተትያ ቶጰ እንቆይ እያራ ልከተና፤
ዋላህ ባይና ዎርቃን እ ሻመተና።
20 “ያትን፥ ጭንጫተꬅ አዉፐ ዪ?
አኬክ አዉፐ በንቲ?
21 ደኦን ደእያ መተꬃ ኡባፈ ጌምድ ደኤስ፤
ሳሎ ካፎት እያ ደሞኮና።
22 ጋዶይነ ሀይቆይ፥
‘ኑኒ ጭንጫተꬃባ ሀይꬃን ስእዳ’ ያጎሶና።
23 “ጭንጫተꬃኮ ኤፍያ ኦግያነ እ ደእያ በሳ
ኤረይ ፆሳ ፃላላ።
24 ፆሳይ ሳኣ ጋፃ ኡባ ፄሌስ፤
ሳሎፐ ጋርሳን ደእያባ ኡባ በኤስ።
25 ፆሳይ ጫርኮስ ዎልቃ እምዳ ዎደ፥
ሃꬃ ማክዳ ዎደ፥
26 እር ቡካና ዎጋ እምዳ ዎደ፥
ዳዳስ ኦገ ዎꬅዳ ዎደ፥
27 ፆሳይ ጭንጫተꬃ በእስ፤
በእድ ቦንችስ፤ ፓጭድ ኤስስ።
28 ሄ ዎደ ፆሳይ አሳኮ፥
‘ጭንጫተꬅ ፆሳስ ያየይሳ፤
አኬክ ኢታፐ ሃከይሳ’ ያጌስ” ያግስ።