17
1 ኦሽ ደእያ በሳን ደእያ ግታ ግብራፐ
ሳሮይነ ዎፕ ደእያ በሳን ኡይꬃ ፖቆይ ሎኦ።
2 ጭንጫ አይለይ ፓꬆና ባ ጎዳ ናኣ ሃሬስ፤
እያ እሻታራ እስፈ ላታ ሻከቴስ።
3 ዎርቅነ ብር ታማን ፓጨተይሳዳ፤
ጎዳይ አሳ ዎዛና ፓጬስ።
4 ኢታ አስ ኢታ ሃሳያ ስኤስ፤
ዎርዳንቾይ ዎርዶ ሃሳያ ሀይዜስ።
5 ማንቆታ ቦላ ቀልቅስያ አስ ኤንታ መꬍዳ ፆሳ ጫዬስ፤
ሀራ አስ ጋክያ መቶን ኡፋይትያ አስ ሴረቶና አተና።
6 ናአ ናእ ጭማ አሳስ ካላቻ፤
አዋት ባንታ ናይታስ ቦንቾ።
7 ሎኦ ኦድ ኤያ አሳስ ጊገና፤
ሄሳዳካ ዎርዶ ኦድ አይሰይሳስ ጊገና።
8 ዎꬋፈ እመይሳስ ዎꬋፈይ ብታ መላ፤
እ ብያ በሳ ኡባይ እያዉ እንጀቴስ።
9 ቆሆ ገንꬅያ ኡራይ ሲቆ ኮዬስ፤
ሽን ኦዳ ዛሪድ ዛሪድ ዎጭያ ኡራይ፥
አማነትያ ላገታ ሻኬስ።
10 ኤያይ ፄቱ ቶሆ ልሶን ሾጭን ኤረይሳፈ፤
አኬክ ደእያ አሳስ ጮ ሀንቆይ ኤራ እሜስ።
11 ኢታ አስ ኡባ ዎደ ጌላ፤
ቃይ ባይና አስ እያ ቦላ ኪተታና።
12 ኤያራ እያ ኤያተꬃን ጋሄታናፐ
ማራት ኤከትዳ ማሄራ ጋሄተꬅ ሎኦ።
13 ሎኦ ኦꬅዳይሳስ ኢታ ኩሸ ዛርያ
ኡራ ሶፐ ኢታባይ ክቸና።
14 ኦሽ ዶምሸ ሃꬅ ꬋዋ መንይሳ መላ፤
ሄሳ ግሾ ኦሽ ዶማናፐ ኮይሮታዳ ፓላማ አጋ።
15 ናጋራንቹዋ ፅልሶይነ
ፅሉዋ ቦላ ፕርዶይ፥
ናምአይካ ጎዳይ እፅያ ኦሶ።
16 ጭንጫተꬅ ደማናዉ አሞይ ባይና ደእሽን፥
ኤያ ኩሸን ደእያ ሚሸይ አይ እያ ማዲ?
17 ላገይ ኡባ ዎደካ ላገ፤
እሽ መቶ ዎደ ማዳናዉ የለቴስ።
18 አኬክ ባይና አስ ኤሮና ኡራ
አጩዋ ቃንፃናዉ ዋሰ ግዴስ።
19 ኦሹ ዶስያ አስ ናጋራ ዶሴስ፤
ኡባ ዎደ ጬቀትያ አስ ባ ቦላ ꬋዮ ፄጌስ።
20 ዎበ ቆፍ ደእያ አስ ሎኦባ ደመና፤
ባ እንፃርሳን ጭምያ አስ መቶን ገሌስ።
21 ኤያ ናአ የልዳ አው አዛኔስ፤
ኤያ ናአ አዋስ ኡፋይስ ዴና።
22 ኡፋይትያ ዎዛን አሳስ ሎኦ ꬋለ፤
ሽን መቅዳ ዎዛን አሳስ ዎልቃ ꬋይሴስ።
23 ኢታ አስ ፕርዳ ጌላያናዉ
ጌማን ዎꬋፈ ኤኬስ።
24 አኬካ አስ ጭንጫተꬅ ባ ስንꬃፈ ሃሰና፤
ሽን ኤያ አሳ አይፈይ ሳአ ጋፃ ዩዬስ።
25 ኤያ ናእ ባ አዋ አዛንꬄስ፤
ባ አይዉካ ጫምሴስ።
26 ፅሎ አስ ሴሮይ በሰና፤
ሱረ አስ ሾጮይ ሎኦ ግደና።
27 ጉꬃ ቃላ ሃሳያ አስ ኤራንቾ፤
ዎፓ አያን ደእያ አስ አኬካንቾ።
28 ኤያ አስ ስእ ጊኮ ጭንጫ ዳኔስ፤
ባ ዶና ዶዮና እፅኮ ኤራንቾ ዳኔስ።