18
1 ሻሄተꬅ ኮይያ አስ ባ አሙዋ ካሌስ፤
ሱረ ቆፋ ኡባ እፄስ።
2 ኤያ አስ ባ ቆፋ ፃላላ ቆንጭሳናዉ ዶሴስ፤
ሀራ አሳፐ ኤራ ኤካናዉ ዶሰና።
3 ኢታተꬅ ያ ዎደ ካይ ዬስ፤
ካዉሻተꬅ ያ ዎደ ዬል ዬስ።
4 አሳ ዶናፐ ከያ ኦድ፥
ጪሞ ሃꬃ መላ፤
ጭንጫተꬅ ጎግያ ፑልቶ መላ።
5 ናቅዳ ኡራ ማድድ፥ ፅሉዋ ፕርዳ
ጌላየይስ ሎኦ ግደና።
6 ኤያ አሳ ኦድ ኦሹ ደንꬄስ፤
እያ ዶናይ ዋꬎ ፄጌስ።
7 ኤያ አሳ ኦድ ባና ቆሄስ፤
እያ ኦዳይ ፅሄ ግድድ እያ ኦይኬስ።
8 ዝግርስ ማልኦ ካꬃ መላ፤
ኡፋይስሸ ዱገ ጋንጀ ጋኬስ።
9 አዛላ አስ
ꬋይስያ አሳፐ አይባካ ዱማተና።
10 ጎዳ ሱንꬃይ ምኖ ግምበ መላ፤
ፅሎ አስ ያ ዎፅድ ሳሮ አቴስ።
11 ዱረ አሳታ ዱረተꬃይ ግምበትዳ ካታማ መላ፤
ኤንታ ቆፋን ኤንታ ዱረተꬃይ
ምኖ ድርሳዳ ኤንታ ናግያባ ዳኔስ።
12 ኦቶሮይ ኩንደꬃፈ ስንꬃቴስ፤
አሽከተꬅ ቦንቾ ኤሄስ።
13 ስኦና ደእሸ ዛሮ እሞይ፥
ሄ ኡራስ ኤያተꬅነ ዬላ።
14 ዳና ግድ ቆፕኮ፥ እያ አያናይ ሀርገ ዳንዳእሴስ፤
ሽን ኡፋይስ ቃንፅኮ እያ ማደይ ባዋ።
15 አኬካ አስ ኤራተꬅ ኮዬስ፤
ጭንጫ አሳ ሀይꬅ ጭንጫተꬅ ስኤስ።
16 እሞት እመይሳስ ኦገ ዶዬስ፤
ግታ አሳታራ ኤርሴስ።
17 ዳይና ስንꬃን ኮይሮ ሺቅድ ሞትያ ኡራይ፥
እያ ሞርከይ ይን፥ እያ ኦይቻና ጋካናዉ፥
ኡባ ዎደ ባና ፅሎ ግድ ቆፔስ።
18 ሳማ የገꬅ ፓላማ ተቄስ፤
ናምኡ ፓላምያ አሳታ ሻኬስ።
19 ቆሄትዳ እሻይ ግምበትዳ
ካታማፐ አꬍድ ምኔስ፤
እያ ፓላማይ ብራታ ጎርደ መላ።
20 አስ ባ ዶና ኦዳን ባ ኡሎ ኩንꬄስ፤
ባ እንፃርሳ አይፈን ካሌስ።
21 ሀይቆይነ ደኦይ እንፃርሳና፤
ኔኒ ነ እንፃርሳ አይፍያ ማና።
22 ማቾ ደምዳይ ሎኦባ ደምስ፤
እ፥ ጎዳፐ ቴማ ደሜስ።
23 ማንቆ አስ አዳሽድ ኦደቴስ፤
ሽን ዱረ አስ ኦቶሮን ዛሬስ።
24 ዳሮ ላገይ ደእያ አስ ባ ቦላ መቶ ኤሄስ፤
ሽን እሻፐ አꬍድ ማታትያ ላገይ ደኤስ።