ባ ደኡዋን ቦረይ ባይና ማንቆይ ሎኦ።

ኤሶ ዳሮይ ኦገ ባለꬄስ።

ያትድ ጎዳ ቦላ ይሎቴስ።

ሽን ማንቆተꬅ ደእያ ላገታ ዱꬄስ።

ዎርዶ ኦደተይ ከስ ኤከና።

እሞታ እምያ አሳራ አስ ኡባይ ዳቦቴስ።

እያ ላገት እያፐ ሃኮሶና፤

እ ኤንታ አዳሽንካ ኤንቲ እያ ኮዮኮና።

ኤራተꬅ ምንꬅድ ኦይክያ ኡራስ እንጀቴስ።

ዎርዶ ኦደተይ ꬋያና።

አይለይ ሀላቃታ ሃሮይ ዳሮ ኢታ።

ቆሆ ካꬍድ አꬅ ቦንችሴስ።

ሽን እያ ናሾይ ማታ አጭስያ አካ መላ።

ዶናማ ማቻ ፆክያ ኬꬃ መላ።

ሽን አኬካ ማቾ ጎዳይ እሜስ።

ኦሶ ኦꬆና አስ ኮሻቴስ።

ሽን ቀል ግያ አስ ሀይቄስ።

ጎዳይ ሄ ሎኦ ኦሱዋ ግሾ ዎይቴስ።

ሴሮና እፅኮ፥ ነ ኤንታ ꬋይሳሳ።

ኔኒ እያ እስ ቶሆ አሽያባ ግድኮ፥

ሀራ ዎደካ ነ እያ ሄሳዳ አሻናይስ አተና።

ኔኒ ዉርሰꬅ ጋካናዉ ጭንጫ ግዳና።

ሽን ጎዳይ ግዳባይ ፖለቴስ።

ዎርዶ ግዳናፐ ማንቆ ግደይስ ሎኦ።

እያ ያይያ አስ ካልድ ደኤስ፤ ኢት እያ ቦቸና።

ሀር አቶሽን ዎፀን ቱሽክዳ

ኡይꬃ ፑደ ባራናዉ ዋየቴስ።

አኬክ ፓጭዳይስ ጭንጫተꬅ ታማራና፤

አኬካ አስ ነ ሀንቀትኮ፥ እ ኤራተꬅ ደማና።

ባ አይዉ የደꬅያ ናአይ፥

ዬላነ ካዉሻተꬅ ኤህያ ናአ።

ኤራ ኦግያፐ ሃካሳ።

ኢታ አሳ ዶን ኢታተꬅ ምቴስ።

ኤያታስ ዋꬎ ኮሼስ።